1— Mayn hëre, priiter un konselier, heyert was ich aych saan wil fer mich se tefenteere!
2Wii se em keheyert hon in hepreyix xpreche, sin se noch mee ruich keplip. Tan saat Phaulus:
3— Ich sin en yut, kepoer in Tarsus, rechioon fon te Siliisia, awer waar kroos kewakst hier in Yeruusalëm als xiiler fon Kamaliël. Waar kans xtram kepilt kep in te kesetse fon unsere foerkhomer. Ich waar fiil leaal an unser Hërkot, wii teyer al hier aach sayt. 4Hon tii woo te Weech noo kang sin keyacht un hon kemach tas phaar umkeprung kep sin. Hon mëner un fraae kefang un hon se in te katee inkexpërt. 5Te Hooche Priister un te kanse Hooche Konseel khëne pewayse tas ich ti woerheet am saan sin, wayl ich hon en preef fon tëne kriit, kexrip fer ti yute priiter woo in Damasco woone. Un ich sin pis tort hiin kang fer ti anhënger woo tee Weech noo keen se fange un pringe pis Yeruusalëm, mit khete aan kepun, fer kextrooft se kewe.
Phaulus fertseelt sayn konwersioon
6Un Phaulus saat wayter:
— Ich waar am reese, xon ticht an Damasco, un es waar unkefeyer an mitach. 7Ich sin uf te potem kefal un hon en xtim keheyert woo mich saat: “Saulo, Saulo, warom tuust tuu mich yachte?”
8— Tan hon ich kefroot: “Weyer sayt teyer?”
Eyer hot keantwort:
— “Ich sin Yeesus fon Nasarëë, tee woos tuu yachte tuust!”
9— Ti mëner woo mit mich am reese waare hon tas licht kesiin, awer hon net ti xtim keheyert fon tëm woo mit mich am xpreche waar. 10Ich hon kefroot: “Hër, was sol ich mache?”
— Un te Hër antwort: “Xtay uf un kee in ti xtat Damasco. Too tuut yemant tich saan ales was Hërkot hon wil tas tuu mache solst.”
11— Tas klënsich licht hat mich plint kelos kehat. Tesweche, hon mayn khameraate mich an ti hant kehool un hon mich pis Damasco kefiert. 12Too waar en man Ananias kenënt. Tee waar en relichioosiche man, hot unser Kesets kefolicht, un aler yute wo in Damasco kewoont hon, hon em rexpekteyert. 13Tee man is mich uf suuche khom, is ticht pay mich khom un saat: “Pruuter Saulo, solst noch mool siin!”
— Im selwiche momënt hon ich noch mool aankefang se siin un hon em aan kekukt. 14Tan saat eyer: “Saulo, te Hërkot fon unsere foerkhomer hot tich raus kesuucht fer tëm sayne wile se khëne, fer tëm sayne Kuute Tiiner siin un fer sayne Tiiner se heere perseenlich mit tich se xpreche. 15Wayl tuu wërst tëm sayne tsayer fer se saan fer ti kanse layt ales was tuu kesiin host un keheyert host. 16Un yets tuu net mee waarte. Xtay uf, ferlang em Hër sayne hilef un los tich taafe, un tayn sinte kewe fertsayert.”
Phaulus sayn misioon
17Un Phaulus macht xlus, am saan:
— Tan sin ich tsurik noo Yeruusalëm kang. Wan ich im Thëmpel am peete waar, hat ich en wisioon. 18Ich hon te Hër kesiin, un tee saat mich: “Kee xnel aus Yeruusalëm, wayl ti layt fon too tuun net aan nëme was tuu saan wërst iwer mich.”
19— Un ich hon keantwort: “Hër, ti wise kans kuut tas ich in ti sinakooke rin kang waar un inkexpërt hon tii woo an tich keklaapt hon, un hon se ferxlaa. 20Wii se Stefan am umpringe waare, woo iwer tich kexproch hot, oh Hër, waar ich too kewees, am tsuu xteen mit tëm telikt. Un hon sokaar ti mantle fon te mëner woo Stefan toot kemach hon uf kepast.”
21— Tan saat te Hër: “Kee, wayl ich xike tich pis kans wayt; ich xike tich fer tii woo khee yute sin.”
22Tas folek is Phaulus am heere keplip pis eyer tas kesaat hot, awer tan hon se aankefang se xraaye mit kraft:
— Macht em toot!
— Tee is net weyert se leewe!
23Tii hon kexraayt, hon sayn mantle in te luft kexitelt un hon xtaap noo ruf kexmis. 24Tan hot te komantant kexikt tas sayn soltaate Phaulus rin in te fort nëme solte. Hot aach kexikt solte em ferpaytxe tas eyer saan teet warom tas folek keeche iim am xraaye waar. 25Awer, wii se em am aan pine waare fer em se ferhaue, hot Phaulus kefroot fer te reemixe ofitseyer woo ticht pay em waar:
— Meecht teyer ti recht hon fer en reemixe man ferpaytxe, ekstra wën tee noch net konteneyert kep is?
26Wan te ofitseyer tas keheyert hot, is er mit em komantant xpreche kang un saat:
— Was tuut teyer mache? Tee man is en reemixe pirker!
27Tan is te komantant mit Phaulus xpreche kang un hot kefroot:
— Saa mich mool: pist tuu en reemixe pirker?
Phaulus hot keantwort:
— Yoo, ich sin!
28Tan saat te komantant:
— Ich sin aach, un tas hot mich fiil kelt kekhost.
Phaulus hot keantwort:
— Also, ich hon es kriit torich kepoer.
29Im selwiche momënt sin ti mëner woo em ferpaytxe solte tsurik ketreet. Un te aychne komantant hot pang kriit wii eyer se wise kriit hot tas Phaulus en reemixe pirker weyer un eyer hat em aan pine kexikt kehat.
Phaulus foer em Hooche Konseel
30Te komantant wolt richtich wise warom ti yute Phaulus am aan kewe waare. Tan, am anere taach, hot eyer kexikt solte ti khete ap mache woo em am fest pine waare un hot kexikt tas ti xëfe fon te priister un te kanse Hooche Konseel sich fersamle solte. Tëm noo, hot eyer kexikt tas se Phaulus pringe solte un em foer tëne hiin xtele.
