2Yohan 1

₁Fom Elter fer ti liip Fraa un sayn khiner, weem ich wërklich liipe. Net ploos ich, awer al tii woo ti woerheet khëne liipe aych. ₂Meyer liipe aych weche te woerheet woo in uns is, un woo in uns plaype wërt fer imer.

₃Tas ti knaate, ti paarmhërtsichkheet un te friite fon Hërkot un fon Yeesus Kristus, sayne Soon, pay uns sich ferhalt in woerheet un liipe!

₄Ich sin aarich froo kep wii ich se wise kriit hon tas phaar fon ayre khiner tëm noo ti woerheet leewe, wii te Fater uns kexikt hot leewe. ₅Un yets, liip Fraa, ferlange ich aych tas meyer uns al liipe. Ich kewe aych khee naye kepoot, awer te selwiche woo mer hate tsayt am aanfang. ₆Tee liipe petayt tas: leewe tëm noo Hërkot sayn kepoote. Wii teyer keheyert hot tsayt am aanfang, te kepoot is tee: tuut wayter ëne em anere liipe.

₇Fiile liyer hon sich um ti welt rom ferxtraut, am saan tas Yeesus Kristus net khom is als en mënx. Weyer tas macht tuut ti layt hinerkeen un is faynt fon Kristus ₈Phast uf mit aych selepst tas unser aarwat woo mer xon kemach hon net ferloer keet, awer ti komplët peloonung kriit.

₉Weyer net Kristus sayn untericht pehalt, awer was aneres lërnt, hot net Kot. Awer weyer mit was Kristus kelërnt hot playpt, tee hot soo fiil te Fater wii te Soon. ₁₀Wën yemant pis aych khomt un net pringt was Kristus kelërnt hot, tuut tee persoon net uf nëme in ayer haus, net mool tëm saan: “Tas te friite mit aych sich ferhalt!” ₁₁Wayl weyer friite winxe tuut fer tee persoon is sayne khameraate im xlechte woo tee mache tuut.

₁₂Ich hon noch fiil tings fer aych se saan, awer wil tas net torich priif mache. Wayl ich hofe aych pesuuche un perseenlich mit aych xpreche, tas soo unser frayt komplët sin khan.

₁₃Ti khiner fon tayn liip xwester xike pekriisunge.