1Mayn liipe froynte, tii kanse ferxprechunge sin fer uns. Tesweche, wole meyer uns selepst purifikeere fon ales was net sauwer is in unser khërwer un unser seel. Un, an Hërkot am klaawe, wole meyer en leewe komplët fer iim tetikeyert leewe.
Phaulus sayn frayt
2Macht en plats fer uns in ayer hërts. Meyer mache khee xaate fer nimant, un mache khee unrecht un fersuuche nimant aus se nutse. 3Ich saan tas net fer aych se konteneere. Wayl, wii ich tefoer xon kesaat hat, meyer tuun aych soo liipe, tas meyer imer paysamer sin, soo fiil fer se xtërwe soo wii fer se leewe. 4Ich hon fiil konfians an aych un sin xtols uf aych. Unich unser fiile khimerunge, sin ich kans animeyert un fol frayt.
5Aach tëm noo wii meyer an ti prowins Masetoonia aan khom sin, hon meyer niks keruut. Uf ale plets waare propleeme, khëmfe mit tëne fon traus un pang in unser hërts. 6Awer Hërkot, woo ti layt oone muut animeere tuut, hot uns animeyert mit Titus sayne aankhom. 7Un waar net ploos tëm sayne aankhom woo mich animeyert hot, awer aach ti informatsioon woo tee mich kep hot tas teyer iim animeyert hot. Tee hot fertseelt tas teyer ferlange fon mich hat un saat tas teyer traurich sayt un fërtich fer mich se tefenteere. Tesweche, sin ich yets noch mee froo.
8Ich petaure es net tas ich tee priif kexrip hon, wën teyer ach traurich kep sayt weche tëm. Wii ich se wise kriit hon tas te priif aych en tsayt traurich kelos hot, het ich khëne mich aach petaure. 9Awer, yets sin ich hërlich, net wayl teyer traurich kep sayt, awer wayl tii traurichkheet kemach hot tas teyer ayre ketanke keënert het. 10Wayl ti traurichkheet woo Hërkot penutst pringt ferënerung fer tas hërts un fiert tsu te retung; un too traan is khee uersach fer yemant traurich kewe. Awer ti traurichkheete fon tee welt pringe te toot. 11Teyer het ti traurichkheet aus kehal soo wii es Hërkot kefale tuut. Un kukt yets te resultaat: tas hot kemach tas teyer tee phunkt ërnst aan kenom het un resolweyert aych tefenteere. Hot aach kemach tas teyer pees kep sayt un pang kriit hot. Tëm noo, wolt teyer mich siin un het resolweyert te xultner xtroofe. Mit tëm ales, het teyer ketsaycht tas teyer khee xult hat in tëm fal.
12Also, wën ich toch tee priif kexrip hon, hon ich em net kexrip weche tëm woo unrecht ketuun hot un net weche tëm woo ti unrecht mit kemach hot. Es keeche teel, ich hon te priif kexrip fer klaar se saan fer aych tas Hërkot wees ayer khimerung mit uns. 13Tesweche sin meyer animeyert kep.
Mit te muut woo meyer kriit hon, sin meyer noch hërlicher kep Titus sayn hërlichkheet am siin. Wayl teyer al sayt tëm am helfe sich kuut fiile. 14Ich hat kans kuut kexproch kehat fon aych fer iim, un teyer het mich net xeeme kemach un traurich kelos. Meyer hon imer ti woerheet kesaat fer aych. Soo is aach woer te loop woo ich fer Titus kemach hon iwer aych. 15Un sayne liipe iwich aych wakst imer mee wën eyer sich erinert wii teyer fërtich waart fer tëm aan se heere un wii teyer em ap kehool het mit eenfachkheet un rexpekt. 16Ich sin froo tas ich mich kans ferlose khan uf aych.
