Rechte un flichte fon en aphostel
1Meecht ich net en fraye man sin? Sin ich net en aphostel? Hon ich net Yeesus, unser Hër, kesiin? Sayt teyer net te resultaat fon te aarwat woo ich mache fer te Hër? 2Wën ti anere mich ach net aan nëme als aphostel, teyer tuut mich aan nëme! Teyer selepst, wayl teyer fereenicht sayt mit em Hër, sayt ti proop tas ich en aphostel sin.
3Wën ti layt mich kritiseere, tuun ich mich tefenteere, soo am saan: 4Meecht ich net ti recht hon fer ese un ketrënkt fertiine mit mayn aarwat? 5Meecht ich net ti recht hon fer, iwer mayn reese, en kristlich eefraa mit nëme, wii ti anere aphostle, wii ti priiter fon Hër Yeesus un aach Pheeter es mache? 6Ore meechte Barnabë un ich ti eensichste sin woo xafe mise fer uns se unerxtitse? 7Weyer hot xon keheyert xpreche iwer en soltaat woo sayn aychne xpeese petsaalt hot im militeyer? Ore was fer paurer woo khee trauwe est fon sayn aychne plantaaj? Ore was fer xeefer woo khee milich trinkt fon sayn aychne fii?
8Tënkt net tas ich mich ploos uf tii payxpiile fom taachliche leewe ferlose, wayl ti Kesets saat es selwiche. 9In Mooses sayn Kesets is soo kexrip: “Pint net em oks sayn maul tsuu wën tee te weets am fertreete is.” Is Hërkot filaycht intereseyert an ti okse? 10Ore waar tas iwer uns woo tee tas kesaat hot? Is sicher tas tas kexrip is fer uns. 11Wën meyer unich aych te kaystliche soome keseet hon, meecht tas tsu fiil sin etwas kriin als materiaal fertiinst? 12Wën anere ti recht hon tas fon aych se waarte, meechte meyer net fiil mee recht hon wii tii?
13Sicher wist teyer tas tii woo im Thëmpel xafe fom Thëmpel sayn es mitel kriin. Un wist aach tas tii woo opfere aan piite am altar en teel kriin fom flayx fom fii woo too uf keopfert kept. 14Soo, hot te Hër aach kexikt tas tii woo te ewankeelium aan saan sole leewe fon tee aarwat woo te ewankeelium aan saat.
15Awer, ich hon noch khee fon tëne rechte penutst, un sin net am xraywe fer tii rechte reklameere fer mich selepst. Ich teet liiwer xtërwe anxtat tas mache! Un nimant tuut mich te xtols wech hoole in tas soo se mache! 16Ich hon net ti recht fer xtols se kewe in te ewankeelium aan saan. Wayl, tas mache is mayn flicht. Ay fon mich wën ich net te ewankeelium aan saan! 17Tesweche, wën ich mayn aarwat tuun torich mayne aychne wile, tan khan ich etwas waarte als loon. Awer, wën ich tas mache als en flicht, is wayl tas en aarwat is woo Hërkot mich kep hot fer se mache. 18In tëm fal, was fer is te loon woo ich kriin? Is es te priwilëëj fer te ewankeelium aan saan oone niks ap hoole un oone ti rechte se ferlange woo ich hon als yemant woo Hërkot sayn wort aan saat.
19Ich sin en fraye man; ich sin nimant sayne sklaawe. Awer hon mich sklaawe fon al kemach fer te kreeste numer fon layt kewine fer Kristus. 20Wën ich unich te yute xafe, leewe ich wii en yut fer iine se kewine fer Kristus. Ich sin net unich Mooses sayn Kesets; awer, wën ich unich te yute xafe, leewe ich wii wën ich unich tee Kesets weyer fer ti yute fer Kristus se kewine. 21Soo aach, wën ich unich tëne sin woo khee yute sin, leewe ich oone Mooses sayn Kesets noo keen fer tii woo khee yute sin fer Kristus se kewine. Tas petayt net tas ich net Hërkot sayn kesets noo keen, wayl ich sin, in te woerheet, unich Kristus sayn kesets. 22Wën ich unich te xwache im klaawe sin, mache ich mich aach xwach fer tii se kewine fer Kristus. Soo, transformeere ich mich in ales fer ale, fer, uf yeete aarte, phaar fon tëne se rete.
23Ich mache tas ales weche em ewankeelium, fer teel se nëme in sayn seechnunge. 24Teyer wist tas in en wet laaf, wën ach ale laafer teel mit hale, ploos ëne kewint te prays. Also, laaft soo tas teyer te prays kewint. 25Ale atlët woo treyniert is phakt ti xweere aktiwiteete wayl eyer en laurel krans kewine wil, en krans woo net lang hale tuut. Awer meyer wole en krans kriin woo fer imer hale tuut. 26Tesweche laufe ich tirekt uf ti final linye.
Sin aach wii en pokser woo khee ëne xlaach ferpast. 27Ich pehantle hart mayne khërwer un tswinge em fer komplët kontroleyert sin, soo tas, wën ich fer anere kepreeticht hon, ich selwer fom khampf net raus fale.
