1Yohan 1

₁Meyer sin am xraywe fer aych iwich tas Wort fom leewe, woo eksisteyert hot tsayt ti kriatsioon fon te welt. Meyer hon tas Wort keheyert un mit unsere aychne aue hon meyer se kesiin. Meyer hon tas Wort kesiin un mit unser hënt traan kefaar. ₂Wan tas leewe tsum foerxayn khom is, hon meyer tas kesiin. Un tesweche xpreche meyer tefon un tuun tas aan saan fer aych. Meyer xpreche fon tas eewiche leewe woo mit em Fater waar un fer uns reweleyert kep is. ₃Meyer fertseele fer aych was meyer kesiin un keheyert hon tas teyer teel nëme tuut mit uns, soo wii meyer fereenicht sin mit em Fater un mit Yeesus Kristus, sayne Soon. ₄Meyer xraywe tas tas unser frayt komplët sin khan.

₅Ti mensaaj woo Kristus uns kep hot un woo meyer fer aych aan kesaat hon is tii: Hërkot is licht, un is khee ën tunkelheet an tëm. ₆Soo, wën meyer saan tas mer komunioon mit Hërkot hon un in te selwich tsayt in te tunkelheet leewe, tan sin meyer am liye mit wërter un aktsioone. ₇Awer, wën meyer im licht am leewe sin, tan sin meyer in komunioon ëne mit te anere, un tas pluut fon Yeesus, sayne Soon, macht uns sauwer fon ale sinte.

₈Wën meyer saan tas mer khee sinte hon, sin meyer uns am hinerkeen, un is khee woerheet in uns. ₉Awer, wën meyer unser sinte fer Hërkot pekhant mache, tuut eyer sayn ferxprechung in hale un macht was richtich is: tuut unser sinte fertsaye un uns sauwer mache fon ale unkerechtichkheet. ₁₀Wën meyer saan tas mer khee sinte kemach hon, mache meyer fon Hërkot en liyer, un sayn mensaaj is net in uns.