1Korintios 15

₁Yets, priiter, wil ich hon tas teyer traan tënkt an te ewankeelium woo ich aych aan kesaat hon, tee woo teyer aan kenom hot un woo teyer wayter xtram traan klaawe tuut. ₂Ti mensaaj woo ich aych aan kesaat hon is te ewankeelium, torich was teyer keret kept, wën teyer wayter traan klaawe tuut. Sonst wën tas niks kenutst hot fer aych too traan klaawe.

₃Ich hon aych wayter kelërnt ti untericht woo ich kriit hat un is hooch important: Kristus is kextorep weche unser sinte, wii es kexrip is in te Hayliche Xrifte; ₄eyer is pekraapt kep un, am trite taach, is eyer peleept kep, wii es kexrip is in te Xrifte. ₅Un is tsum foerxayn khom fer Pheeter un tëm noo fer ti tswelef aphostle. ₆Tëm noo is eyer tsum foerxayn khom, uf een mool, fer mee wii finef hunert aanhënger, un ti meyerxte fon tëne sin noch leewent, awer phaar sin xon kextorep. ₇Klaych tëm noo, is eyer tsum foerxayn khom fer Tiaako un, xpeeter hiin, fer ti kanse aphostle.

₈Tsum letste, noo tëne al, is eyer aach fer mich tsum foerxayn khom, wii fer yemant woo aus te tsayt kepoer kep waar. ₉In te woeheet, ich sin te keringste fon te aphostle, un sin sokaar kaarnet te weyert aphostel kenënt kewe, wayl ich em Hërkot sayn Khërich keyacht hon. ₁₀Awer, torich em Hërkot sayne knaate, sin ich weyer ich sin, un te knaate woo eyer mich kep hot is net oone resultaat keplip. Kraat es keeche teel, ich hon fiil mee kexaft wii ti anere aphostle. Awer, tas sin net ich woo tas am mache sin, un toch em Hërkot sayne knaate is pay mich. ₁₁Soo, hot niks se saan op ti mensaaj torich mich ap kep waar ore torich ti anere. Important is tas mer al tas selwiche aan kesaat hon, un an tas hot teyer keklaapt.

₁₂Wën unser mensaaj is tas Kristus peleept kep is, wii soo saan phaar fon aych tas ti toote net peleepe tuun? ₁₃Wën es khee peleepung fon toote kept, tan petayt tas Kristus net peleept kep is. ₁₄Un, wën Kristus net peleept kep is, tan hon meyer niks fer aan se saan, un teyer het niks fer se klaawe. ₁₅Un noch mee: in tëm fal weere meyer am liye keeche Hërkot, wayl meyer fersichert hon tas eyer Kristus peleept hot. Awer, wën tas woer is tas ti toote net peleept kewe, tan hot Hërkot Kristus net peleept. ₁₆Wayl, wën ti toote net peleept kewe, is Kristus aach net peleept kep. ₁₇Un, wën Kristus net peleept kep is, is ayre klaawe en ilusioon, un teyer playpt wayter ferloer in ayre sinte. ₁₈Wën Kristus net peleept kep is, sin tii woo kextorep sin an tëm am klaawe ferloer. ₁₉Wën unser hofnung in Kristus ploos kilt fer hier tas leewe, sin meyer ti unkliklichste mënxe fon tee welt.

₂₀Awer, ti woerheet is tas Kristus peleept kep is, un tas is ti karantii tas tii woo toot sin aach peleept kewe. ₂₁Wayl, soo wii torich eene man te toot khom is, soo aach torich eene man is ti peleepung khom. ₂₂Soo wii, wayl se fereencicht waare mit Aatam, sin al kextorep, soo aach, wayl se fereenicht sin mit Kristus, tuun se al peleepe. ₂₃Awer, yeete ëne kept peleept uf sayn mool: Kristus, te eyerxte fon se al; tëm noo tii woo tëm keheere, wën tee khome tuut; ₂₄un tan khomt te ën. Kristus fernicht ti kaystliche rechiirunge, ale autoriteete un machte un tuut em Hërkot, te Fater, sayne Raych ap kewe. ₂₅Wayl Kristus mus rechiire pis Hërkot macht tas eyer ale faynte tomineere tuut. ₂₆Te letste faynt woo fernicht kept is te toot. ₂₇Ti Hayliche Xrifte saan: “Hërkot hot ale tings unich tëm sayn tomineerung ketuun.” ₂₈Awer, wën ales tomineyert kept fon Kristus, tan tuut te aychne Kristus, woo te Soon is, sich unich Hërkot sayn tomineerung, woo ales unich Kristus sayn tomineerung ketuun hot. Tan tuut Hërkot komplët rechiire iwer ales.

