2Pheeter 2

₁In te ferkangne tsayt sin falxe mayster tsum foerxayn khom unich em folek, un soo wëre aach falxe mayster tsum foerxayn khome unich aych. Ti wëre toktriine woo fernichte un falx sin unterichte un tuun te Mayster woo se keret hot ap saan. Un tas macht tas en xnele unerkang iwer se khome tuut. ₂Awer toch soo, fiile layt wëre tëne sayn imoral leewe noo mache, un weche tëne falxe mayster wëre fiile layt xlecht xpreche fom Weech fon te woerheet. ₃In sayn kelt keerichkheet tuun tii falxe mayster aych eksploreere, kexichte am fertseele woo se selepst uf keprung hon. Awer is xon lang tsayt tas te Richter in acht is, un tëne iire Fernichter is kans wach.

₄Wayl Hërkot hot net ti ëngle woo sinte kemach hon kexpaart, awer hot se in ti hel kexmis un hot se aan kepun kelos in te tunkelheet, te Taach fom Julkamënt am waarte. ₅Hërkot hot net ti friirix welt kexoont, awer hot ti Sintflut keprung iwer ti welt fon tëne woo niks fon Hërkot wise wolte. ₆Hërkot hot ti xtet Sotooma un Komora konteneyert, tii mit fayer am fernichte, als payxpiil fon was paseere tuut mit tëne woo niks wise wole fon tëm. ₇Eyer hot Lot keret, en kuute man, woo petrikt waar wayl eyer hot tas imoraale leewe fon tëne layt kekhënt. ₈Yeete taach hot tee kuute man, woo unich tëne layt keleept hot, sich imer kekweelt kefiilt wën eyer siin un heere must tas xlecht tings woo ti mënxe kemach hon. ₉Tas ales tsaycht tas te Hër wees wii eyer pefraye khan fom noot ti mënxe woo fer iim tetikeyert sin, un tas eyer aach wees ti xlechte unich xtroof uf heepe pis am Taach fom Julkamënt. ₁₀Eyer tuut ekstra xtroofe tii woo sayn aychne imoraale luste noo keen un tëm sayn autoriteet neewe lose.

Tii falxe mayster sin frech un xtols. Ti hon khee rexpekt fon te kloorixe himlixe weese un tuun se pelaytiche. ₁₁Also, sokaar ti ëngle, xtërker un mechticher wii tii falxe mayster, tuun se net aan kewe mit xlechte wërter foer em Hër. ₁₂Awer tii mëner sin net fernineftich, sin wii wilt fii, woo uf ti welt khome fer keyacht un toot kemach kewe. Ti xëne was se net ferxteen. Tesweche kewe se fernicht wii wilt fii ₁₃un wëre petsaale mit layte ti layte woo se te anere ketuun hon. Tëne iire frayt is im hele taach sayn imoraale luste tsufriite xtele. Wën se sich mit aych fersamle, sin se en xant un en skantal, sich ti kans tsayt am fraye mit sayn falx aanxtelung. ₁₄Khëne net en fraa siin oone se pekeere, un sayne apetit fer sinte mache kept nii tsufriite. Tuun ti xwache layt hinerkeen un tënke ploos an kelt fertiine. Ti sin unich Hërkot sayn ferfluuchung. ₁₅Hon sich ferloer wayl se aus kewaycht sin fom richtiche weech. Keen Balaon sayne weech noo, soon fon Beor, woo tas kelt kewinxt hot woo er fertiine teet tas xlechtes am tuun ₁₆un is kexteyert kep weche sayne sinte. Wayl en eeseliin hot kexproch mit en mënxlich xtim un hot xlus kemach mit tëm profët sayn feriktichkheete.

₁₇Tii falxe mayster sin wii prune oone waser un wii wolke woo te wint mit nëme tuut. Hërkot hot tëne en plats uf kehoop in te tiifst tunkelheet. ₁₈Ti saan feriktes un xtolses tings un mit sayn trekiche un imoraale luste tuun se ti layt hinerkeen woo neekst am raus khome sin tswixe tëne woo in feeler am leewe sin. ₁₉Ferxpreche frayheet fer tii layt, awer sii selepst sin sklaawe fon imoraale kewoonheete. Wayl yeete mënx is sklaawe fon tas woo iim tomineyert. ₂₀Soo, tii woo unser Hër un Reter Yeesus Kristus khëne kelërnt hon un sin raus khom fon te imoraliteet fon te welt, awer tëm noo noch mool kefang un tomineyert kep sin, am ën playwe in en xlechter situatsioon wii am aanfang. ₂₁Wayl es weyer peser kewees tas se nii te richtiche weech ans khëne khom weere als, noo tee khëne lërne, te tsurik weech mache un wech playwe fom hayliche kepoote woo se kriit hon. ₂₂Was mit tëne layt paseyert is pewayst tas tii xpriche woer sin: “Te hunt keet tsurik an sayne aychne khots” un “Ti kewex sau keet noch mool in te pratx wënsle.”