2Korintios 4

₁Hërkot, in sayn paarmhërtsichkheet, hot uns tee ufkaape kep, un is tesweche woo meyer nii te koraaj ferleere. ₂Meyer tuun uf sayte ales was ferxtekelt kemach kept un ales was ximplich is. Meyer mache niks hinerlistich un tuun net Hërkot sayn mensaaj falx aan saan. ₃Wayl, wën te ewankeelium woo meyer aan saan ferxtekelt is, is eyer ploos ferxtekelt fer tii woo sich am ferleere sin. ₄Tii khëne net klaawe, wayl te kot fon tee welt hot tëne sayne sin in te tunkelheet kelos. Tee lost se net tas licht siin woo iwer se xaynt, tas licht woo fon te kuut naychkheet khomt iwich Kristus sayn kloor, tee woo uns tsaycht wii Hërkot wërklich is. ₅Wayl meyer tuun uns net selepst aan saan; meyer tuun Yeesus Kristus als Hër aan saan un uns selepst als ayre tiiner, wayl meyer Yeesus sayne tiiner sin. ₆Te Hërkot woo saat: “Tas fon te tunkelheet es licht xayne sol” is te selwiche woo tas licht xayne kemach hot in unser hërts. Un tas fer tsu uns se pringe es licht fom khëntnis fon Hërkot sayn kloor, woo xaynt in Yeesus Kristus sayn kesicht.

₇Awer, meyer woo tee kaystliche xats hon, sin wii krunt kruuche tas es klaar playp tas ti heechst macht tsu Hërkot keheyert un net tsu uns. ₈Oft mool sin meyer fol pekhimerunge, awer net ferloer. Als mool sin meyer in tswayfel, awer nii oone hofnung. ₉Meyer hon fiil faynte, awer nii feelt uns en froynt. Manich mool kewe meyer xlim wee kemach, awer kewe net fernicht. ₁₀Meyer traan imer in unser xtërwliche khërwer Yeesus sayne toot, tas aach tëm sayn leewe kesiin kewe khan in unser khërwer. ₁₁Iwer es kanse leewe sin meyer imer in kefoer fer se xtërwe weche Yeesus, tas tëm sayn leewe in unser xtërwliche khërwer kesiin kewe khan. ₁₂Tas petayt tas te toot in uns am xafe is, un tas leewe is am xafe in aych.

₁₃Ti Hayliche Xrifte saan: “Ich hon keklaapt un tesweche hon ich kexproch.” Kraat soo meyer, woo te selwiche klaawe hon an Hërkot, xpreche aach wayl meyer klaawe. ₁₄Wal meyer wise tas Hërkot, woo te Hër Yeesus peleept hot, tuut uns aach peleepe mit Yeesus un tuut uns mit aych nëme, pis pay iim. ₁₅Tas ales is paseyert fer kuut fer aych, tas Hërkot sayne knaate yeetes mool an en kreesere numer layt khome khan, un tii mee tank kepeete mache, fer Hërkot sayn kloor.

₁₆Tesweche ferleere meyer nii ti koraaj. Wën ach unser khërwer imer xwecher kept, unser kayst renoweyert sich yeete noye taach. ₁₇Un tii kleene xwiirichkheete woo meyer yets mit mache mise uns en kroos un eewich kloor pringe, fiil kreeser wii ti xwiirichkheete. ₁₈Wayl meyer khee acht kewe an tings woo meyer siin khan, awer an tings woo mer net siin khan. Also, was mer siin khan halt net lang, awer was net kesiin kewe khan halt fer imer.