₂₉Tënkt yets an ti layt woo sich taafe kelos hon fer ti toote: was hofe ti se fertiine? Wën ti toote net peleept kewe, warom teere ti layt sich taafe fer ti toote? ₃₀Un, was uns aan keet, warom tuun meyer uns yeete xtun in kefoer? ₃₁Priiter, ich khëmfe yeete taach keeche te toot. Wën ich tas fersichere, is weche em xtols woo ich uf aych hon, wayl meyer fereenicht sin mit Yeesus Kristus, unser Hër. ₃₂Hier in Ëfesus hon ich kekhëmft keeche ti faynte wii wën ich keeche wilt fii am khëmfe weyer. Un, wën ich tas ploos mache teet weche mënxliche interese, was het ich temit fertiint? Wën tas woer is tas ti toote net peleepe, tan mache meyer was kesaat kept: “Meyer ese un trinke, wayl moye tuun meyer xtërwe.” ₃₃Tuut aych net fertuun: “Ti xlecht kompanii fertërept kuute kewoonheete.” ₃₄Fangt noch mool aan se leewe en ërnst un richtich leewe un heyert uf sinte se mache. Fer se mache tas teyer aych xeeme tuut, saan ich tas: phaar fon aych tuun Hërkot net khëne.

₃₅Awer yemant tuut frooe: “Wii kewe ti toote peleept? Was fer khërwer wëre tii hon?” ₃₆Tuu tume! Wëns tuu en soome seye tuust in ti eyert, tii tuut ploos aus khayme wën se xtërwe tuut. ₃₇Un was keseet kep is, is ploos en soome, filaycht en waytse khorn ore en anere soome un net te xon formeyerte khërwer fon te plans woo wakse tuut. ₃₈Hërkot kept fer tee some te khërwer woo eyer wil un kept fer yeete soome en aychne khërwer.

₃₉Un tas flayx fon te leewente is net al ekaal. Ti mënxe hon een sort flayx; tas fii, en aner sort; ti feel, en aner sort; un ti fix noch en aner sort.

₄₀Es kept aach khërwer fom himel un khërwer fon te eyert. Es kept en sort xeenheet woo fer ti himlixe khërwer keheyert, un en aner sort woo fer ti eyertliche khërwer keheyert. ₄₁Ti sun hot sayne aychne klans; te moont, en anere klans; un ti xtërne hon en ferxiitne klans. Un aach ti xtërne unich sich hon ferxiitne sorte klans.

₄₂Also, soo wërt es paseere wën ti toote peleepe. Wën te khërwer peërticht kept, is tas en xtërwliche khërwer; awer, wën tee peleept kept, is tas en unxtërwliche khërwer. ₄₃Wën tee peërticht kept, is er eeklich un xwach; awer, wën tee peleept kept, is tee xeen un xtarek. ₄₄Wën tee peërticht kept, is tas en materiale khërwer; awer, wën tee peleept kept, is tas en kaystliche khërwer. Sicher is es tas, wën es en materiale khërwer kept, tan mus es aach en kaystliche khërwer kewe. ₄₅Wayl ti Hayliche Xrifte saan: “Aatam, te eyerxte man, is ketsoo kep als en leewente weese.” Awer te letste Aatam, Yeesus Kristus, is te Kayst woo leewe kept. ₄₆Is net te kaystliche woo te eyerxt khomt, awer toch te materiale; tëm noo khomt te kaystliche. ₄₇Te eyerxte man is fom xtaap fon te eyert kemach kep; te tswete is fom himel khom. ₄₈Ti woo tsu te eyert keheere sin wii tee woo fom xtaap fon te eyert kemach kep waar; tii woo tsum himel keheere sin wii tee woo fom himel khom is. ₄₉Soo wii meyer eenlich sin mit tëm woo fom xtaap fon te eyert kemach kep waar, soo aach wëre meyer eenlich mit tëm Man fom himel.

₅₀Mayn priiter, was ich saan wil is tas: was fon flayx un pluut kemach is khan khee teel hon im Hërkots Raych, un was xtërwlich is khan net ti unxtërwlichkheet hon.

₅₁Heyert kuut aan tee kehëmnis: meyer tuun net al xtërwe, awer meyer kewe al transformeyert, in en momënt, ₅₂in en aue plik, wën ti letst trompet xpiile tuut. Tii tuut xpiile, ti toote kewe peleept wii unxtërwliche layt un meyer al kewe transformeyert. ₅₃Wayl tee xtërwliche khërwer mus sich klayte mit was unxtërwlich is; tee khërwer woo xtërwe tuut mus sich klayte mit was net xtërwe tuut. ₅₄Soo, wën tee xtërwliche khërwer sich klayte tuut mit was unxtërwlich is, wën tee khërwer woo xtërwe tuut sich klayte tuut mit was net xtërwe tuut, tan paseyert was ti Hayliche Xrifte saan:

₅₈Also, liipe kexwister, playpt xtarek un xtram. Playpt am xafe im Hër sayn aarwat, wayl teyer wist tas ale aanxtrëngung in tee aarwat imer nutsung pringt.