Timoteus keet mit Phaulus un Silas
1Phaulus is an ti xtet Dërbe un Listra aan khom, woo en krist, Timoteus kenënt, kewoont hot. Sayn mama waar krist fom yute folek kewees, awer sayne fater waar net fom yute folek. 2Ale kriste fon Listra un Ikoonio hon kuut kexproch fon Timoteus. 3Phaulus wolt em mit iim nëme, un tesweche hot eyer em pexnit, wayl ale yute woo in tee rechioon kewoont hon wuste tas tëm sayne fater net fom yute folek waar. 4Torich aler xtet woo se torich am keen waare, hon se ti reechle aan kesaat woo pextimpt kep waare fon te aphostle un ti eltre fon te khërich in Yeruusalëm un hon se kemaant tas se tëm noo tii reechle leewe solte. 5Soo sin ti khëriche xtërker kemach kep im klaawe un te numer fon kriste is imer mee kewakst.
Phaulus hat en wisioon in Troas
6Te Hayliche Kayst hot net kelos tas se ti mensaaj aan saate teere in te prowins Aasia, tan sin se torich ti rechioon fon Friijia un Kalatia kang. 7Wan se ticht an te tistrikt Miisia khom sin, hon se fersuucht noo te prowins Pitiinia keen, awer Yeesus sayne Kayst hot net kelos. 8Tan sin se torich Miisia kang un sin an te xtat Troate aan khom. 9In tee nacht hat Phaulus en wisioon kehat. Eyer hot en man fon te prowins Masetoonia kesiin, woo foer iim kextan hot un ferlangt: “Khom noo Masetoonia un helef uns!” 10Klaych noo tee wisioon, hon meyer resolweyert ap reese noo Masetoonia, wayl meyer waare sicher tas Hërkot uns keruuf hat fer te Ewankeelium aan saan fer tas folek fon tëm plats.
In Filipos: ti konwersioon fon Lydia
11Meyer sin in Troate uf en poot kextii un sin tirekt noo te insel Samotrase kefaar. Am neekste taach sin meyer an khom in Neapolis. 12Fon too sin meyer noo Filipos kang, woo en xtat is fom eyerxte tistrikt fon te prowins Masetoonia un aach en reemix kholonii, woo meyer phaar taache keplip sin. 13Am samstach sin meyer aus te xtat kang pis an te flus rant, wayl meyer ketënkt hon too weyer en plats fer ti yute se peete. Hon uns kesetst un hon aankefang se fertseele mit te fraae woo too fersamelt waare. 14Een fon tëne fraae woo uns aan am heere waare hot Lydia keheest. Sii waar fon te xtat Tiatira un hot purpur ferkhaaft. Tii hot Hërkot atoreyert, un te Hër hot tëm sayne sin uf kemach tas se ferxteen khont was Phaulus am saan waar. 15Tii un ti layt fon sayn haus sin ketaaft kep. Tëm noo hot Lydia uns in kelaat, am saan:
— Khomt un playpt in mayn haus, wën teyer tënkt tas ich wërklich an te Hër klaawe.
Soo hot se uns pexproch fer in sayn haus se playwe.
In te katee in Filipos
16Seliche taach, wan meyer uf tas plats fer se peete am keen waare, is uns sklaawe fraa inkeeche khom. Tii yung fraa waar tomineyert fon en xlechte kayst woo te futur keroot hat, un tëm meere sayn aychner hon fiil kelt kriit mit was ti feroote khont. 17Tas meere hot aankefang uns noo se keen, soo am xraaye:
— Tii mëner sin tiiner fom Heechste Hërkot un tuun aan saan wii teyer keret khënt kewe!
18Tii hot tas iwer fiile taache kemach. Tsum xlus hot Phaulus sich keayert, hot sich rom kewënt un hot fer te kayst keortnet:
— Torich ti macht fon Yeesus Kristus sayne naame, ich xike tas tuu aus tëm meere raus keest!
