1Yohan 4

₁Mayn liipe froynte, klaapt net an al tii woo saan tas se Hërkot sayne Kayst hon. Tuut ti layt in proop xtele fer se wise op te kayst woo se hon wërklich fon Hërkot khomt; wayl fiil falxe profëte hon sich xon ferxtraut uf ale plets. ₂Is soo tas teyer wise khënt op, in te woerheet, te kayst fon Hërkot is: weyer fersichert tas Yeesus Kristus als mënx khom is hot te Kayst woo fon Hërkot khomt. ₃Awer, weyer tas ap saat iwich Yeesus hot net Hërkot sayne Kayst; was tee hot is te kayst fom Faynt fon Kristus. Teyer het keheyert saan tas tee kayst khome teet, un yets is tee xon uf te welt.

₄Mayn khinercher, teyer sayt fon Hërkot un het ti falxe profëte ap kewun. Wayl te Kayst woo in aych is xtërker is wii te kayst woo in tëne is woo tsu tee welt keheere. ₅Tii xpreche fom tings fon te welt, un ti welt tuut se aan heere wayl se tsu tii welt keheere. ₆Awer meyer keheere tsu Hërkot. Weyer Hërkot khënt heyert uns, awer weyer net tsu Hërkot keheyert heyert uns net. Soo is es, tan, tas mer te unerxiit wise khëne tswixe te Kayst fon te woerheet un fon te kayst fom ferkheyertes.

₇Liipe froynte, liipt ëne em anere wayl te liipe khomt fon Hërkot. Weyer liipt is Hërkot sayn khint un tuut Hërkot khëne. ₈Weyer net liipt khënt iim net, wayl Hërkot is liipe. ₉Es waar soo tas Hërkot sayne liipe uf uns ketsaycht hot: eyer hot sayne eensichste Soon uf ti welt kexikt tas meyer leewe khënte hon torich tëm. ₁₀Un te liipe is tas: es waare net meyer woo Hërkot keliipt hon, awer es waar tee woo uns keliipt hot un hot sayne Soon kexikt tas, torich tëm, unser sinte fertsayert keepte.

₁₁Froynte, wën es soo waar tas Hërkot uns keliipt hot, tan mise meyer ëne em aneree liipe. ₁₂Nii hot yemant Hërkot kesiin. Wën meyer ëne em anere liipe, tuut Hërkot in uns leewe, un sayne liipe tuut unser hërts kans file. ₁₃Ti uersach warom meyer khëne sicher sin tas mer fereenicht leewe mit Hërkot un tas eyer in uns leept is tii: eyer hot uns sayne Kayst kep. ₁₄Un meyer hon kesiin un hon aan kesaat fer ti anere tas te Fater te Soon kexikt hot fer te Reter sin fon te welt. ₁₅Yeete woo fersichere tuut tas Yeesus Hërkot sayne Soon is, Hërkot tuut in tëm leewe, un tee leept fereenicht mit Hërkot. ₁₆Un meyer selwer khëne te liipe woo Hërkot uf uns hot un klaawe an tëm liipe.

Hërkot is liipe. Tee woo in liipe leewe tuut, leept fereenicht mit Hërkot, un Hërkot leept in tëm. ₁₇Soo, is te liipe in uns kans echt, tas mer koraaj khëne hon am Kericht Taach, wayl unser leewe uf tee welt is wii Kristus sayn leewe. ₁₈Im liipe is khee pang; te liipe woo kans echt is tuut te pang wech trike. Also, tee woo pang hat hot net te kanse echte liipe in sayn hërts, wayl te pang tsaycht tas es xtroof kept.

₁₉Meyer liipe wayl Hërkot uns te eyerxt keliipt hot. ₂₀Wën yemant saat: “Ich liipe Hërkot”, awer hast sayne pruuter, is en liichner. Wayl nimant khan Hërkot liipe, woo er net siin khan, wën eyer net sayne pruuter liipe tuut, woo eyer siit. ₂₁Te kepoote woo Kristus uns kep hot is tee: weyer Hërkot liipe tuut, sol aach sayne pruuter liipe.