1Korintios 16

₁Yets xpreche ich fom kelt fer em Hërkot sayn folek se helfe in Yutëya. Macht was ich kesaat hon fer ti khëriche fon te prowins fon Galasia. ₂Yeete sontach tuut yeete ëne fon aych en pisye kelt ekstra leye un uf heepe, tëm noo was yeete ëne fertiint hot. Soo wërt es net neetich sin ti opfere samle wën ich aan khome. ₃Noo mayne aankhom, xike ich, mit foerxtelung priife, tii woo teyer aus suuche tuut fer ti opfere noo Yeruusalëm nëme. ₄Wën teyer mënt tas ich mist aach keen, khëne tii ti rees mit meyer mache.

₅Ich tuun aych pesuuche noo mayne pesuuch fer ti prowins Masetoonia, wayl ich keen tort torich. ₆Khan sin tas ich en tsayt mit aych playwe, filaycht te kanse winter, un soo khënt teyer mich helfe mayn rees wayter mache, ekaal woo ich hiin reese tëm noo. ₇Wayl ich wil aych net ploos siin iwer en torich keen. Wën te Hër erlaupnis kept, hofe ich fiil tsayt playwe mit aych.

₈Ich hon resolweyert hier in Ëfesus playwe pis te Phinste Taach. ₉Wayl ich hon hier aarich kuute keleechenheete kefun fer en kroos un nutslich aarwat, wën toch fiil layt keeche mich sin.

₁₀Wën Timoteus too aan khomt, macht ales tas eyer sich kuut fiilt unich aych; wayl, soo wii ich, is tee aach fer te Hër am xafe. ₁₁Lost nimant iim ferxtumpeere. In keeche teel, teyer mist tëm helfe sayn rees wayter mache in friite, tas eyer hier heyer tsurik khomt. Wayl sin am waarte tas tee tsurik khome tuut mit te anere priiter.

₁₂Was em pruuter Apolus aan keet, ich hon oft mool aan kep eyer solt aych pesuuche keen mit te anere priiter, awer eyer mënt tas eyer net yets keen sol. Tee keet in te eyerxt keleechenheet.

₁₃Playpt am wache, playpt xtram im klaawe, sayt korajoos, sayt xtarek. ₁₄Tas ales was teyer mache tuut kemach kept mit liipe.

₁₅Teyer khënt Stëfanas un tëm sayn familye. Teyer wist tas tii ti eyerxte kriste waare woo rom kang sin in te prowins Akaya un tas tii sich hiin kewe an te aarwat fer Hërkot sayn folek. Ich ferlange aych, mayn priiter, ₁₆tas teyer tëne sayn orienteerunge noo keet un fon te anere woo se helfe un mit tëne xafe.

₁₇Ich sin froo tas Stëfanas, Fortunatus un Akayko khom sin, wayl tii hon kemach was teyer net mache khont, wayl teyer net too waart. ₁₈Tii hon mich fiil animeyert, un ich wees tas se aych aach animeyert hon. Layt wii tii mise keloopt kewe.

₁₉Ti khëriche fon te prowins Aasia xike pekriisunge. Akila un sayn fraa Prisila un ti khërich woo sich fersamelt in tëne sayn haus xike kristliche pekriisunge fer aych. ₂₀Ale priiter fon hier xike pekriisunge.

Pekriist ëne te anere mit en priiterliche khus.

₂₁Ich xraywe tas mit mayn aychne hant:

₂₂Weyer te Hër net liipe tuut, sol ferfluucht kewe!

“Marana ta” — Khom, unser Hër!

₂₃Tas te knaate fon unser Hër Yeesus mit aych sich ferhalt! ₂₄Un tas mayne liipe mit aych sich ferhalt, wayl meyer sin fereenicht mit Yeesus Kristus!