Un, im selwiche momënt, is te kayst raus kang. 19Wan ti aychner fon tëm meere kesiin hon tas se nime khonte kelt fertiine mit tëm sayn ferootunge, hon se Phaulus un Silas kekrif un pis an ti prase kexlept, foer ti autoriteete. 20Ti hon se fer ti reemixe autoriteete presenteyert un hon kesaat:
— Tii mëner sin yute un sin unruu am aanxtele in unser xtat. 21Sin kewoonheete am lërne woo keeche unser kesets sin. Meyer, woo reemix sin, khëne tii kewoonheete net aan nëme.
22Tan hot en kroos folek sich kesamelt fer Phaulus un Silas aach atakeere. Ti autoriteete hon kexikt tas se tëne sayn tsaych aus tsiye solte un mit ruute ferhau keepte. 23Noo tëm woo se fiil ferxlaa kep waare, hon ti autoriteete ti tswaay in ti katee kexmis un hon ortnung kep fer te wachter solt se mit sicherheet uf pase. 24Noo tee ortnung, hot te wachter tii inkexpërt in ti letst sele un hot tëne sayn fiis inkexlos in xweere hols ploke.
25Unkefeyer um halep nacht, waare Phaulus un Silas am peete un liite am singe fer Hërkot, un ti anere kefangne hon tas aan keheyert. 26Pletslich, hot ti eyert soo forx kexutert, tas te funtamënt fon te katee kexwankt hot. In tëm momënt sin ale tiire uf kang un ti khete sin ap kefal fon te kefangne. 27Tan is te wachter wach kep. Wan eyer kesiin hot tas es toer fon te katee uf waar, hot eyer ketënkt tas ti kefangne auskeris weere. Tan hot eyer ti xwaart ketsoo un wolt sich umpringe, 28awer Phaulus hot kans hart kexraayt:
— Mach tas net! Meyer sin al too!
29Tan hot te wachter ferlangt solte iim en licht pringe, is xnel in ti sel rin kang un hot sich kekniit, am tsitre, an Phaulus un Silas sayn fiis. 30Tan hot eyer ti tswaay raus kefiert un hot kefroot:
— Hëre, was mus ich mache fer keret se kewe?
31Tii hon keantwort:
— Klaap an te Hër Yeesus un tan kepst tuu keret — tuu un ti layt fon tayn haus.
32Tan hon se em Hër sayn wort fer tëm aan kesaat un fer ale layt fon sayn haus. 33In te selwich xtun nachts, hot te wachter se mit kenom, hot aankefang tii uf se pase, sayn weye am wexe. Klaych tëm noo sin ti kanse layt fon sayn haus ketaaft kep. 34Klaych tëm noo hot eyer Phaulus un Silas rin keruuf un hot tëne ese kep. Te wachter un ti layt fon sayn haus sin fol frayt kep wayl se yets an Hërkot am klaawe waare.
35Wan es taach kep is, hon ti reemixe autoriteete phaar polise kexikt mit tee ortnung fer te wachter: “Los ti mëner loos.” 36Tan hot te wachter fer Phaulus kesaat:
— Ti autoriteete hon kexikt aych loos lose. Khënt in ruu fort keen.
37Awer Phaulus saat fer ti polise:
— Ich un Silas sin reemixe layt un toch soo sin meyer ferhau kep oone julkeyert se kewe. Un tëm noo hon se uns in ti katee kexmis. Un yets wole se uns soo fort xike, in kehëmnis? Tas awer net! Tas ti aychne reemixe autoriteete heyer khome fer uns loos se lose!
38Ti polise sin tan fer ti autoriteete fertseele kang was Phaulus kesaat hat. Wan ti autoriteete se wise kriit hon tas Phaulus un Silas reemixe layt sin, hon se pang kriit 39un sin sich mit tëne unxultiche kang. Tan hon se se aus te katee kehool un hon ferlangt solte aus te xtat keen. 40Phaulus un Silas sin aus te katee khom un sin pay Liitia ins haus kang. Too hon se sich ketrof mit te priiter, hon se al animeyert un tëm noo sin se fort kang.
