2Korintios 9

₁Iwer te hilef woo teyer am xike sayt fer Hërkots folek in Yutëya, prauch ich wërklich niks mee se xraywe. ₂Ich wees tas teyer helfe wolt, un tesweche hon ich aych keloopt fer ti priiter fon te prowins Masetoonia. Ich saat tas teyer, ti priiter fon te prowins Akaya, am samle fer se helfe weyert tsayt am foriches yoer. Ti meyerxte fon tëne hon sich fiil animeyert mit ayre kuute wile. ₃Yets xike ich tii priiter tas te loop woo ich iwer aych kemach hon iwer tee phunkt net oone weyert playpt. ₄Awer, wën phaar priiter fon Masetoonia mit mich keen un aych net prepareyert aan trefe tuun, tas wërt en ximp fer uns sin, woo soo fiil uf aych sich ferlos hon. Oone se saan was teyer selepst aych xeeme mist. ₅Tesweche hon ich kemënt tas es neetich weyer fer ti priiter ferlange ti solte foer mich keen fer ti opfer prepareere woo teyer ferxproch hat. Un soo, wën ich too aan khome, is tas xon fërtich, un al kriin se wise tas teyer opfere kep het wayl teyer wolt un net wayl teyer ketswung kep sayt.

₆Tënkt traan: weyer weenich planst, tuut weenich ërnte; weyer fiil planst, tuut fiil ërnte. ₇Yeete ëne sol sayn opfer kewe tëm noo sayn hërts es foer kenom hot, net mit traurichkheet un net ketswung, wayl Hërkot liipt weyer mit frayt kept. ₈Un Hërkot khan fiil mee kewe wii teyer praycht tas teyer imer fon alem het un noch mee wii es neetiche fer ale sorte kuutes se tuun. ₉Wii ti Hayliche Xrifte saan:

₁₀Un Hërkot, woo te soome kept fer se seye un tas proot fer se ese, wil aach ale soome kewe woo teyer praycht. Te macht tas tii wakse tuun un en kroos ërnt kewe, als resultaat fon ayer jenerositeet. ₁₁Tee wërt mache tas teyer imer raych sayt tas teyer mit jenerositeet kewe khënt. Un soo tuun fiil Hërkot tanke ti opfer woo teyer am xike sayt torich uns. ₁₂Wayl was teyer macht heleft net ploos weyer es neetich hot, awer macht aach tas se fiile tank kepeete mache fer Hërkot. ₁₃Ti wëre kloor kewe fer Hërkot, wayl tii aarwat woo teyer am mache sayt tsaycht tëne wii teyer aych hiin kept fer Kristus sayne ewankeelium, woo teyer aan nëmt un noo keet. ₁₄Un tii wëre hërtslich fer aych peete, weche te kroose liipe woo Hërkot fer aych ketsaycht hat. ₁₅Meyer wole tanke fer Hërkot tas kexënk woo eyer uns kept, en kexënk woo wërter net pexraywe khëne.