1Yohan 2

₁Mayn khiner, ich xraywe tas fer aych tas teyer khee sinte macht. Awer, wën yemant sinte macht, hon mer Yeesus Kristus, woo macht was richtich is; eyer tuut uns tefenteere foer Hërkot. ₂Is torich te aychne Yeesus Kristus woo unser sinte fertsayert kewe. Un net noore unsere, awer aach ti sinte fon te kans welt.

₃Wën mer Hërkot sayn kepoote noo keen, tan sin mer sicher tas mer iim khëne. ₄Wën yemant saat: “Ich khëne Hërkot”, awer keet net sayn kepoote noo, tas is en liichner un is khee woerheet an tëm. ₅Awer, wën mer Hërkot sayn kepoote noo keen, wise mer tas mer Hërkot liipe mit unser kans hërts. Is soo tas meyer sicher khëne sin tas mer fereenicht mit Hërkot sin. ₆Weyer saat tas er fereenicht mit Hërkot leept, mus leewe wii Yeesus Kristus keleept hot.

₇Mayn liipe froynte, tee kepoot woo ich aych am kewe sin is net nay. Is te alte kepoot, tee woo teyer tort am aanfang kriit hat. Te alte kepoot is ti mensaaj woo teyer xon keheyert hat. ₈Awer, te kepoot woo ich aych am kewe sin is nay wayl sayn woerheet kept kesiin an Kristus un aach an aych. Wayl ti tunkelheet keet xon rom, un tas echte licht is xon am xayne.

₉Weyer saat teet im licht leewe un tuut sayne pruuter hase is in te tunkelheet pis yets. ₁₀Weyer sayne pruuter liipt leept im licht, un kept niks an tëm mënx woo yemant in sinte fale macht. ₁₁Awer, weyer sayne pruuter hast is in te tunkelheet, keet too trin un wees net woo er am hiin keen is, wayl ti tunkelheet lost tee mënx net siin.

₁₅Liipt net ti welt, net mool tas tings woo uf te welt is. Wën teyer ti welt liipt, tuut teyer net Hërkot, te Fater, liipe. ₁₆Niks was fon tee welt is khomt fom Fater. Ti xlechte wunxe fon te mënxlich natuer, ti lust fer se hon was te aue kefale tuut un te xtols iwer es tings fom leewe, tas ales khomt net fom Fater, awer fon te welt. ₁₇Un ti welt keet rom, mit ales was ti mënxe pekeere; awer tee woo Hërkot sayne wile tuut leept fer imer.

₁₈Mayn khiner, te ën is ticht. Teyer hat keheyert saan tas Kristus sayne faynt khomt. Also, yets sin xon fiile faynte fon Kristus tsum foerxayn khom un, tesweche, wise mer tas te ën am khome is. ₁₉In te woerheet, ti persoone hon uns kelos wayl se net fon unser krupe waare. Wën se fon unser krupe weere, weere se mit uns keplip. Awer ti hon uns kelos tas es kans klaar se siin weyer tas nimant fon tëne tsu unser krupe keheere teet.

₂₀Awer, iwer aych hot Kristus te Hayliche Kayst kexut un, tesweche, khënt teyer al ti woerheet. ₂₁Soo, xraywe ich aych, awer is net wayl teyer net ti woerheet khënt. Im keeche teel, is wayl teyer se khënt un wist tas nii khee een lii fon te woerheet khomt.

₂₂Tan, weyer is te liichner? Is tee woo saat tas Yeesus net te Kristus is. Weyer tas saat is te faynt fon Kristus; tee tuut ap saan soo fiil te Fater wii te Soon. ₂₃Wayl weyer te Soon ap saat, tuut aach te Fater ap saan; un weyer te Soon aan nëme tuut hot aach te Fater.

₂₄Tesweche, tuut ti mensaaj woo teyer keheyert hat tsayt am aanfang uf heepe im hërts. Wën tas woo teyer tsayt am aanfang keheyert hot in ayer hërts playpt, tan wërt teyer fereenicht leewe mit em Soon un mit em Fater. ₂₅Un was te aychne Kristus ferxproch hot se kewe fer uns al waar tas: tas eewiche leewe.

₂₆Ich sin tas am xraywe fer aych iwich tii woo am fersuuche sin aych hinerkeen. ₂₇Awer Yeesus hat sayne Kayst iwert aych ferxut. Soo lang wii tëm sayne Kayst in aych playpt, is es net neetich tas nimant aych lërne tuut. Wayl te Kayst tuut lërne iwer ales, un sayn unterichte sin net falx, awer ti woerheet. Also, tuut aan heere ti unterichte fom Kayst un playpt wayter fereenicht mit Kristus.

₂₈Yoo, mayn khiner, playpt wayter fereenicht mit Kristus, tas mer khëne fol koraaj sin am taach woo eyer khome tuut. Soo prayche mer uns net xeeme un uns ferxtekle fon tëm an tëm taach. ₂₉Teyer weest tas Kristus imer kemach hot was richtich is. Tesweche, mist teyer aach wise tas weyer macht was richtich is, is Hërkots soon.