1Meyer wise yoo tas, wën tii parak woo meyer leewe fernicht kept, woo unser khërwer is hier uf te eyert, kept Hërkot uns, fer trin se woone, en haus im himel. Tas haus is net kepaut kep mit mënxliche hënt; es waar Hërkot woo tas kemach hot, un tas halt fer imer. 2Tesweche yoomere meyer soo lang wii meyer in tëm haus yets trin woone, wayl meyer teere kërn xon klaych in tas naye haus rin wanere im himel. Tas haus kept unser himlixe khërwer, 3un, wën meyer uns mit tëm klayte, playwe meyer net oone khërwer. 4Meyer yoomere petrikt soo lang meyer in tee parak woone, woo unser khërwer is. Tas is net wayl meyer wolte fray kewe fon unser mënxliche khërwer; was meyer wole is unser himlixe khërwer kriin tas es leewe macht tas was xtërwlich is ferxwine tuut. 5Un es waar Hërkot weyer tas uns prepareyert hot fer tii wanerung un hot uns sayne Kayst kept als karantii fon ales was eyer hat fer uns se kewe.
6Meyer hon imer fiil konfians, wayl meyer wise tas, soo lang wii meyer in tëm khërwer trin leewe, sin mer wayt wech fom Hër sayne hëm. 7Wayl meyer leewe torich em klaawe un net torich was meyer siin. 8Meyer sin kans konfiant un teere kërn net mee leewe in tëm khërwer fer pay em Hër leewe keen. 9Awer, iwer ales, was meyer wole is te Hër kefale, hier in unser khërwer am leewe ore tort pay em Hër. 10Wayl meyer al mise uns presenteere foer Kristus fer julkeyert se kewe fon iim. Un yeete ëne wërt kriin was eyer fertiint hot, tëm noo was eyer kuutes ore xlechtes ketuun hot in sayn leewe hier uf te eyert.
Froyntxaft mit Hërkot torich Kristus
11Meyer wise was petayt an Hërkot klaawe un tesweche fersuuche meyer ti layt an ti woerheet fiire. Hërkot tuut uns komplët khëne, un ich hofe tas in ayer hërts teyer mich aach khëne tuut. 12Meyer wole uns net noch mool selepst loope fer aych. In keeche teel, meyer wole aych uersach kewe fer aych xtols fiile iwer uns tas teyer hot was se antworte fer tii woo sich xtolseere weche wii yemant aus siit un net weche was sii wërklich is. 13Wayl, wën meyer ferikt sin, is fer Hërkot. Un wën mer ferxtant hon, is fer aych. 14Meyer sin fom liipe woo Kristus fer uns hot tomineyert, wayl meyer erkhëne tas en man, Yeesus Kristus, kextorep is fer al, was petayt tas al teel nëme in sayne toot. 15Tee is fer al kextorep tas tii woo leewe net mee fer sich selepst leewe, awer leewe sole fer tee woo peleept kep waar fer tëne iire retung.
16Tesweche, fon hayt aan foran, tuun meyer khee mënxliche reechle mee penutse fer yemant julkeere. Un, wën eep meyer kriste waare, meyer Kristus julkeyert hon tëm noo ti mënxliche reechle, yets tuun meyer tas net mee mache. 17Weyer mit Kristus fereenicht is, is en nay persoon; was alt is, is am ën, un was nay is, is xon khom. 18Tas ales is fon Hërkot kemach, tee woo, torich Yeesus Kristus, uns fon faynte in sayn froynte kemach hot. transformeyert hot. 19Unser mensaaj is tii: Hërkot macht khee rechnung iwer ti sinte fon te mënxe un, torich Kristus, macht eyer tas tii tëm sayn froynte sin.
20Also, meyer sin too in Kristus sayne naame am xpreche, wii wën te aychne Hërkot am ferlange weyer torich uns. In Kristus sayne naame ferlange meyer aych tas teyer lose tuut Hërkot aych fon faynte in tëm sayn froynte transformeere. 21In Kristus waar khee sinte. Awer Hërkot hot uf Kristus ti xult fon unser sinte ketuun, tas meyer, in iim, Hërkot sayn kerechtichkheet kemach keepte.
