Hymne fer te kristliche liipe
1Ich khënt ti kanse xprooche xpreche woo uf es te welt kept un sokaar ti xprooche fon te ëngle, awer, wën ich khee liipe het, weere mayn wërter wii te ratau fon en konk ore wii te klank fon en klok.
2Ich khënt te kaape hon fer Hërkot sayn mensaaje aan saan, te kanse khëntnise hon, ti kanse kehëmnise ferxteen un soo fiil klaawe hon, tas ich khënt sokaar ti hooche përiche fon sayn plats wech hoole, awer wën ich khee liipe hët weyer ich kaarniks.
3Ich khënt kewe ales was ich hon un sokaar mayne khërwer ap kewe fer ferprënt se kewe, awer, wën ich khee liipe hët, teet tas mich niks nutse.
4Weyer liipt is ketultich un kuut. Weyer liipt is net ayfersichtich, net mool hoochmuutich, net mool inkepilt.
5Weyer liipt is net krop net mool ekoistix; tuut sich net ayre, tuut khee layte uf heepe.
6Weyer liipt kept net froo wën yemant was ferkheyertes macht, awer kept froo wën yemant macht was richtich is.
7Weyer liipt tuut nii uf kewe, awer halt ales aus mit klaawe, hofnung un ketult.
8Ti liipe is eewich. Es kept kaystliche mensaaje, awer ti hale weenich. Es kept te kaape fer in frëmte xprooche xpreche, awer tas keet klaych ans ën. Es kept te khëntnise, awer khomt aach klaych ans ën.
9Wayl unser kaape fon khëntnise un unser kaystliche mensaajes sin unperfekt.
10Awer, wën tas khomt woo perfekt is, tan wërt ferxwine was unperfekt is.
11Wii ich en khint waar, hon ich kexproch wii en khint, kexpiert wii en khint un ketënkt wii en khint. Yets woo ich kroos kewakst sin, hon ich uf keheyert se hantle wii en khint.
12Was mer yets siin is wii en unperfekt pilt in en xmiiriche xpiichel, awer noochter tuun mer ins kesicht siin. Yets is mayn khëntnis unperfekt, awer noochter tuun ich perfektlich khëne, soo wii Hërkot mich khënt.
13Soo, yets kept tas tii tray tinger: te klaawe, ti hofnung un ti liipe. Awer, tas kreeste fon tëne is ti liipe.
