Pekriisung
1Ich, Phaulus, Yeesus Kristus sayne aphostel torich Hërkot sayne wile, xraywe mit unser pruuter Timoteo tee priif fer Hërkot sayn khërich woo in te xtat Korinto playpt un aach fer tas kanse Hërkots folek ferxtraut iwer ti prowins Akaya.
2Tas ti knaate un friite fon Hërkot, unser Fater, un fom Hër Yeesus Kristus mit aych sich ferhalt!
Hërkot sayne hilef im layte
3Keloopt say te Hërkot un Fater fon unser Hër Yeesus Kristus, te kuute Fater, te Hërkot fon weem al hilef kriin! 4Tee heleft uns in ale unser petrikunge tas meyer helfe khëne tii woo ti selwiche petrikunge hon wii meyer. Un meyer kewe fer ti anere te selwiche hilef woo meyer fon Hërkot kriin. 5Wayl, soo wii meyer teel nëme in te fiile layte fon Kristus, soo aach, torich iim, hale meyer teel in sayne kroose hilef. 6Wën meyer layte, is tas teyer hilef un retung kriin khënt. Wën meyer keholef kriin, tan sayt teyer aach keholef, un kriit kraft fer mit ketult aus hale ti selwiche xwiirichkheete woo meyer aus hale. 7Soo, ti hofnung woo meyer an aych hon is xtarek. Wayl, meyer wise tas, soo wii teyer teel halt in te xwiirichkheete, soo aach kriit teyer te hilef woo Hërkot kept.
8Priiter, meyer wole tas teyer se wise kriit ti xwiirichkheete woo meyer mit kemach hon in te prowins Aasia. Ti layte woo meyer aus kehal hon waare soo kroos un soo hart, tas meyer xon khee hofnung mee hate fer fon tort fort khome mit leewe. 9Meyer hon uns kefiilt wii tsum toot konteneyert. Awer, tas is paseyert tas meyer lërne solte net an uns selwer klaawe, awar an Hërkot, tee woo ti toote witer peleept. 10Tee hot uns keret un tuut uns wayter rete fon tëne xlime toot kefoer. Yoo, meyer hon imer unser hofnung an tëm ketuun, in te sicherheet tas tee uns wayter rete tuut. 11Iwer ti selwich tsayt woo teyer uns helfe tuut, am peete fer uns. Soo tuut Hërkot antworte fer ti fiile kepeete woo fer uns kemach kep sin un tuut uns seechne; un fiile wëre iim tanke fer ti seechnunge woo eyer uns kewe wërt.
Phaulus ënert sayn pleen
12Meyer sin kans xtols tas unser kewise uns fersichert tas meyer leewe uf tee welt mit ti frayheet un ufrichtichkheet woo Hërkot uns kept un aach torich sayne knaate un net torich te mënxlich wisheet. Un tas is ekstra woer in was mit aych se tuun hot. 13-14Wayl meyer xraywe fer aych ploos was teyer leese un ferxteen khënt. Yets ferxteet teyer uns ploos en teel, awer ich hofe tas teyer uns komplët ferxteen khënt, tas, am taach fom Hër Yeesus, teyer aych xtolseere khënt uf uns, soo wii meyer xtols uf aych hon.
15Ich waar soo sicher iwer tas ales, tas am aanfank hon ich pleen kemach fer aych se pesuuche, tas teyer noch een mool keseechent kewe khënt. 16In te woerheet, ich wolt aych pesuuche iwer weech noo te prowins Masetoonia un aach im tsurik weech, fer hilef se kriin weche mayn rees noo Yutëya. 17Meecht ich net sicher kewees sin wan ich tas soo resolweyert hat? Ore wën ich mayn pleen mache, meecht ich ploos an mayn aychne interese tënke un, tesweche, saan ich “yoo, yoo” un “nee, nee” in te selwich tsayt? 18Im Kotes naame, woo leaal is, was ich ferxproch hon waar net en “yoo” un en “nee” in te selwich tsayt. 19Also, Yeesus Kristus, Hërkot sayne Soon, woo Silas, Timoteo un ich selepst aan kesaat hon unich aych, is net “yoo” un “nee” in te selwich tsayt. Im keeche teel, tee is Hërkot sayne “yoo”. 20Wayl Hërkot sayn kanse ferxprechunge hon in Kristus sayne “yoo”. Tesweche saan meyer “aamen” torich Yeesus Kristus, fer Hërkot sayn kloor. 21Wayl is te aychne Hërkot woo uns kept, fer uns un fer aych, ti sicherheet tas meyer fereenicht sin mit Kristus. Un es waar Hërkot woo uns aus kesuucht hot fer sich selepst. 22Als aychner hot eyer sayne marke an uns ketuun un hot te Hayliche Kayst in unser hërts ketuun, woo ti karantii is fom tings woo eyer uf heepe tuut fer uns.
23Ich ruufe Hërkot als mayne tsayer; tee khënt mayn hërts. Fer aych se xpaare fon soriche, hon ich pextimt net pis Korinto keen. 24Meyer wole net an ayre klaawe xike, wayl teyer sayt xtram im klaawe. Im keeche teel, meyer wole mit aych xafe tas teyer noch kliklicher kewe khënt.
