1Fom Elter fer te liipe Kayo, weyer ich wërklich liipe.
Loop fer Kayus
2Mayne liipe froynt, ich peete imer tas ales kuut keet mit tich un tas tuu mit kuut kesuuntheet pist, soo wii tuu kaystlich kuut traan pist. 3Ich sin kans froo kep wan phaar priiter aan khom sin un mich fertseelt hon wii leaal tuu pist tsu te woerheet un wii tuu imer in te woerheet leewe tuust. 4Niks tuut mich mee fraye wii se heere kriin tas mayn khiner leewe tëm noo ti woerheet.
5Mayne liipe froynt, tuu pist leaal keplip an was tuu fer ti priiter machst, wën se aach fon frëmte kemaynte khome. 6Tii sin am xpreche fer hier ti khërich iwer tayne liipe. Ich pite, helef tii layt sayn rees wayter mache wii es Hërkot kefale tuut. 7Wayl ti hon sayn rees aankefang in te aarwat fer Kristus oone khee hilef aan nëme fon te pakaane. 8Tesweche mise meyer, ti kriste, ti layt helfe, wayl soo wëre mer khëne teel nëme in tëne sayn aarwat fer ti woerheet aan saan.
Kontenatsioon fon Tiotrefes um loop fer Temëtrius
9Ich hon en kleene priif kexrip fer ti khërich, awer Tiotrefes, woo te fiirer sin wil, wil khee acht kewe fer was ich saat. 10Also, wan ich too aan khome, tuun ich tëm ti acht aan ruufe iwer ales was er am mache is: tas hesliche tings woo er fon uns xpreche tuut un ti liye woo er fertseelt. Awer, te kept net tsufriite ploos in tas se mache; wayl, wan ti priiter too aan khome, tuut er se net uf nëme. Un, wën yemant se uf nëme wil, lost eyer net un tuut se sokaar fort yaae fon te khërich!
11Kayo, mayne liipe froynt, mach noo was kuut is un net was xlecht is. Weyer es kuutes tuut, keheyert tsu Hërkot, un weyer tas xlechtes tuut hot Hërkot nii kesiin.
12Ale layt xpreche kuut fon Temëtrius un ti aychne woerheet xprecht kuut fon tëm. Meyer tuun aach kuut xpreche fon tëm, un tuu weest tas was meyer saan ti woerheet is.
Apxlus wërter
13Ich hon noch fiil tings fer tich se fertseele, awer tas wil ich net torich priif mache. 14Ich hofe tich in khorts tsayt se siin kriin, tan tuun mer perseenlich fertseele.
15Tas te friite mit tich sich ferhalt! Tayn froynte xike pekriisung. Kep pekriisunge, perseenlich, fer yeete ëne fon unser froynte.
