Ti nay Alians
1Wën meyer tas saan, meecht tas aus siin tas meyer uns selwer am loope sin? Prayche meyer, filaycht, wii es mit phaar layt paseyert, presentatsioon priife ap kewe fer aych ore fon aych ferlange? 2Teyer selepst sayt unser priif, in unser hërts kexrip, fer pekhant un keleest kewe fon ale layt. 3Yoo, is sicher tas teyer en priif sayt woo kexrip kep is fom aychne Kristus un fon uns ap kep. Ti is net mit thinte kexrip kep, awer mit em Kayst fom leewente Hërkot; un is net krawiert uf xteen plake, awer in mënxliche hërtse.
4Meyer saan tas weche te sicherheet woo mer an Hërkot fine, torich Kristus. 5In uns is niks woo uns fersichere lost tas meyer tii aarwat mache khëne, wayl unser kapasiteet khomt fon Hërkot. 6Is tee woo uns ti kapasiteet kept fer ti nay alians se tiine, woo hot als krunt xtoof net ti kexrip kesets, awer Hërkot sayne Kayst. Ti kexrip kesets macht toot, awer Hërkot sayne Kayst kept es leewe.
7Wii ti kesets, woo te toot pringt, uf xteen plake krawiert kep waar, is em Hërkot sayn kloor tsum foerxayn khom, un Mooses sayn kesicht hot keklënst. Te klans fon sayn kesicht waar xon am ferxwine wii eyer ti plake fer tas israelite folek ap kep hot; awer toch soo waar te klans soo xtarek, tas ti Israelite net khonte sayn aue uf Mooses hale. Wën te tiinst fon te kesets khom is mit soo fiil kloor, 8noch soo fiil kreeser is ti kloor woo mit em tiinst fom Hërkots Kayst khomt! 9Ti kesets, woo ti mënxe konteneyert, hot sayn kloor kehat; awer, fiil mee kloor hot te Kayst, woo ti retung pringt. 10Wayl ti kloor woo tefoer soo kroos waar is niks mee weche te kloor fon hayt tsu taach, woo fiil kreeser is. 11Soo tas, wën kloor waar in was ploos weenich tsayt kehal hot, fiil mee kloor hot tas woo fer imer hale tuut.
12Un, wayl meyer ti hofnung hon, khëne meyer fray un xtarek uf treete. 13Meyer mache es net wii Mooses, woo sayn kesicht mit en xlayer teke must tas ti israelite net siin khonte tas te klans fon sayn kexicht am ferxwine waar. 14Awer, ti wolte net ferxteen un, pis hayt, wën se ti picher fon te alt alians leese, is tëne sayne sin petekt mit em selwiche xlayer. Un tee xlayer kept ploos wech kehool in Kristus. 15Aach yets, wën se Mooses sayn Kesets leese, tuut te xlayer imer noch tëne sayne sin teke. 16Awer, te xlayer khan wech kehool kewe, wii ti Hayliche Xrifte saan: “Mooses sayne xlayer is wech kehool kep wii eyer tsurik fer te Hër khom is.” 17Hier petayt tas wort “Hër” te Kayst. Un woo em Hër sayne Kayst tepay is, too kept es frayheet. 18Meyer al, mit em kesicht uf ketekt, reflekteere ti kloor woo fom Hër khomt. Tii kloor kept imer meyer klënsich un macht uns imer eenlicher mit em Hër, woo te Kayst is.
