Tas kewine iwer ti welt
1Al tii woo klaawe tas Yeesus te Kristus is, sin Hërkot sayn khiner. Un weyer en fater liipt tuut aach ti khiner fon tëm fater liipe. 2Meyer wise tas mer Hërkot sayn khiner liipe wan mer Hërkot liipe un sayn kepoote noo keen. 3Wayl Hërkot liipe is sayn kepoote noo keen. Un tëm sayn kepoote sin net xweyer fer noo se keen. 4Wayl yeete Hërkots sayn khint khan ti welt ap kewine. Soo, mit unsere klaawe khëne meyer ti welt ap kewine. 5Weyer khan ti welt ap kewine? Ploos tee woo klaawe tuut tas Yeesus Hërkot sayne Soon is.
Te tsayer iwer Yeesus Kristus
6Yeesus Kristus is tee woo khom is mit em waser fon sayne taaf um mit em pluut fon sayne toot. Eyer is khom mit em waser un mit em pluut un net ploos mit em waser. Un te aychne Hayliche Kayst is tsayer tas es woer is, wayl te Kayst is ti woerheet. 7Es kept tray tsayer: 8te Kayst, tas waser un tas pluut; un ti tray hale fol samer. 9Meyer nëme mënxe sayne tsayer aan, awer Hërkot sayne tsayer hot mee weyert. Un tas is te tsayer woo Hërkot kep hot iwer sayne Soon. 10Tee woo an Hërkot sayne Soon klaawe tuut hot tee tsayer in sayn aychne hërts. Awer, weyer net klaawe tuut, macht fon Hërkot en liichner, wayl klaapt net an te tsayer woo Hërkot kep hot iwer sayne Soon. 11Un tas is te tsayer: Hërkot hot uns tas eewiche leewe kep, un tas leewe is unser torich sayne Soon. 12Weyer te Soon hot, hot tas leewe; weyer net Hërkot sayne Soon hot hot khee leewe.
Sicherheet fom eewiche leewe
13Ich xraywe tas tings fer aych woo an Hërkot sayne Soon klaawe tuut, tas teyer se wise kriit tas teyer es eewiche leewe het. 14Wën mer in Hërkot sayn presëns sin, hon mer koraaj wayl, wën mer etwas ferlange tëm noo Hërkot sayne wile, sin mer sicher tas eyer uns aan heere tuut. 15Soo wise mer tas eyer uns aan heere tuut wën mer etwas tëm ferlange. Un, wii mer wees tas es woer is, wise mer aach tas eyer uns kept was mer tëm ferlange.
16Wën yemant siit sayne pruuter en sinte mache woo khee toot pringt, mus tee fer Hërkot peete, un eyer wërt leewe kewe fer tee persoon. Tas im fal fon sinte woo khee toot pringe. Awer, es kept sinte woo te toot pringe, un ich saan net tas teyer peete tuut iwer tee sinte. 17Ale unkerechtichkheet is en sinte; awer, es kept sinte woo net te toot pringe.
18Meyer wise tas Hërkot sayn khiner net wayter sinte mache, wayl te Soon fon Hërkot se xitse tuut, un te Taywel khan net an se thupe.
19Meyer wise tas mer tsu Hërkot keheere un tas ti welt unich te macht fom Taywel is.
20Meyer wise aach tas em Hërkot sayne Soon xon khom is un hot uns ferxtantnis kep fer te echte Hërkot khëne. Unser leewe is fereenicht mit em echte Hërkot, fereenicht mit sayne Soon, Yeesus Kristus. Tas is te echte Hërkot, un tas is es eewiche leewe.
21Mayn khinercher, past uf mit te falxe kote!
