Pekriisung
1Ich, Yuutas, tiiner fon Yeesus Kristus un pruuter fon Tiaako, xraywe tee priif fer tii woo keruuf kep sin, was mënt, tii woo Hërkot, te Fater, liipe tuut un tii woo Yeesus Kristus xitse tuut.
2Tas teyer mee un mee ti paarmhërtsichkheet het, te friite un Hërkot sayne liipe!
Ti falxe mayster
3Mayn liipe froynte, ich waar am mache ales was meechlich is fer se xraywe fer aych iwer ti retung woo meyer kemaynsaam hon. Tan, hon ich kemënt weyer neetich yets xraywe fer aych koraaj kewe fer se khëmfe fer te klaawe woo Hërkot fer sayn folek kep hot een mool fer imer. 4Wayl phaar mëner woo net an Hërkot klaawe sin unich unser layt rin kexlich khom oone kemërekt kewe. Tii tuun ti petaytung fon te mensaaj iwich unser Hërkot sayne knaate ferënere fer en ausreet fine fer sayn aychne imoral leewe. Un tuun aach Yeesus Kristus, unser eensichste Mayster un Hër, ap xtoose. Xon lang tsayt tas ti Hayliche Xrifte aan kep hon ti kontenatsioon woo se xon kriit hon.
5Wën teyer aach tas alles wist, wil ich aych erinere tas te Hër tas folek fon Israël fom Ejipt lant keret hot, awer tëm noo hot eyer fernicht tii woo net keklaapt hon. 6Tënkt an ti ëngle woo net in te limite fon sayn aychne autoriteet keplip sin, awer hon tas plats woo se kewoont hon hinerlos. 7Tënkt an ti pewooner fon Sotooma, Komora un nachpaar xtet, woo kehantelt hon wii tii ëngle un imoraliteet un seksuale sinte kemach hon. Tii hon te xtroof fom eewiche fayer kriit, was en klaare aan saat fer ale layt is.
8Kraat soo hon ti mëner wisioone woo se sinte mache keeche sayne aychne khërwer. Wole niks wise fon Hërkot sayn autoriteet un insulteere ti klorioose himlixe kriatuure. 9Net mool te Ërtsëngel Michael hot tas kemach. In te tiskusioon woo eyer mit em Taywel hat, fer se wise weyer Mooses sayne khërwer pehale teet, hot Michael khee koraaj fer te Taywel se konteneere mit xlechte wërter, awer saat noore: “Tas te Hër tich xteere tuut!” 10Awer tii mëner xëne was se net ferxteen. Un tas tings woo se khëne torich instinkt, wii tas wilte fii, sin kraat tii woo se fernichte. 11Ay fon tëne! Keen te selwiche weech fon Kaym noo. Weche em kelt, tuun tii sich ap kewe fer te selwiche sinte wii Balaon. Un, wii Koraa sich rewolteyert hat un fernicht kep is, tuun tii sich aach rewolteere un wëre fernicht. 12Mit sayn ximpliche saufe, sin se wii trek fleke an te es tixe fon te froynte woo teyer aych fersamelt. Ti tuun noore uf sich selepst uf pase. Sin wii wolke woo te wint wayter ploost, woo khee reen pringe; sin wii peem woo, net mool in te hërpst, khee fruchte protutseere; sin wii peem woo mit te wortsle aus keropt kep sin un sin kans kaput. 13Tii sin wii ti peese wele fom meer, noo ruf am xmayse te xaum fon sayn ximpliche aktsione; sin wii xtërne woo net hon woo hiin, fer weem Hërkot en plats in te tiif tunkelheet uf kehoop hot fer imer. 14Es waar Enok, fon te sipt jeneratsioon noo Aatam, weyer lang tsayt tsurik profetiseyert hat iwer tii: “Kukt! Te Hër khomt mit fiil tausente fon sayn ëngle 15fer al se julkeere. Eyer khomt fer konteneere al tii woo niks wise wole fon Hërkot, weche ale xlechte aktsioone woo se kemach hon un weche ale xrekliche wërter woo tii sinter woo net klaawe keeche Hërkot aus kexproch hon.”
16Tii mëner sin imer am krumle un ti xult fer anere am kewe. Tii keen sayn aychne xlechte wile noo, tuun sich praale un ti anere xmaychle wayl se imer interes an etwas hon.
Aan ruufe un konseele
17Awer teyer, mayn froynte, tënkt an was ti aphostle fon unser Hër Yeesus Kristus profetiseyert hon. 18Tii hon fer aych kesaat: “Wan ti letste tsayte khome, khome layt woo fon aych xpote, layt woo niks wise wole fon Hërkot un keen sayn aychne wile noo.” 19Sin tii layt woo xpalunge foer pringe, wayl se tomineyert sin fon sayn naturale wile un hon net em Hërkot sayne Kayst.
20Awer teyer, mayn froynte, macht wayter im foran kang in ayre klaawe, woo te haylichste klaawe is woo es kept. Tuut peete, kefiert fom Hayliche Kayst. 21Un tuut wayter im Hërkots liipe leewe, am hofe tas unser Hër Yeesus Kristus, in sayn paarmhërtsichkheet, aych es eewiche leewe kewe sol.
22Sayt paarhmhërtsich mit tëne woo tswayfle hon, 23tuut anere rete, iine aus em fayer am hoole; un mit anere tsaycht paarmhërtsichkheet mit pang, sokaar tëne sayn tsaych am hase, woo peflekt sin fon sayn sintiche wile.
Loop Kepeet
24Hërkot khan aych xitse fom fale un khan aych presenteere oone feeler un fol frayt in sayn klorioos presëns. 25Torich Yeesus Kristus, unser Hër, wole mer te eensichste Hërkot loope, unser Reter, tsu weem ale kloor, ti majesteet, ti macht un ti autoriteet, tsayt ale tsayte, yets un fer imer! Aamen!
