2Korintios 2

₁Soo, fer aych net noch mool traurich lose, hon ich pextimt aych net pesuuche khome. ₂Wayl, wën ich aych traurich mache, weyer playpt woo mich froo mache khan? Ploos teyer, woo ich traurich am mache sin! ₃Tesweche hon ich tee priif kexrip. Ti uersach waar wayl ich net keen wolt un traurich kemach kewe fon te aychne layt woo mich froo mache solte. Wayl ich sin sicher tas, wën ich froo sin, sayt teyer aach. ₄Ich hon ti priif kexrip aarich pekhimert un traurich un fiil am prile. Awer hon net kexrip tas teyer traurich keept, awer tas teyer se wise kreecht fom kroose liipe woo ich fer aych al hon.

₅Awer, wën yemant kemach hot tas en mënx traurich kep is, hot tas net fer mich ketuun, awer toch fer aych ore, weenichstens, fer phaar fon aych. ₆Is kenuuch te xtroof woo ti meyerxte xon tëm kep hon. ₇Yets mist teyer iim fertsaye un em uf muute, tas tee net soo traurich kept tas eyer net in komplët traurichkheet falt. ₈Tesweche ferlange ich tas teyer macht tas tee sicher sin khan tas teyer iim liipe tuut. ₉Un waar aach tesweche woo ich tee priif kexrip hon. Ich wolt aych in proop xtele un wise op teyer imer fërtich sayt fer mayn unterichte aan se heere. ₁₀Wën teyer yemant fertsaye tuut, tuun ich aach fertsaye. Wayl, wën ich fertsaye, wën ich wërklich etwas se fertsaye hon, mache ich tas weche aych, foer Kristus, ₁₁tas Satanas tii keleechenheet net penutse khan; wayl meyer khëne kans kuut tëm sayn pleen.

₁₂Wan ich in te xtat Troas aan khom sin fer Kristus sayne ewankeelium aan saan, hon ich kesiin tas te Hër mich te weech too uf kemach hat fer ti aarwat. ₁₃Awer ich waar mich fiil ketanke am mache wayl ich khont net unser pruuter Titus trefe. Tesweche hon ich too apxiit kemach fon te priiter un sin noo te prowins Masetoonia kang.

₁₄Awer ich kewe Kot say tank wayl, fereenicht mit Kristus, sin mer imer fon Hërkot kefiert wii kefangne im tesfile uf Kristus sayne kewine. Wii en perfum woo sich ferxtraut iwer ale plets, tuut Hërkot uns penutse tas Kristus pekhant kept fon ale mënxe. ₁₅Wayl meyer sin wii te tsaate keruch fom opfer woo Kristus aan piite tuut fer Hërkot, keruch woo sich ferxtraut unich tëne woo keret am kewe sin un tëne woo sich am ferleere sin. ₁₆Fer tii woo sich am ferleere sin, is es en xlechte keruch woo umpringt; awer, fer tii woo keret am kewe sin, is tas en kuute perfum woo es leewe kept. Tan, weyer khan soo en aarwat mache? ₁₇Meyer sin net wii fiile anere layt woo em Hërkot sayn mensaaj ap kewe wii mer en kexeft am mache weyer. In keeche teel, waar Hërkot woo uns kexikt hot, un tesweche saan meyer tëm sayn mensaaj aan foer iim un mit woerheet, als Kristus mensajeere.