Akte 23

₁Tan hot Phaulus richt uf ti mitkliiter fom Konseel kekukt un saat:

— Mayn priiter, ich hon pis hayt keleept mit en sauwere kewise foer Hërkot.

₂Awer, Ananias, te Hooche Priister, hot kexikt tas ti mëner woo ticht an Phaulus waare tëm uf es munt haue solte. ₃Tan saat Phaulus fer Ananias:

— Xaynhayliche, Hërkot tuut tich xtroofe weeche tas! Tuu sitst too fer mich se julkeere tëm noo ti Kesets, kël? Tan wii soo host tuu kexikt mich ferhaue? Tas is keeche ti Kesets!

₄Ti mëner woo ticht an Phaulus waare hon kefroot:

— Pist tuu te Hooche Priister, Hërkot sayne tiiner, am pelaytiche?

₅Phaulus hot keantwort:

— Mayn priiter, ich wust net tas tee te Hooche Priister is. Wayl ti Hayliche Xrifte saan: “Tuu net xlecht xpreche fon te autoriteete fon tayn folek.”

₆Wii Phaulus kesiin hot tas en teel fom Konseel fom satuseyer partay waar un en aner teel fom fariseyer partay, hot eyer in hat xtim kesaat:

— Mayn priiter, ich sin en fariseyer un soon fon fariseyer. Ich sin too julkeyert am kewe wayl ich klaawe tas ti toote witer peleepe.

₇Soo wii eyer tas kesaat hot, hon ti fariseyer un satuseyer aankefang se tiskuteere, un te Konseel hot sich keteelt. ₈Ti satuseyer klaawe net tas ti toote peleepe tuun, net mool tas es ëngle ore anere kayste kept; awer ti fariseyer klaawe an tëm tings. ₉Un soo is tas xraayeray hërter kep. Tan hon phaar Kesets mayster woo fom fariseyer partay waare sich uf kextelt un hon protesteyert. Tii hon kesaat:

— Meyer siin niks ferkheyertes mit tëm man. Filaycht hot kraat en kayst ore en ëngel mit iim kexproch.

₁₀Te tumult is soo kewaltich kep, tas te komantant pang kriit hot ti teere Phaulus in xtiker mache. Tesweche hot eyer kexikt ti soltaate solte khome fer Phaulus too raus hoole un tsurik nëme in te fort.

₁₁In te neekst nacht, is te Hër Yeesus tsum foerxayn khom fer Phaulus un saat:

— Koraaj, Phaulus! Tuu host iwer mich kexproch hier in Yeruusalëm un keest aach in Room xpreche.

₁₂Am neekste moynt hon phaar yute sich kesamelt un hon ferxproch tas se niks ese un niks trinke teere pis se Phaulus umpringe teere. ₁₃Ti mëner woo sich ap kemach hon fer tas se mache waare iwer fërtsich. ₁₄Tii sin mit te xëfe fon te priister un mit te fiirer fom folek xpreche kang un saate:

— Meyer hon tii xwoorung kemach: “Tas Hërkot uns ferfluuche sol wën mer etwas ese ore trinke soo lang wii mer net Phaulus toot mache.” ₁₅Yets xikt teyer un te Hooche Konseel tas te komantant Phaulus heyer pringe tuut. Saat tas teyer tëm sayne fal peser unersuuche wolt. Tan, eep eyer hier aan khomt, sin meyer fërtich fer iim um se pringe.

₁₆Awer te soon fon Phaulus sayn xwester hot se wise kriit fon tëm plaan; tee is in te fort rin kang un hot ales fer Phaulus fertseelt. ₁₇Tan hot Phaulus ëne fon te ofitseyer keruuf un saat:

— Nëm te puup tsum komantant. Tee hot etwas fer tëm se fertseele.

₁₈Te ofitseyer hot te puup pis an te komantant kenom un saat:

— Te kefangne woo Phaulus heest hot mich ruufe kexikt un hot ferlangt tas ich tee puup pis an aych pringe teet, wayl tee hat en informatsioon fer aych.

₁₉Te komantant hot te puup an te hant kehool, hot em uf sayt keruuf un hot kefroot:

— Was hast tuu fer mich se fertseele?

₂₀Tee hot keantwort:

— Phaar yute hon ap kemach fer aych se ferlange tas teyer solt Phaulus moye pis an te Hooche Konseel nëme, mit te uersach tas se wole tëm sayne fal peser unersuuche. ₂₁Awer, klaap net an tas, wayl mee wii fërtsich fon tëne playwe ferxtekelt am waarte fer Phaulus um se pringe. Tii al hon tii xwoorung kemach: “Tas Hërkot uns ferfluuche sol wën meyer etwas ese ore trinke eep meyer Phaulus umkeprung hon.” Tii sin fërtich fer tii xwoorung in se hale un waarte ploos fer se wise was teyer resolweere tuut.

₂₂Tan hot te komantant keantwort:

— Saa fer nimant tas tuu tas mich fertseelt host.

Un hot kexikt te puup solt fort keen.

₂₃Tan hot te komantant tswaay ofitseyer keruuf un saat:

— Soricht tas tswaay hunert soltaate, un noch siptsich rayter, un tswaay hunert xtech soltaate fer an ti xtat Sesarëa keen. Playpt fërtich fer hayt ooment um noyn uer ap marxeere. ₂₄Prepareyert aach kayl fer Phaulus se rayte un nëmt iim in sicherheet fer te kowerneyer Fëliks.

₂₅Tëm noo hot te komantant en priif kexrip, woo soo saat:

₂₆“Hooch Keeerte Kowerneyer Fëliks,

“Pekriisunge.

₂₇“Phaar yute hon tee man kefang un hon em neekst toot kemach. Wii ich se wise kriit hon tas tee en reemixer is, sin ich mit mayn soltaate un hon net kelos tas eyer toot kemach keept. ₂₈Ich wolt wise fon was tii em am aankewe waare un, tesweche, hon ich resolweyert iim foer te Hooche Konseel fon te yute nëme. ₂₉Tan hon ich se wise kriit tas eyer niks kemach hot fer te toote xtroof fertiine ore in ti katee khome. Tii hon en ploos aan kep weche sayn aychne kesetse. ₃₀Wii ich informeyert kep sin tas en plaan im lauf is fer em um se pringe, hon ich resolweyert iim fer aych se xike. Un saat fer tii yute tas se foer aych iim aan kewe solte.

“Kesuntheet.

“Klaudius Liisias.”

₃₁Tan hon ti soltaate ti ortnunge in kehal. Hon Phaulus iwer nacht pis an ti xtat Antipatris kenom. ₃₂Am anere taach, sin ti soltaate tsurik noo te fort marxeyert, un hon ti riter kelos fer mit Phaulus wayter se reese. ₃₃Tii hon em pis an ti xtat Sesarëa kenom, hon te priif fer te kowerneyer ap kep un hon em Phaulus ap kep. ₃₄Te kowerneyer hot te priif keleest un hot fer Phaulus kefroot fon woo eyer weyer. Wii eyer se wise kriit hot tas tee fon te rechioon fon Siliisia weyer, ₃₅saat eyer:

— Wën tii woo tich aan kewe wole heyer khome, tuun ich aan heere was tuu se saan host.

Klaych tëm noo hot eyer kexikt tas Phaulus inkexpërt playwe solt im Kowerneyer sayne palas.