1Korintios 11

₁Keet mayne payxpiil noo soo wii ich Kristus sayne payxpiil noo keen.

₂Ich loope aych wayl teyer imer an mich tënkt un keet ti unterichte noo woo ich fer aych kep hon. ₃Awer, ich wil hon tas teyer ferxteet tas Kristus autoriteet hot iwer ale man, tas te man autoriteet hot iwer sayn fraa un tas Hërkot autoriteet hot iwer Kristus. ₄Wën en man sayne khop tekt wën eyer peete tuut ore Hërkot sayn mensaaj proklameyert im Kotes Tiinst, is eyer Kristus sayn eere am pelayhtiche. ₅Un, wën en fraa net sayne khop tekt wën se peete tuut ore Hërkot sayn mensaaj proklameyert im Kotes Tiinst, is tii sayne man sayn eere am pelaytiche. In tëm fal, is khee unerxiit tswixe tas un en khaal khop fraa. ₆Wën ti fraa net sayne khop tekt, tan is es peser tas sii klaych ti hoer ap xnayte tuut. Wayl es is en xaam fer ti fraa te khop khaal hale ore ti hoer ap xnayte; tesweche mus se te khop teke. ₇Te man prauch net te khop teke, wayl eyer reflekteyert Hërkot sayn pilt un kloor. Awer ti fraa reflekteyert em man sayn kloor, ₈wayl te man is net fon te fraa kemach kep, awer ti fraa is fom man kemach kep. ₉Te man is net ketsoo kep weche te fraa, awer toch ti fraa weche em man. ₁₀Also, weche te ëngle, mus ti fraa te xlayer uf te khop tuun fer se tsayche tas se unich em man sayn autoriteet is. ₁₁Awer, wayl meyer fereenicht sin mit em Hër, is ti fraa net intepentënt fom man, un te man is net intepentënt fon te fraa. ₁₂Wayl, soo wii ti fraa fom man kemach kep waar, soo aach khomt te man fon te fraa uf ti welt. Un ales khomt fon Kot.

₁₃Julkeyert teyer selepst: meecht tas richtich sin tas, in en Kotes Tiinst, ti fraa Hërkot aan peet oone te khop ketekt hon? ₁₄Also, ti aychne natuer lërnt tas ti lange hoer en xant fer te man is, ₁₅awer fer ti fraa sin ti lange hoer en kwel fon xtols. Ti hoer sin tëm kep waar fer se tiine als xlayer. ₁₆Awer, wën yemant tiskuteere wil iwer tee phunkt, was ich saan khan is tas meyer un Hërkot sayn khëriche khee aner kewoonheet hon in te Kotes Tiinste.

₁₇In te instrusioone woo ich yets aych kewe, khan ich aych net loope, wayl ayre Kotes Tiinste mache mee xaate als kuut. ₁₈Im eyerxte plats, hon mich fertseelt tas in tee fersamlunge sin layts krupe woo am xtrayte sin, un ich klaawe tas en teel fon tas woer is. ₁₉Is khee tswayfel tas es teelunge kewe mus unich aych tas es klaar playpt weyer richtich is. ₂₀Wën teyer aych fersamelt, is es net em Hër sayn Haylich Nachts Ese woo teyer est. ₂₁Wayl, am tix, tuut yeete ëne sayn aychne ese ese! Un soo, soo lang wii phaar mit hunger playwe, tuun anere sokaar pesof kewe. ₂₂Het teyer net, filaycht, ayer aychne haus woo teyer ese un trinke khënt? Ore meecht teyer Kot sayn khërich ap xtoose un ferxeeme tii woo aarem sin? Was wolt teyer hon tas ich saan sol? Wolt teyer hon tas ich aych loope? Is sicher tas ich aych net loope khan!

₂₃Wayl ich hon fom Hër kriit was ich aych wayter kelërnt hon: tas te Hër Yeesus, an te nacht woo eyer hinerkang kep is, hot es proot kehool ₂₄un hot Hërkot ketankt. Tëm noo, hot eyer es proot keteelt un saat: “Tas is mayne khërwer, woo weche aych ap kep wërt. Macht tas fer an mich se erinere.” ₂₅Soo aach, noo em nachts ese, hot eyer te khelich kehool un saat: “Tee khelich is ti nay alians in mayn pluut. Yeetes mool woo teyer fon tëm khelich trinke tuut, macht tas fer an mich se erinere.” ₂₆Soo tas, yeetes mool woo teyer fon tëm proot est un trinkt fon tëm khelich, sayt teyer em Hër sayne toot am aan saan, pis eyer khome tuut.

₂₇Tesweche, tee woo fom Hër sayn proot ese tuut ore fon tëm sayne khelich trinke tuut in en form wii es net tëref sin is sinte am mache keeche em Hër sayne khërwer un sayn pluut. ₂₈Also, tas yeete ëne sayne kewise unsersuuche sol un tan khan eyer ese fom proot un fom khelich trinke. ₂₉Wayl, te persoon woo tas proot ese tuut un fom khelich trinke tuut oone erkhëne tas es em Hër sayne khërwer is, wil julkeyert kewe wën eyer est un trinkt fer sayne aychne xtroof. ₃₀Is tesweche woo fiile fon aych krank un xwach sayt, un phaar sin xon kextorep. ₃₁Wën meyer unsere kewise eyerxt unersuuche teet, teere meyer net julkeyert kewe fom Hër. ₃₂Awer, meyer kewe julkeyert un kextrooft fom Hër, tas meyer net tepay konteneyert kewe mit te welt.

₃₃Also, mayn priiter, wën teyer aych fersamle tuut fer em Hër sayn Haylich Nachts Ese ese, waart ëne iwer te anere. ₃₄Un, wën yemant hunger hot, sol tehëm ese, tas Hërkot aych net xtroofe tuut weche tëne fersamlunge.

Ti anere phunkte tuun ich resolweere wën ich too aan khome.