Akte 1

₁Liipe Theoofilus,

Am eyerxte puch woo ich kexrip hon, hon ich ales fertseelt was Yeesus kemach hot un kelërnt hot, tsayt am aanfank ₂pis an te taach woo eyer noo em himel kenom kep is. Eep eyer noo em himel kang is, hot eyer ortnunge kep, torich em Hayliche Kayst, fer ti mëner woo eyer xon aus kesuucht kehat hot als aphostle. ₃Noo sayne toot, is Yeesus tëne tsum foerxayn khom uf fiile aarte, iwer fërtsich taache, tsayche am këwe, oone khee tswayfel, tas eyer leewent weyer. Ti aphostle hon Yeesus kesiin, un eyer hot mit tëne fertseelt iwer Hërkot sayne Raych. ₄Eene taach, wii eyer pay te aphostle waar, hot Yeesus tii ortnung kep:

— Playpt in Yeruusalëm un waart pis te Fater aych kept was eyer ferxproch hat, soo wii ich aych saat. ₅Wayl, Yohan hot wërklich mit waser ketaaft, awer in phaar taache kept teyer mit em Hayliche Kayst ketaaft.

₆Tëm noo, waare ti aphostle fersamelt mit Yeesus. Tan, hon se tëm kefroot:

— Is es yets tas teyer te Raych tsurik kept fer tas Israelite folek?

₇Yeesus hot keantwort:

— Es keet aych niks aan ti xtun ore te taach woo te Fater markeyert hot mit sayn aychne autoriteet. ₈Awer, wën te Hayliche Kayst iwer aych runer khomt, kriit teyer macht un wërt mayn tsayer in Yeruusalëm, in te kans Yutëya un Samariia un sokaar uf te wayteste plets fon te welt.

₉Wii eyer tas fërtich kesaat hat, is eyer foer tëne noo em himel kenom kep. Tan, hot en wolek iim ketekt, un tii khonte iim net mee siin. ₁₀Tii waare noch xtaar noo em himel am kuke soo lang wii Yeesus noo ruf am keen waar, wii tswaay mëner mit ways tsaych keklayt tsum foerxayn khom sin foer tëne ₁₁un saate:

— Mëner fon Kalilëya, warom sayt teyer too noo em himel am kuke? Tee Yeesus woo pay aych waar un is noo em himel kenom kep, khomt kraat soo tsurik wii teyer iim kesiin hot noo ruf keen.

₁₂Tan sin ti aphostle fom Oliiwe Përich runer kang un sin tsurik noo Yeruusalëm kang (te përich playpt unkefeyer een khilomeeter wayt fon te xtat). ₁₃Wii se an ti xtat khom sin, sin se pis an ti xtup kang woo se sayn lojii hate, woo uf em tswete xtok fom haus waar. Ti aphostle waare tii: Pheeter, Yohan, Tiaako, Antrëas, Filip, Thomas, Bartolomeu, Mateus, Tiaako, soon fon Alfeu, Simon, te natsionalist, un Yuutas, soon fon Tiaako. ₁₄Tii hon sich imer al mitsamer fersamelt fer se peete mit te fraae, Yeesus sayn mama un tëm sayn priiter.

₁₅Uf eene fon tëne taache, waare unkefeyer hunert tswansich fon Yeesus sayn aanhënger fersamelt. In tee fersamlung is Pheeter uf kextii un hot kesaat:

₁₆— Mayn priiter, must paseere tas was te Hayliche Kayst saat, torich Dawii, in te Hayliche Xrifte iwer Yuutas, woo te fiirer waar fon tëne woo Yeesus kefang hon. ₁₇Yuutas waar fon unser krupe un waar aus kesuucht fer teel nëme in unser aarwat.

₁₈Mit tëm kelt woo eyer fertiint hot mit sayne telikt, hot Yuutas en xtik lant khaaf. Uf tëm lant is Yuutas kefal un hot sich soo xweyer wee kemach, tas sayn tërem sich ferxtraut hon. ₁₉Ti kanse pewooner fon Yeruusalëm hon tas se wise kriit. Tesweche, hon se tëm plats te naame “Akeltama” kep, was “Pluut Khamp” petayte sol.

₂₀Un Pheeter saat wayter:

— Tas is was kexrip is im Salme Puch:

— Un saat noch:

_21-22— Also, meyer mise en anere fine fer tsu unser krupe keheere un mit uns tsayer sin fom Hër Yeesus sayn peleepung. Mus ëne fon tëne sin woo pay uns waar iwer ti tsayt woo te Hër Yeesus unich uns rom kang is, tsayt tas Yohan am taafe waar pis an te taach woo eyer tsum himel kenom kep is.

₂₃Un tswaay mëner sin presenteyert kep: Eene waar Yoosef, Barsabas kenënt, woo aach pekhant waar als Justus, un te anere waar Matias. ₂₄Tan hon se kepeet, am saan:

— Hër, tuu khënts tas hërts fon ale mënxe. Tsaych yets was fer tuu aus kesuucht host ₂₅fer mit uns se xafe als aphostel, wayl Yuutas tii aarwat in xtich kelos hot un is noo em plats kang woo eyer fertiint hot.

₂₆Tan hon se rauskexpiilt fer ëne fon te tswaay aus suuche. Te naame woo auskexpiilt kep is waar Matias, woo sich kesamelt hot mit em krupe fon te elef aphostle.