1Korintios 10

₁Priiter, ich wil hon tas teyer traan tënke tuut was paseyert is mit unser foerkhomer woo Mooses noo kang sin. Al waare unich te pexitsung fon te wolek un sin torich te Roote Meer kang. ₂Als aanhënger fon Mooses, sin se ketaaft kep in te wolek un im meer. ₃Al hon kes fom selwiche kaystlich ese ₄un hon ketrunk fom selwiche kaystliche ketrënk. Wayl hon fon tee selwich kaystlich fels ketrunk; un ti fels waar Yeesus Kristus. ₅Awer Hërkot is net froo kep mit te meyerxte fon tëne, un tesweche sin tii kextorep, un tëne sayn khërwer sin im tesërt ferxtraut keplip.

₆Tas ales is paseyert fer se tiine als payxpiil, tas meyer khee xlecht tings wole hon, soo wii tii tas wolte, ₇net mool iitole atoreere, soo wii phaar fon tëne atoreyert hon. Wii ti Hayliche Xrifte saan: “Tas folek hot sich kesetst fer se ese un trinke un is uf kextii fer sich ferkniiche.” ₈Meyer thërfe khee seksuaal imoraliteet aan xtele, soo wii phaar fon tëne es kemach hon. Un, wayl tii tas kemach hon, sin tray un tswansich tausent fon tëne toot uf te potem kefal in eene eensichste taach. ₉Meyer tërfe net Yeesus sayn ketult in proope xtele wii phaar fon tëne kemach hon, un tesweche sin se toot kemach kep fon xlange. ₁₀Teyer tëreft aych net peklaache, wii phaar fon tëne kemach hon, un tesweche sin se fernicht kep fom Ëngel fom Toot.

₁₁Tas ales is paseyert mit unser foerkhomer fer se tiine als payxpiil fer ti anere, un tas tings is kexrip kep fer se tiine als ermaanung fer uns. Wayl meyer sin am leewe am ën fon te tsayte.

₁₂Also, tee woo tënkt teet xteen, is peser uf pase fer net um se fale. ₁₃Ti fersuuchunge woo teyer foer het sin ti selwiche woo ti anere foer hon; awer Hërkot halt sayn ferxprechung in un lost aych khee fersuuchunge mit mache woo teyer khee kraft het fer se phake. Wën en fersuuchung khomt, kept Hërkot aych kraft fer tii se phake, un soo khënt teyer fon tëm raus khome.

₁₄Tesweche, mayn liipe froynte, rayst aus fon iitole atoreere. ₁₅Ich xpreche mit aych wii mit layt woo ti kapasiteet hon fer se ferxteen was ich am fersichere sin. Julkeyert teyer selepst was ich am saan sin. ₁₆Tënkt an te khelich woo meyer fer Hërkot tanke am Hër sayn Haylich Nachts Ese. Meecht tas net sin, wën meyer fon tëm khelich trinke, tas meyer teel am nëme sin in Kristus sayn pluut? Un, wën meyer tas proot teele un ese, sin meyer net teel am nëme an Kristus sayne khërwer? ₁₇Wën meyer ach fiil sin, ale ese fom selwiche proot, woo ploos eens is; un tesweche sin meyer ploos eene khërwer.

₁₈Tënkt an tas folek fon Israël. Tii woo tas keopfert tings ese, hale teel mit am opfer woo fer Hërkot kemach kept am altar. ₁₉Was wil ich saan too temit? Tas te iitol ore tas es mitel woo keopfert kept fer tee en weyert hot? ₂₀Is sicher net! Was ich am saan sin is tas was keopfert kept an te pakane altare kept keopfert fer te taywel un net fer Hërkot. Un ich wil net hon tas teyer teel halt mit tings fon te temoone. ₂₁Teyer khënt net fom Hër sayne khelich trinke un aach fom khelich fon te temoone. Teyer khënt net ese am Hër sayne tix un aach an te temoone sayne tix. ₂₂Ore meechte meyer wole te Hër prowokeere, am mache tas tee ayfersichtich kept? Tënkt teyer filaycht tas meyer xtërker sin wii tee?

₂₃Phaar saan soo: “Meyer khëne mache ales was meyer wole.” Yoo, awer net ales is kuut. “Meyer khëne mache ales was meyer wole”, awer net ales is nutslich. ₂₄Nimant tëref sayn aychne interese suuche awer toch te anere sayn interese.

₂₅Teyer khënt fon alem ese was in te xlachteray ferkhaaft kept, oone khee tswayfel im kewise. ₂₆Wayl, wii ti Hayliche Xrifte saan: “Ti eyert un ales was uf tëm eksisteyert keheyert em Hër.”

₂₇Wën yemant woo net en krist is aych inlaate tuut fer se ese, un teyer keet, est ales was uf ketixt kept un tuut niks frooe weche em kewise. ₂₈Awer, wën yemant aych saat: “Tas ese waar keopfert kept fer ti iitole”, in tëm fal est tas net, weche tëm woo tas kesaat hot un aach weche em kewise. ₂₉Ich sin net am xpreche fon tayn aychne kewise, awer fom anere sayne kewise.

Awer yemant khan frooe: “Warom sol mayn frayheet ferkleenert kewe weche em anere sayne kewise? ₃₀Wën ich fer Hërkot tanke es ese woo ich ese tuun, warom kewe ich kritisiert, wën ich xon ketankt hon fer Hërkot?”

₃₁Also, wën teyer ese tuut, ore trinke tuut, ore etwas aneres, macht ales fer Hërkot sayn kloor. ₃₂Leept soo tas teyer khee xaate tuut fer ti yute, net fer tii woo khee yute sin, net mool fer Hërkot sayn Khërich. ₃₃Macht wii ich. Ich fersuuche al kuut pehantle, net an mich selepst am tënke, awer im kuutes fer ale, tas tii keret kewe khëne.