Te Aankhom fom Hayliche Kayst
1Wii te Phingste Taach khom is, waare Yeesus sayn aanhënger al paysamer fersamelt uf em selwiche plats. 2Uf mool, is en xrekliche ratau fom himel khom woo sich aankeheyert hot wii en aariche xtarke wint un tee ratau hot tas kanse haus kefilt woo tii kesetst hon. 3Tan hon se al etwas kesiin wii fayer flame, woo sich ferteelt hon wii fayer tsunge; un yeete persoon is aankethupt kep fon een fon tëne fayer xpritse. 4Al sin fol kep fom Hayliche Kayst un hon aankefang se xpreche in anere xprooche, tëm noo ti macht woo te Kayst fer yeete persoon am kewe waar.
5Too in Yeruusalëm waare yute am woone, relichioose mënxe woo aankhom waare fon ale natsioone fon te welt. 6Wii se tee ratau keheyert hon, hot en kroos folek sich kesamelt, un al hon sich fiil ferwunert wayl yeete ëne khont in sayn aychne xprooch ferxteen was Yeesus sayn aanhënger am saan waare. 7Tas folek hot sich ferwunert un erxtaunt saate se:
— Tii layt woo soo am xpreche sin, sin fon Kalilëya! 8Wii soo tuut yeete ëne fon uns se aan heere in unser aychne xprooch xpreche? 9Meyer sin fon Partia, fon Mëëtia, fon Elom, fon Mesopotamia, fon Yutëya, fon Kapatosia, fon Pontus, fon te prowins Aasia, 10fon Friijia, fon Panfiilia, fom Ejipt um fon te rechioone fon Liipia, woo ticht an Sireene playwe. Phaar fon uns sin fon Room. 11Phaar sin yute, un anere waare rom kang fer te yute sayn relichioon. Phaar sin fon Kreta, un anere sin fon Araapia. Un wii soo sin meyer al am heere ti layt in unser aychne xprooch am xpreche iwich tas kroos tings woo Hërkot ketuun hot?
12Al waare ferwunert, oone se wise was tënke, un hon kefroot eene fer ti anere:
— Was meecht tas petayte sole?
13Awer, anere hon kexpot, am saan:
— Ti layt sin knil!
Pheeter sayn mensaaj
14Tan is Pheeter uf kextii, mit te anere elef aphostle, un in kans hat xtim hot eyer aan kefang se saan fer tas kroos folek:
— Mayn froynte yute un al teyer woo in Yeruusalëm woont, kept acht un heyert was ich saan wil! 15Ti layt sin net knil, wii teyer am tënke sayt, wayl sin eyerxt noyn uer moynts. 16Was in te woerheet am peseere is is was te profët Joel kesaat hot:
17“Tas is was ich mache tuun an te letste taache — saat Hërkot:
Ich xite mayne Kayst iwer ale mënxe.
Ayre seen un tochtere tuun mayn mensaaj aan saan;
ti yunge wëre wisioone hon, un ti alte tuun treeme.
18Yoo, ich xite mayne Kayst iwer mayn tiiner
un in tëne taache tuun tii aach mayn mensaaj aan saan.
19Uwe, am himel, mache ich wunelich tings tsum foerxayn khome;
un uner, uf te eyert, mache ich wunere.
Es kept pluut, un fayer un tamp wolke;
20Ti sun kept tunkel un te moont kriit en pluut farep,
eep te kroose un kloorixe Taach fom Hër aan khomt.
21Tan, al tii woo em Hër sayne hilef ferlange kewe keret.”
22Phheter saat wayter:
— Mëner fon Israël, heyert was ich aych se saan hon. Hërkot hot aych ketsaycht tas Yeesus fon Nasarëë te man waar woo eyer tsuu kextan hot. Wayl, torich Yeesus, hot Hërkot wunere kemach un kroos aartich tings unich aych, wii teyer es kans kuut wist. 23Hërkot, tëm noo sayne aychne wile un wisheet, hot xon resolweyert kehat tas Yeesus solt in ayre hënt ap kep wëre. Un teyer selepst het em toot kemach torich ti hënt fon xlechte mëner, woo em pekraytst hon. 24Awer Hërkot hot Yeesus peleept, iim am pefraye fon te macht fom toot, wayl es waar net meechlich tas te toot iim tomineere teet. 25Wayl Dawii saat soo iwer Yeesus:
“Ich hon imer te Hër pay mich kesiin,
wayl eyer uf mayn rechts sayt is,
tas mich niks paseere sol.
