Ti kaape fom Hayliche Kayst
1Mayn priiter, ich wil tas teyer se wise kriit iwich ti kaape woo te Hayliche Kayst kept. 2Teyer wist tas, wii teyer noch pakaane waart, waart teyer ap kelënkt kep, uf ferxiitne aarte, fer iitole atoreere, woo khee leewe hon. 3Tesweche, mist teyer ferxteen tas nimant woo saat “Tas Yeesus ferfluucht wërt!” khan am xpreche sin torich ti macht fom Hërkot sayne Kayst. Un teyer mist ferxteen tas nimant saan khan “Yeesus is te Hër”, sonst wën eyer kefiert is torich te Hayliche Kayst.
4Es kept ferxiitne kaystliche kaape, awer is eene eensichste un te selwiche Kayst weyer tii kaape kept. 5Es kept ferxiitne aarte fer se tiine, awer te Hër woo meyer tiine is te selwiche. 6Es kept ferxiitne kexike fer ti aarwat fërtich pringe, awer is te selwiche Hërkot weyer fer yeete ëne te kexik kept fer tas se mache. 7Tas es nutslich is fer al, kept Hërkot fer yeete ëne en pewaysung fon te presëns fom Hayliche Kayst. 8Fer een person kept te Hayliche Kayst en mensaaj fon wisheet un fer aner tuut te selwiche Kayst en mensaaj fon khëntnis kewe. 9Fer een persoon kept te selwiche Kayst te klaawe un fer aner kept eyer ti macht fer se kureere. 10Een persoon kriit fom Kayst ti macht fer wunere se mache, un aner kriit te kaape fer em Hërkot sayn mensaaj aan saan. Noch aner persoon kriit ti kapasiteet fer te unerxiit se wise tswixe ti kaape woo fom Kayst khome un tii woo net fon tëm khome. Fer en persoon kept te Kayst ti kapasiteet fer in frëmte xprooche xpeche un fer aner kept eyer ti kapasiteet fer interpreteere was tii xprooche petayte sole. 11Awer, is eene un te selwiche Kayst weyer tas ales mache tuut. Tee kept en ferxiitne kaape fer yeete persoon, wii eyer wil.
Eene khërwer un fiil teele
12Kristus is wii eene khërwer, woo fiil teele hot. Un ale teele, wën se ach fiil sin, formeere eene eensichste khërwer. 13Soo, aach, meyer al, yute un tii woo khee yute sin, sklaawe un fraye, sin ketaaft kep torich te selwiche Kayst fer eene eensichste khërwer formeere. Un fer uns al waar kep se trinke fom selwiche Kayst.
14Wayl te khërwer is net kemach fon een eensichst teel, awer fon fiile. 15Wen te fuus saat: “Wayl ich khee hant sin, keheere ich net tsum khërwer”, net mool tesweche lost tee se keheere tsum khërwer. 16Wën tas oer saat: “Wën ich net en au sin, keheere ich net tsum khërwer”, net mool tesweche lost tas se keheere tsum khërwer. 17Wën te kanse khërwer au weyer, wii khënte meyer heere? Un, wën te kanse khërwer oer weyer, wii khënte meyer riiche? 18Soo hot Hërkot yeete anerxter teel fom khërwer hiin ketuun wii eyer wolt. 19Wën te kanse khërwer ploos een eensichst teel weyer, teet khee khërwer eksisteere. 20Soo wii es is, eksisteere fiil teeler, awer eene eensichste khërwer.
21Also, tas au khan net saan fer ti hant: “Ich praucht tich net.” Un te khop khan net saan fer ti fiis: “Ich prauch aych net.” 22Tan, kraat im keeche teel, is es tas ti teeler fom khërwer woo xwach aus siin sin ti neetichste, 23un tii woo meyer mëne weere weenicher eere weyert sin ti woo meyer mit mee eere pehantle. Un ti teeler woo eeklicher aus siin tuun meyer ekstra uf pase, 24was ti anere woo xeener sin net prayche. Soo waar es woo Hërkot te khërwer kemach hot, mee eere am kewe fer tii teele woo weenicher eere hon. 25Un soo is es tas es khee teelung kept am khërwer, awer ale sayn teeler hon te selwiche interese een tsum anere. 26Wën een teel fom khërwer layte mit macht, tuun ti anere al ti layte mit mache. Wën een keloopt kep, tuun ti anere al sich fraye mit tëm.
27Tan, teyer sayt Kristus sayne khërwer, un yeete ëne is en teel fon tëm khërwer. 28In te Khërich, hot Hërkot ales uf es richtiche plats ketuun: uf es eyerxte plats, ti aphostle; uf em tswete plats, ti profëte; un uf em trite plats, ti mayster. Klaych tëm noo hot eyer hiin ketuun tii woo ti wunere mache; tëm noo tii woo te kaape hon fer se kureere, ore fer se helfe, ore fer se fiire, ore in frëmte xprooche xpreche. 29Net ale sin aphostle, ore profëte, ore mayster. Net ale hon te kaape fer wunere se mache, 30net fer krankheete se kureere, net mol in frëmte xprooche xpreche, net fer ausleye was ti xprooche saan wole. 31Tesweche, xtrëngt aych aan fer ti peste kaape se hon.
Awer, ich tsayche aych te weech woo te peste is fon al.
