Kristliche opfer
1Priiter, meyer wole tas teyer se wise kriit was Hërkot sayne knaate xon kemach hot in te khëriche fon te prowins Masetoonia. 2Ti priiter fon tort sin fiil in proop kextelt kep weche te petrikunge woo se muste mit mache. Awer tëne sayn frayt waar soo kroos, tas, wën se ach aarich aarem sin, hon se toch opfere kemach mit kroos kuutheet. 3Ich fersichere tas se kemach hon ales was se khonte un noch mee. Un, mit ale kuute wile, 4hon se tringlich ferlangt tas se teel nëme khënte am hilef fer Hërkot sayn folek fon Yutëya. 5Un hon fiil mee kemach wii meyer kehoft hate. Eyerxt, hon se sich selepst fer te Hër keopfert un, tëm noo, torich Hërkot sayne wile, hon se sich fer uns aach keopfert. 6Soo, hon meyer fer Titus ferlangt, woo aankefang hot tii opfere se samer pringe, tas eyer tas wayter mache solt un aych helfe solt tii ekstra liipe aarwat fërtich mache. 7Teyer tsaycht tas, in ales, teyer raycher sayt als ti anere: im klaawe, im wort, in khëntnis, im kuute wile fer ti anere se helfe un in unser liipe fer aych. Un in tëm nay liipe aarwat wole meyer hon tas teyer aach mee macht wii ti anere.
8Ich wil net xike an aych. Was ich wil is tas teyer khëne lërnt te entusiasmus fon ti khëriche fon Masetoonia, tas teyer soo siin khënt op ayre liipe echt is ore net. 9Wayl teyer khënt xon te kroose liipe fon unser Hër Yeesus Kristus: tee waar raych, awer, weche em liipe fer aych, hot eyer sich aarem kemach, tas teyer raych keept torich iim sayn aarmut.
10Was ich mëne iwer tee phunkt is tas: is peser klaych xlus mache an was foriches yoer aankefang kep waar. Teyer waart ti eyerxte net ploos se helfe, awer aach in wole helfe. 11Also, xaft wayter un macht ti aarwat fërtich. Macht tas mit tëm selwiche entusiasmus woo teyer am aanfank hat, am opfere tëm noo was yeete ëne hot. 12Wayl, wën yemant opfere wil, Hërkot tuut aan nëme was te persoon hat. Hërkot ferlangt net was te persoon net hat.
13-14Ich wil net fer ti anere laychter mache un te kewicht uf aych tuun. Awer, yets het teyer fiil mee, is recht tas teyer heleft tii woo es neetich hon. In en aner keleechenheet, wën teyer es neetich het, un tii mee hon, tan khëne tii aych helfe. Soo, kewe se al pehantelt mit ekaliteet. 15Wii ti Hayliche Xrifte saan:
“Fer tee woo fiil kehool hot, is niks iwerich keplip.
Fer tee woo weenich kehool hot, hot niks kefeelt.”
Titus un sayn khameraate
16Meyer tuun fiil an Kot tanke wayl eyer in Titus sayn hërts te selwiche wunx ketuun hot woo meyer hon fer aych se helfe. 17Te hot unser pitung aan kenom un, wii eyer aych helfe wil, hot eyer resolweyert, mit kuute wile, sich trefe keen mit aych. 18Mit tëm sin meyer te pruuter am xike woo fiil rexpekteyert kept in ale khëriche weche sayn aarwat fer te ewankeelium aan saan. 19Un noch tepay is tee pruuter raus kesuucht kep fon te khëriche fer se reese mit uns un helfe in tee liipe aarwat woo meyer mache fer em Hër sayn kloor un aach fer se tsayche tas, wërklich, meyer helfe wole.
20Meyer wole ales richtich mache tas nimant uns kritiseere khan weche te aart woo meyer tii kroos opfer am samle sin. 21Unser opjektiif is mache was te Hër soo wii ti layt richtich fine.
22Mit tëne, sin meyer noch en anere pruuter am xike. Fiil mool hon meyer tee in proop kextelt un soo wise meyer tas eyer imer fërtich is fer se helfe. Un, yets woo eyer soo fiil sich uf aych ferlose khan, hot eyer noch mee muut fer se helfe. 23Iwer Titus fersichere ich tas tee mayne aarwat khameraate is im hilef woo ich aych kewe. Un, was se tuun hot mit te anere priiter woo mit keen, sin representante fon te khëriche un pringe kloor fer Kristus. 24Tesweche, tas ti anere khëriche se wise kriin, tsaycht tëne priiter tas teyer se liipe tuut un tas meyer recht hon in aych se loope.
