Phaulus wërt aan kep
1Finef taache tëm noo is te Kroose Priister Ananias pis Sesarëya kang mit phaar yute fiirer un mit en atwokaat Tërtulus kenënt. Tii hon sich presenteyert fer te kowerneyer Fëliks fer tsayer xtele keeche Phaulus. 2Wii se Phaulus keruuf hate, hot Tërtulus aankefang Phaulus se pexultiche, am saan:
— Ayre Eere Hër Kowerneyer, ayer rechiirung hot uns xon en lang tsayt friite keprung, un weche ayer wisentlich atministratsioon sin fiile neetiche reforme kemach am kewe woo kuut sin fer unser lant. 3Meyer sin hooch tankpaar fer ales was mer kriit hon in ale keleechenheete un uf ale plets. 4Awer, ich wil net fiil fon ayer tsayt unneetich nëme un, tesweche, ferlange ich tas teyer soo kuut sayt un uns ploos noch en pisye aan heere tuut. 5Meyer mëne tas tee Phaulus soo kefeerlich is wii ti phest. Tee prowokt unortnunge unich te yute fon te kans welt un is aach te fiirer fon te nasareener sayne partay. 6Un hat aach fersuucht te Thëmpel se profaneere un, tan, hon meyer em fest kenom. Meyer wolte em julkeere tëm noo unser Kesets, 7awer te komantant Liisias is khom un hot em uns wech kehool mit kewalt. 8Too hot te aychne Liisias kexikt tas ti woo em aan kewe wole pis hier heyer kheempte fer tëm aan kewe foer aych. Wën teyer tee man aus frooe tuut, tuut tee selepst tsuu saan was meyer keeche iim am saan sin.
9Tan hon ti yute aach kesaat tas weyer ales woer.
Phaulus tefenteyert sich foer Fëliks
10Te Kowerneyer hot en sinaal kemach tas Saulus xpreche solt. Tan saat eyer:
— Ich wees tas teyer xon fiile yoore richter sayt iwer tas yute folek un, tesweche, fiile ich mich fray fer mich selepst tefenteere foer aych. 11Wii teyer selepst siin khënt, sin ploos tswelef taache heyer woo ich noo Yeruusalëm kang sin fer Hërkot se atoreere. 12Ti yute hon mich net kesiin mit nimant am tiskuteere uf em hoof fom Thëmpel, net mool tas ich tas folek uf kehetst hon in tëne sayn sinakooke ore sonst woo in te xtat. 13Un tii khëne niks pewayse keeche mich fon tëm ales was se am saan sin. 14Awer, ëns khan ich aych saan: ich keen te Weech noo woo ti yute saan weyer falx; awer is soo woo ich te Hërkot fon unser foerkhomer tiine. Ich klaawe an ales was kexrip is in te Mooses Kesets un in te picher fon te Profëte. 15Ich un tii woo mich aan kewe meyer hon ti selwich hofnung in Hërkot: al wëre peleepe, kraat soo ti kuute wii ti xlechte. 16Tesweche mache ich ales fer imer mayne kewise sauwer hon foer Hërkot un foer te layt.
17Un Phaulus saat wayter:
— Noo fiile yoore im auslant, waar ich yets noo Yeruusalëm tsurik khom fer en pisye kelt fer mayn aychne folek hiin nëme un fer opfere se mache. 18Wan ich tas am mache waar, wii ich ti raynichung seremonii fërtich hat, hon phaar yute mich pekeechent uf te hoof fom Thëmpel. Too waare net fiil layt mit meyer un khee unortnung. 19Awer, phaar yute fon te prowins Aasia waare tort kewees. Tii miste too sin foer aych fer mich aan se kewe, wën se etwas hete keeche mich. 20Ore, tan, tas tii mëner woo too sin saan op, wii ich foer em Hooche Konseel waar, tii mich xultich kefun hon fon etliche telikt. 21Wan ich foer tëne kextan hon, hon ich ploos in hat xtim kesaat: “Hayt sin ich am julkeyert kewe wayl ich klaawe tas ti toote peleepe tuun.”
22Tan hot Fëliks, woo kuut informeyert waar iwer te Weech, ti aanheerung fer noochter kelos, tëne am saan:
— Wën te komantant Liisias khome tuut, tan tuun ich ayre fal resolweere.
23Eyer hot kexikt tas te ofitseyer en wachter hiin tuun solt fer Phaulus un tas eyer en pisye frayheet kreecht un erlaupnis tas eyer hilef kriin khënt fon sayn froynte.
Phaulus foer Fëliks un Trusila
24Phaar taache truf, is Fëliks aan khom mit Trusila, sayn fraa, woo en yutin waar. Hot Phaulus ruufe kexikt un hot em keheyert iwer te klaawe an Yeesus Kristus xpreche. 25Awer, wan Phaulus aankefang hot se xpreche an en khorekt leewe, selepst kontrol un te Richte taach, hot Fëliks pang kriit un saat:
— Yets khanst tuu keen. Wën ich khan, ruufe ich tich noch mool.
26Eyer hot kehoft tas Phaulus iim etwas kelt keept. Tesweche hot eyer tee oft keruuf un mit tëm fertseelt.
27Tswaay yoer xpeeter, is Porsius Festus uf Fëliks sayn plats khom als kowerneyer. Fëliks wolt ti yute en kefale tuun; tesweche, hot eyer Phaulus im kefëngnis kelos.
