1Tan, als aarwat kameraate in Hërkot sayn aarwat, ferlange meyer tas teyer net Hërkot sayn knate oone nutsung lost. 2Heyert was Hërkot saat:
“Wan ti tsayt khom is fer mayn kuutheet se tsayche,
hon ich aan keheyert was teyer ferlangt hot
un hon hilef kep wii te taach fon te retung khom is.”
Heyert! Tas is ti tsayt woo Hërkot sayn kuutheet tsaycht. Hayt is te taach fer keret kewe.
3Meyer wole net hon tas yemant en feeler fint an unser aarwat un tesweche mache meyer was meechlich is fer nimant se xteere. 4Kraat es keeche teel, in ales tsayche meyer tas mer Hërkot sayn tiiner sin, mit kroose ketult ti petrënknis am aus hale, ti layte un ti xwiirichkheete. 5Meyer sin ferpaytxt kep, ins kefëngnis khom un ferxlaa kep uf te populaare ufreechunge. Meyer waare tsuu fiil am xafe, meyer waare oone xloofe am playwe un oone ese. 6Torich unser phuerheet, khëntnis, ketult un tsaatlichkheet, tsayche mer tas meyer Hërkots tiiner sin. Torich em Hayliche Kayst, sin meyer tas am tsayche torich unser echte liipe, 7torich ti mensaaj fon te woerheet un torich Hërkot sayn macht. Wayl meyer in acht fer Hërkot sayne wile leewe, hon mer ti wafe woo meyer penutse soo fiil fer iwerfale soo wii fer uns tefenteere. 8Meyer kewe keloopt un hinerkang; phaar tuun uns ferxëne, anere tuun kuut fon uns xpreche. Meyer kewe pehantelt als liichner, awer meyer xpreche ti woerheet; 9meyer kewe pehatelt als frëmte, wën mer aach kans pekhant sin fon al; meyer kewe pehantelt wii wën meyer toot weere, awer, wii teyer am siin sayt, meyer sin noch leewent. Meyer sin kextrooft kep, sin awer net toot kemach kep. 10Manich mool kewe mer traurich, aner mool kewe meyer froo. Siin aus wii aarme, hon awer fiil layt raych kemach. Siit aus wii wën meyer niks hete, awer, in te woerheet hon meyer ales.
11Liipe froynte aus Korinto, meyer hon ufrichtich kexproch un hon unser hërts kans uf kemach fer aych. 12Meyer hon net unser hërts tsuu kemach; es waare teyer woo ayer hërts tsuu kemach het fer uns. 13Ich xpreche mit aych wii wën teyer mayn khiner weyert. Tsaycht uns ti selwiche sentimënte woo meyer iwer aych hon un macht ayer hërts komplët uf fer uns.
Konseele keeche ti influëns fon te pakaane
14Fersamelt aych net mit weyer net klaawe tuut fer mit tëne se xafe. Wayl wii khan tas woo richtich is etwas se tuun hon mit was ferkheyert is? Wii khan tas licht un ti tunkelheet mitsamer leewe? 15Wii khëne Kristus un te Taywel pextimt sin? Was hot en krist se tuun mit yemant woo net klaawe tuut? 16Was khan Hërkot sayne Thëmpel se tuun hon mit te iitole? Also, meyer sin te thëmpel fom leewente Kot, wii te aychne Hërkot xon kesaat hot:
“Ich tuun woone un leewe mit tëne.
Ich wëre tëne sayne Kot sin,
un tii wëre mayn folek sin.”
17Un te Almechtiche Hër saat:
“Keet fort unich te pakaane un macht ausnaner mit tëne.
Tuut net ti hant an niks woo unraynich is,
un tan tuun ich aych aan nëme.
18Ich wil ayre fater sin, un teyer wërt mayn seen sin un mayn tochtere.”
