Em Hër sayne Taach
1Mayn liipe froynte, tas is te tswete priif woo ich fer aych am xraywe sin. In tëne tswaay priife, fersuuche ich phuure ketanke in ayre sin erwache, am mache tas teyer tas tings erinere tuut. 2Ich wil hon tas teyer traan tënke tuut an ti wërter woo kesaat kep waare torich ti hayliche profëte fiil tsayt tsurik un am kepoote fon unser Hër un Reter woo fer aych kep waar torich ti aphostle woo te ewankeelium fer aych aan kesaat hon. 3Te eyerxt mist teyer wise tas an te letste taache mëner tsum foerxayn khome tuun tomineyert fon sayn aychne pasioone. Tii tuun aych ferxpote, 4am saan: “Eyer hot ferxproch teet khome, waars net? Woo is eyer? Unser eltre sin kextorep, un ales layt noch wii es imer waar tsayt ti welt ketsoo kep waar.” 5Tii xpoter ferkese, fer kërn, tas xon lang tsayt tsurik Hërkot en ortnung kep hat, un te himel un ti eyert ketsoo kep waare. Hon ferkes tas ti eyert formeyert kep waar fom waser un im mite waser 6un aach tas torich em waser fom Sintflut ti friirix welt fernicht kep waar. 7Awer te himel un ti eyert woo yets eksisteere sin am uf kehoop kewe in tee selwich ortnung woo Hërkot kep hat, fer fernicht kewe torich fayer. Sin am uf kehoop kewe fer te Kericht Taach un fon te fernichtung fon tëne woo niks fon Hërkot wise wole.
8Mayn liipe froynte, ferkest net tas: fer te Hër is eene taach wii tausent yoore, un tausent yoore sin wii eene taach. 9Te Hër tuut net lang taure fer se mache was eyer ferxproch hat, wii maniche tënke. Kraat es keeche teel, tee hot ketult mit aych wayl eyer wil hon tas nimant fernicht kept, awer wil hon tas se al sich royere tuun fon sayn sinte. 10Awer, em Hër sayne Taach wil khome wii en xpits puup. An tëm taach tuut te himel ferxwine mit en wunerliche ratau, un ales was im Uniwërs is kept ferprënt. Ti eyert un ales was too eksisteyert tuut ferxwine.
Te aan khom fom Hërkot sayne Taach am waarte
11Am wise tas es ales soo fernicht kept, tan was fer sort mënxe mist teyer sin? Ayer leewe mus Hërkot kefale un fer iim hiin keopfert kewe. 12Waart te aan khom fom Hërkot sayne Taach un macht was meechlich is tas tee klaych khome tuut. In tëm taach kept te himel fernicht mit fayer, un ales was im Uniwërs is tuut ferxmelse. 13Awer Hërkot hot ferxproch, un meyer sin am waarte en naye himel un en nay eyert, woo ales kemach kept tëm noo mit iim sayne wile.
14Tesweche, mayn froynte, soo lang wii teyer tee taach waarte tuut, macht was meechlich is fer in friite sin mit Hërkot, oone fleke un oone xult foer iim. 15Tënkt tas unser Hër sayn ketult en keleechenheet is tas teyer keret kewe khënt. Wayl unser liipe pruuter Phaulus, mit te wisheet woo Hërkot iim kep hot, hot fer aych kexrip iwer tee phunkt. 16Un es waar kraat tas woo er kesaat hat in al sayn priife wan eyer too triwer kexrip hot. In tëm sayn priife sin phaar tinger woo xweyer se ferxteen sin, woo ti unferxtëniche un ti xwache im klaawe ferkheyert ausleye tuun, soo wii se mache mit anere teele fon te Hayliche Xrifte. Un soo tuun se sayn aychne fernichtung pay pringe.
17Awer, teyer, mayn froynte, weest tas xon. Also, past uf fer net kefiert kewe torich ti feeler fon imoraale mënxe un fer net fale fon ayer sicher positsioon. 18Awer, playpt am wakse im knaate un khëntnis fon unser Hër un Reter Yeesus Kristus. Kloor fer iim, yets un fer imer! Aamen!
