1Kukt mool wii kroos is em Fater sayne liipe uf uns! Sayne liipe is soo kroos, tas mer khiner fon Hërkot kenënt kewe un sin, wërklich, sayn khiner. Is tesweche woo ti welt uns net khënt, wayl hot net te Hërkot kekhënt. 2Mayn froynte, yets sin meyer Hërkot sayn khiner, awer wise noch net was meyer sin wëre. Awer, meyer wise tas: wën Yeesus tsum foerxayn khome tuut, kewe meyer eenlich mit tëm, wayl meyer tan siin wii tee wërklich is. 3Un yeete ëne woo tii hofnung in Kristus hat, tuut sich selwer purifikeere, soo wii Kristus aach phuer is.
4Weyer sinte macht is xultner in Hërkot sayn kesetse preche, wayl te sint is ti kesets ferprechung. 5Teyer wist xon tas Kristus khom is fer ti sinte wech hoole, un tas Kristus khee ëne sint hot. 6Soo, weyer fereenicht mit Kristus leept tuut net wayter sinte mache. Awer weyer wayter sinte macht hot em nii kesiin un hot em net kekhënt.
7Mayn khinercher, lost nimant aych hinerkeen. Tee woo macht was richtich is, is richtich, soo wii Kristus khorekt is. 8Weyer wayter sinte macht keheyert tsum Taywel, wayl te Taywel macht sinte tsayt ti kriatsioon fon te welt. Un Hërkot sayne Soon is khom fer tas: fer se fernichte was te Taywel kemach hot.
9Weyer Hërkot sayne soon is tuut net wayter sinte mache, wayl tas leewe woo Hërkot kept playpt wayter in tëm persoon. Un tii khan net wayter sinte mache, wayl Hërkot sayne Fater is. 10Ti klaar unerxiit woo es kept tswixe Hërkot sayn khiner un em Taywel sayn khiner is tii: weyer net macht was richtich is ore net sayne pruuter liipt is net Hërkot sayne soon.
Liipt ëne te anere
11Ti mensaaj woo teyer keheyert het tsayt am aanfang is tii: tas meyer uns liipe sole ëne em anere. 12Meyer tërfe net sin wii Kaym, woo tsum Taywel keheyert hot un hot sayne aychne pruuter umkeprung. Un warom hot eyer em umkeprung? Wayl was Kaym am mache waar xlecht waar, un was sayne pruuter am mache waar kuut waar.
13Mayn priiter, praycht aych net ferwunere tas ti layt fon te welt aych hase. 14Meyer wise tas mer xon fom toot tsum leewe khom sin un wise tas wayl meyer unser kexwister liipe. Weyer net liipt is imer noch toot. 15En pruuter hase is tas selwiche wii em umpringe, un teyer wist tas weyer anere layt umpringt hot net tas eewiche leewe in sich. 16Meyer wise was te liipe is weche tas: Kristus hot sayn leewe kep weche uns. Tesweche, mise meyer aach unser leewe kewe weche unser priiter. 17Wën yemant raych is un siit sayne pruuter neetichkheete am mit mache, awer tee net mit helfe, wii khan eyer fersichere tas eyer, wërklich, Hërkot liipe tuut? 18Mayn khinercher, unsere liipe tëref net ploos fon wërter un kexpreech sin. Mus en echte liipe sin, woo mer wayse tuut torich aktsioone.
Koraaj foer Hërkot
19Soo is es, tan, tas mer se wise kriin tas mer tsu Hërkot sayn woerheet keheere un tas unser hërts sich in sicherheet fiilt in tëm sayn presëns. 20Wayl, wën unser hërts uns konteneyert, wise mer tas Hërkot kreeser is wii unser hërts un ales khënt. 21Soo, mayn liipe froynte, wën unser hërts uns net konteneyert, hon mer koraaj foer Hërkot. 22Meyer kriin fon tëm ales was mer ferlange wayl meyer tëm sayn kepoote aan heere un mache ales was tëm kefale tuut. 23Un was eyer xikt is tas: tas mer an sayne Soon, Yeesus Kristus, klaawe un tas mer ëne te anere liipe, wii Kristus uns kexikt hot mache. 24Weyer Hërkot sayn kepoote noo keet leept in eenichkheet mit Hërkot, un Hërkot leept in eenichkheet mit tëm. Un, weche em Hayliche Kayst woo eyer uns kep hot, wise mer tas Hërkot in uns leewe tuut.
