Pekriisung
1Ich, Simon Pheeter, tiiner un aphostel fon Yeesus Kristus, xraywe tee priif fer aych woo, weche unser Hërkot sayn kuutheet un Reter Yeesus Krustus, het soo en tayre klaawe kriit wii unsere.
2Tas te knaate un te friite pay aych sich ferhalt un imer mee sich ferkreesere tuut, torich te khëntnise woo teyer het fon Hërkot un fon Yeesus, unser Hër!
Hërkot ruuft un sucht aus
3Hërkot sayn macht hot uns ales kep was meyer prayche fer se leewe en leewe woo tëm kefale tuut, torich em khëntnis woo meyer hon fon tëm woo uns keruuf hot fer teel mit hale in sayn aychne kloor un kuutheet. 4Soo hot eyer uns ti wunerliche un rayche kaape kep woo eyer ferxproch hat. Eyer hot tas kemach tas, torich tëne kaape, meyer uns auswayche khënte fon te imoraliteet woo ti xlechcte winxe keprung hon uf ti welt un tas meyer teel hale khënte in sayn himlix natuer. 5Kraat tesweche, macht ales was meechlich is fer ti kuutheet tepay tuun mit ayre klaawe. An ti kuutheet, tuut tepay te khëntnis 6un pay te khëntnis tseelt tepay sich selepst tomineere. Pay sich selepst tomineere tuut ti austauer un too tepay tuut ti fromheet fer Hërkot. 7An ti fromheet tuut tepay ti kristlich froyntxaft un pay ti kristlich froyntxaft tuut tepay te liipe. 8Wayl tas sin ti kwaliteete woo teyer mist hon. Wën teyer tii hot un mache tuut tas tii kreeser kewe, kept teyer yeetes mool mee aktiif un protutseyert fiil kuut tings als resultaat fom khëntnis woo teyer het iwich unser Hër Yeesus Kristus. 9Awer weyer tas tings net hot is wii em plinte ore wii yemant woo weenich siit un hot ferkes tas eyer sauwer kemach kep is fon sayn foriche sinte.
10Also, mayn priiter, fersuucht imer mee xtramer playwe in te sicherheet tas Hërkot aych keruuf hot un aus kesuucht hot. Wën teyer tas macht, tuut teyer nii ayre klaawe in xtich lose 11un soo kriit teyer ti kans recht fer rin khome in te eewiche Raych fon unsere Hër un Reter Yeesus Kristus.
12Tesweche, wërt ich imer mache tas teyer traan tënke tuut an tëm tings, wën teyer tas aach xon khëne tuut un fest sayt in te woerheet woo teyer kriit hot. 13Ich tënke tas, soo lang wii ich leewe, is kerecht tas ich mache tas teyer an tëm tings aych erinere tuut. 14Wayl ich wees tas ich klaych tee xtërwliche khërwer in xtich lose mus, wii unser Hër Yeesus Kristus mich kans klaar kesaat hot. 15Also, ich wërt ales mache was ich khan fer, aach noo mayne toot, teyer an tëm tings traan tënke tuut.
Tsayer fon Kristus sayn kloor
16Meyer waare net falx tings am fertseele wii meyer fer aych te mechtiche aan khom fon unser Hër Yeesus Kristus aan kesaat hon, wayl mit unsere aychne aue hon meyer tëm sayn kroosheet kesiin. 17Meyer waare tort wii Hërkot, te Fater, tëm ti eere un ti kloor kep hot. Tee hot ti xtim fon te Heechst Kloor keheyert saan: “Tas is mayne peliipte Soon, woo mich fiil frayt kept!” 18Meyer selepst hon tii xtim keheyert woo fom himel khom is wii meyer mit em Hër Yeesus uf em hayliche përich waare.
19Soo hon meyer noch mee klaawe an te mensaaj woo ti profëte aan kesaat hon. Teyer macht es richtich wën teyer acht kept an tee mensaaj. Wayl tii is wii en licht woo xaynt in en tunkel plats, pis te taach hel kept un tas licht fon te moynts xtërn xayne tuut in ayer hërts. 20Iwer ales, awer, tënkt too traan: nimant khan aus leye, aus sich selwer, en profesii fon te Hayliche Xrifte. 21Also, khee een profëtik mensaaj is torich mënxliche wile khom, awer ti layt waare torich em Hayliche Kayst kefiert wii se ti mensaaj aan kesaat hon woo fon Hërkot khom waar.