26Tesweche is mayn hërts froo,
un mayn wërter sin wërter fon hërlichkheet;
un ich, en xtërwliche mënx, tuun ruue fol hofnung,
27wayl tuu, Hër, lost mich net in xtich in te toote welt.
Ich hon tich leaal ketiint,
un tesweche lost tuu net tas ich faule tuun im kraap.
28Tuu host mich ti weeche woo tsum leewe fiire kelërnt,
un tayne presëns filt mich mit frayt.”
29Un Pheeter saat noch tas:
— Mayn priiter, ich mus kans klaar mit aych xpreche iwich te patriark Dawii. Tee kroose kheenich is kextoerep un is peërticht kep, un sayn kraap is hier pis hayt. 30Tee waar en profët un wust tas Hërkot iim kexwoer hat tas ëne fon sayn nookhomer kheenich kewe teet, wii eyer. 31Dawii wust was Hërkot mache teet un, tesweche, hot eyer iwich em Kristus sayn peleepung kexproch. Dawii saat:
“Eyer is net in xtich kelos kep im toote sayn welt,
net mool sayne khërwer is faul kep im kraap.”
32Hërkot hot tee Yeesus peleept, un meyer al sin tsayer fon tëm fakt. 33Yeesus is kehoop kep fer sich uf Hërkot sayn rechts sayt setse. Sayne Fater hot iim te Hayliche Kayst kep, wii Er ferxproch hat. Un Yeesus hot tee Kayst iwer uns kexut, tëm noo teyer yets am siin un am heere sayt, 34Wayl Dawii is net ruf noo em himel kang, awer eyer selepst hot fersichert:
“Te Hër Kot saat fer mayne Hër:
‘Sets tich uf mayn rechts sayt,
35pis ich tayn faynte als pootium
unich tayn fiis tuun.’”
36Tas kanse folek fon Israël sol kans sicher sin tas tee Yeesus woo teyer pekraytst het tee is woo Kot Hër un Kristus kemach hot.
37Wii se tas keheyert hon, sin se al unruich kep un hon fer Pheeter un fer ti anere aphostle kefroot:
— Priiter, was sole meyer mache?
38Pheter hot keantwort:
— Royert aych, un yeete ëne fon aych sol ketaaft kewe in Yeesus Kristus sayne naame tas ayre sinte fertsayert kewe, un teyer kriit fon Hërkot te Hayliche Kayst. 39Wayl tii ferxprechung is fer aych, fer ayre khiner un fer al tii woo wayt fort sin, tas mënt, al tii woo te Hër, unser Kot, ruufe tuut.
40Pheeter hot sayn mensaaj wayter aan kesaat un, mit fiile anere erklëërunge, hot eyer fersuucht tëne ermaane:
— Tuut aych rete lose fom stroof woo iwich tas xlecht folek khomt!
41Fiile hon an Pheeter sayn mensaaj keklaapt un sin ketaaft kep. An tëm taach sin neekst tray tausent persoone inketrit an Yeesus sayn aanhënger krupe. 42Un al sin xtram am klaawe keplip, te aphostle sayn unterichte am noo keen, in kristliche liipe am leewe, es proot am teele un am peete.
Tas leewe fon te eyerxte kriste
43Ti aphostle hon fiile tsayche un wunere kemach, un tesweche waare ti kanse layt fol rexpekt. 44Al tii woo keklaapt hon waare paysamer un fereenicht un hon mit te anere ferteelt was se hate. 45Hon sayn aychentume ferkhaaft un aner tings un hon tas kelt ferteelt unich al, tëm noo yeete ëne sayn neetichkheet. 46Yeete taach, fereenicht, hon se sich fersamelt uf em hoof fom Thëmpel. Un in tëne iire hayser hon se es proot keteelt un mit echt frayt hon se yeete imst mit kehal. 47Hon Hërkot keloopt fer ales un waare fon al keeert. Un yeete taach hot te Hër pay te krupe keprung tii woo keret am kewe waare.
