In Tesaloonika
1Phaulus un Silas sin torich ti xtet Anfiipolis un Apoloonia kang un sin an Tesaloonika aan khom, woo en sinakook waar. 2Tëm noo sayn kewoonheet, is Phaulus tort hiin kang un an te tray neekste samstache hot eyer iwer ti Hayliche Xrifte kexproch mit te layt woo too in te sinakook waare. 3Phaulus hot tëne auskeleet un pewayst tas te Kristus layte mit mache must un tas, noo saynem toot, must eyer peleepe. Eyer saat:
— Tee Yeesus woo ich am aan saan sin fer aych is te Kristus.
4Phaulus un Silas khonte phaar fon tëne layt misioneere, woo sich mit tëne kesamelt hon. En kroose numer fon tëne woo khee yute waare un sich noo em yutentum kewënt hate un fiil importante fraae hon sich aach mit tëne kesamelt.
5Awer ti yute sin ayfersichtich kep. Tii sin phaar xlechte mëner ruufe kang unich tëne woo uf te xtroos rom sich ferhalt hon un hon en krupe formeyert. Tii hon en rutel aan kesaat in te xtat un hon Jason sayn haus iwerfal, noo Phaulus un Silas am suuche fer se unich es folek pringe. 6Awer, wii se se net kefun hon, hon se Jason mit kewalt kefang un noch phaar priiter pis pay ti autoriteete fon te xtat, am xraaye:
— Ti mëner hon unortnunge aan kesaat uf aler plets! Yets sin se heyer pis unser xtat khom, 7un Jason hot se uf kenom in sayn haus. Tii sin em reemixe Kayser sayn kesetse net am heere, un saan tas es en anere kheenich kept, Yeesus kenënt.
8Tas folek un ti autoriteete sin unruich kep wii se tii wërter keheyert hon. 9Un ti autoriteete hon Jason un ti anere loos kelos wii se ti kautsioon petsaalt hon woo ferlangt kep waar.
In Perëa
10Soo wii es nacht kep is, hon se Phaulus un Silas no te xtat Perëa kexikt. Wii se tort hiin khom sin, sin se an ti sinakook kang. 11Tii layt fon tëm plats hon se peser uf kenom wii tii fon Tesaloonika un hon ti mensaaj aan keheyert mit kroose interese. Yeete taach hon se ti Hayliche Xrifte xtuteyert fer se wise op was Phaulus am saan waar wërklich woer weyer. 12Soo, fiile fon te yute fon tëm plats hon keklaapt, un aach tii woo khee yute waare, soo tii raychstee fraae wii aach fiil mëner. 13Awer, wan ti yute fon Tesaloonika se wise kriit hon tas Phaulus em Hërkot sayn wort in Perëa aan kesaat hot, sin se pis tort hiin kang un hon aankefang unortnunge se mache un tas folek uf hetse keeche iine. 14Tan hon ti priiter klaych kexikt tas Phaulus noo em meer këngt; awer, Silas un Timoteo sin in Perëa keplip. 15Ti priiter woo Phaulus am xitse waare hon em pis an ti xtat Atenas kenom. Tëm noo sin se tsurik no Perëa, fer en oter fon Phaulus ap kewe; tee waar am ferlange tas Silas un Timoteo iim trefe kheemte in Atenas soo xnel wii meechlich.
Phaulus in Atenas
16Soo lang wii eyer Silas un Timoteo in Atenas am waarte waar, is Phaulus rewolteyert kep wii eyer ti xtat soo fol iitole kesiin hot. 17Tee is in ti sinakooke kang un hot kexproch mit te yute un mit tëne woo khee yute waare woo sich fer ti yute kemaynte inketreet hon. Un yeete taach, uf te prase, hot eyer fer ti layt woo too rom waare kexproch. 18Phaar epikuurixe leerer un phaar stoike hon mit tëm tiskutiert un hon tëm kefroot:
— Was wil te tum khop saan?
Anere hon kesaat:
— Siit aus tas eyer fon frëmte kote am xpreche is.
Tii hon tas kesaat wayl Phaulus Yeesus un ti peleepung am aan saan waar. 19Tan hon se em pis an te xtats konseel kenom un hon kesaat:
— Meyer wolte kërn wise was fer nay untericht tuu am pringe pist fer uns. 20Wayl tuu saast tings woo uns xpasich foer khomt, un meyer wolte kërn wise was tas se petayte hot.
21Wayl ti pewooner fon Atenas un ti frëmte woo too kewoont hon, hon kërn ti naychkheete aan keheyert un wayter fertseelt.
22Tan hot Phaulus sich uf kextelt foer tëne, uf te fersamlung fon te xtat konseel, un saat:
— Pewooner fon Atenas! Ich siin tas in aler tings teyer aarich relichioosix sayt. 23In te woerheet, ich waar torich ayer xtat am keen un mich ti plets pekukt woo teyer ayre kote aanpeete tuut un hon en altar kefun woo kexrip is: “Fer te unpekhante Kot”. Te Kot woo teyer eere tuut oone se khëne is kraat tee woo ich aych aan saan khom sin.
24— Kot, woo ti welt kemach hot un ales was in tëm eksisteyert, is te Hër fom himel un fon te eyert un woont net in thëmple fon mënxe uf kepaut. 25Te prauch net ketiint kewe fon te layt wayl eyer prauch yoo kaar niks, wayl es is eyer selepst woo fer al es leewe kept un ales was mer prayche. 26Fon eene eensichste mënx hot eyer ti mënxheet ketsoo fer uf te eyert se leewe. Eep eyer ti foleke ketsoo hot, hot Hërkot plets markeyert woo yeete folek leewe teet un wii lang se too playwe teere. 27Tee hot tas kemach tas al iim uf suuche khënt un filaaycht iim fine, wën eyer ach net wayt wech fon yeete ëne fon uns is. 28Wayl, wii yemant saat: “In iim leewe meyer, peweeche mer uns un eksisteere.” Un phaar fon ayre poëte saate: “Meyer sin aach tëm sayn khiner.” 29Un, wën meyer tëm sayn khiner sin, tërfe meyer net tënke tas Hërkot eenlich is mit en iitol fon kolt, fon silwer ore xteen, kemach torich ti khunst un kexiklichkheet fon te mënxe. 30In te ferkangne tsayt, hot Hërkot sich net kekhimert tas ti layt iim net kekhënt hon. Awer, yets xikt eyer tas yeete mënx, uf ale plets, sich roye tuut fon sayn sinte. 31Wayl eyer hot en taach markeyert woo eyer ti kans welt julkeere tuut mit justis, torich en man woo eyer aus kesuucht hot. Un hot proope fon tas ales kep wii eyer tee man witer peleept hot.
32Wii se keheyert hon Phaulus iwer ti peleepung xpreche, hon phaar em ferxpot, awer anere saate:
— Aner mool wole mer tich heere iwer tas se xpreche.
33Tan is Phaulus fon too fort kang. 34Awer phaar layt hon an em keklaapt un hon sich mit tëm fersamelt. Unich tëne waar Tioniisius, woo mitkliiter waar fom xtats konseel, en fraa Tamaris kenënt un noch anere layt.
