Noch ti kaape fom Kayst
1Also, tuut aych aanxtrënge fer liipe se hon. Fersuucht aach ti kaystliche kaape hon, ekstra tee fer em Hërkot sayn mensaaj aan saan. 2Weyer in frëmte xprooche xprecht, xprecht fer Hërkot un net fer ti mënxe, wayl nimant tuut em ferxteen. Torich em Hayliche Kayst sayn macht saat tee ferxtekelte woerheete. 3Awer, weyer em Hërkot sayn mensaaj aan saat xprecht fer ti layt, tëne am helfe un tëne koraaj am kewe un konsoleere. 4Weyer in frëmte xprooche xprecht heleft ploos sich selepst, awer weyer em Hërkot sayn mensaaj aan saat heleft ti kans khërich.
5Ich het kërn tas teyer al in frëmte xprooche xpreche teet, awer weyer mich noch liiwer tas teyer te kaape het fer em Hërkot sayn mensaaj aan saan. Wayl, weyer em Hërkot sayn mensaaj aan saat hot mee weyert wii tee woo in frëmte xprooche xprecht, sonst wën yemant too is woo interpreteere khan was kesaat kept, tas ti kans khërich kaystlich too temit keholef kewe khan. 6Tesweche, priiter, wën ich aych pesuuche khome, was penutst teyer wën ich aych in frëmte xprooche xpreche? Is sicher, kaarniks, sonst wën ich aych etwas reweleere fon Hërkot, ore en khëntnis, ore en inspireyert mensaaj, ore en untericht.
7Tsum payxpiil, neewe te mënxlich xtim, kept es ti musik instrumënte, wii ti fleet un ti harf. Wën ti klange net kans klaar raus khome, wii khan yemant wise was kexpiilt am kewe is in ëne ore anere fon tëne instrumënte? 8Wën yemant ti horn ploost un khee klaare thoon kept, weyer tuut sich fer te khampf prepareere? 9Soo, aach, wii sole ti anere ferxteen was teyer am saan sayt wën ti mensaaj torich frëmte xprooche net klaar is? Tan weyert teyer fer te wint am xpreche! 10Es kept fiil ferxiitne xprooche uf te welt, un yeete ën macht sin. 11Awer, wën ich net ti xprooch woo yemant mit mich xpreche tuut ferxteen, tan weyer tas am xpreche is is frëmt fer mich, un ich sin frëmt fer tee. 12Tesweche, wën teyer soo kërn ti kaape fom Kayst wolt hon, fersuucht se kriin, iwer ales, ti kaape woo mache tas ti khërich kaystlich wakse tuut.
13Also, weyer in frëmte xprooche xprecht sol peete fer Hërkot am ferlange tas eyer te kaape kewe sol fer interpreteere was ti saan wole. 14Wayl, wën ich in frëmte xprooche peete, wërt in te woerheet mayne kayst am peete sin, awer mayn intelijëns tuut too khee teel traan hale. 15Was mache ich, tan? Ich peete mit mayne kayst, awer peete aach mit mayn intelijëns; ich wërt singe mit mayne kayst, awer singe aach mit mayn intelijëns. 16Wën tuu Kot say tank kepst in frëmte xprooche, wii khan en eenfache mënx, woo uf ti fersamlung is, “aamen” saan fer tas tank kepeet woos tuu kemach host? Tee wërt niks ferxteen was tuu am saan pist. 17Wën tayn kepeet toch aarich kuut is, tuut tee persoon khee hilef kriin. 18Ich tanke fer Kot wayl ich in frëmte xprooche xpreche fiil mee wii teyer. 19Awer, in te fersamlunge in te khërich saan ich liiwer finef wërter woo ferxtan khëne kewe, fer soo ti anere in lërne, anxtat tausente wërter saan in frëmte xprooche.
20Priiter, tënkt net wii khiner. Teyer khënt sin wii khiner fer was xlecht is, awer kroos kewakste layt in ayre ketanke. 21In te Hayliche Xrifte is kexrip:
“Torich layt woo in frëmte xprooche xpreche
xpreche ich fer tas folek — saat te Hër.
Ich xpreche torich frëmte lipe,
awer toch soo tuut mayn folek
mich khee acht kewe.”
22Also, te kaape fer in frëmte xprooche xpreche is en sinaal fon Hërkot fer tii woo net klaawe un net fer ti kriste. Awer te kaape fer ti mensaaj aan saan is en sinaal fer ti kriste un net fer tii woo khee klaawe hon. 23Iwerleet aych mool tas ti khërich fersamelt is un al fange aan in frëmte xprooche se xpreche. Wën too phaar eenfache layt aan khome ore woo net klaawe, meechte se net saan tas teyer ferikt sayt? 24Awer, wën ti layt al em Hërkot sayn mensaaj am aan saan sin un too yemant woo net klaapt ore en eenfache mënx rin khomt, tuut tee aan heere was teyer am saan sayt un sich fersichere fon sayn sinte. Un tee kept julkeyert weche was tee keheyert hot, 25sayn ferxtekelte ketanke kewe reweleyert, tee tuut sich kniye un Hërkot atoreere, am saan: “Hërkot is wërklich pay aych!”
Ti ortnung in te khërich
26Also, mayn priiter, was mus kemach kewe? Wën teyer aych fersamelt in te khërich, hot en pruuter en hiimno fer se singe; aner etwas fer se lërne; anere en rewelatsioon fon Hërkot; anere en mensaaj in frëmte xprooche; un noch anere, ti interpretatsioon fon tee mensaaj. Tas ales kemach kept fer ti kaystlich wakstum fon te khërich. 27Wën yemant fon aych in frëmte xprooche xprecht, tas tan ploos tswaay ore tray xpreche tuun, eene noo em anere, un tas yemant interpreteere sol was kesaat am kewe is. 28Awer, wën es nimant kept woo interpreteere khan, tan playpt ruich un xprecht ploos mit aych selepst un mit Hërkot. 29Im fal tas tswaay ore tray en mensaaj kriin fon Kot, tii mise xpreche, un ti anere sole kuut tënke an was tii am saan sin. 30Wën en aner pesoon woo too sitst en mensaaj fon Hërkot kriit, weyer am xpreche is mus ruich playwe. 31Teyer al khënt em Hërkot sayn mensaaj aan saan, yeetes mool ëne, tas se al lërne khëne un uf kemuut kewe. 32Weyer xpreche tuut mus te kaape fer ti mensaaj aan saan kontroleere, 33wayl Hërkot net wil hon tas meyer in unortnung leewe un toch in friite.
Wii in ale khëriche fon Hërkot sayn folek 34sole ti fraae ruich playwe iwer ti fersamlunge fon atoreerung. Tii hon khee erlaupnis fer se xpreche. Wii ti Kesets saat, tii tërfe khee richte xtel hon. 35Wën se was wise wole, sole se fer sayne man tehëm frooe. Is ximplich tas en fraa xpreche tuut in te fersamlunge in te khërich.
36Is filaycht Hërkots mensaaj torich aych khom? Ore meecht se ploos fer aych khom sin? 37Wën yemant tënkt tas eyer Hërkots mensajeyer is ore tas eyer en anere kaystliche kaape hot, tee mus wise tas was ich am xraywe sin is em Hër sayne kepoote. 38Awer, wën yemant khee acht too truf kept, tas nimant tëm mënx acht kewe sol.
39Soo, mayn priiter, suucht imer em Hërkot sayn mensaaj aan saan, awer tuut nimant ferpiite tas se in frëmte xprooche xpreche. 40Also, macht ales mit aanxtënichung un ortnung.
