1Korintios 8

₁Yets tuun ich xpreche iwer te propleem fon te es mitle keopfert fer iitole. In te woerheet, wii mer saat, “meyer al hon khëntnise.” Awer, tii sort khëntnise filt te persoon mit xtols; awer te liipe macht uns foran keen im klaawe. ₂Te persoon woo tënkt tas eyer etwas wees hot noch net ti wisheet woo eyer prauch. ₃Awer weyer Hërkot liipt is pekhant fon iim.

₄Was se tuun hot mit es mitle ese woo keopfert kep waare fer ti iitole, wise meyer tas en iitol etwas representeyert woo net eksisteyert. Un meyer wise tas es noore ëne Hërkot kept. ₅Eksisteere toch tii woo “kote” kenënt kewe, soo im himel wii uf te eyert, soo wii aach fiile “kote” un fiile “hëre” eksisteere. ₆Awer, fer uns eksisteyert ploos ëne Kot, te Fater un Kriator fon ale tings, fer weem meyer leewe. Un eksisteyert ploos ëne Hër, woo Yeesus Kristus is, torich weem ale tings ketsoo kep waar un torich weem meyer eksisteere. ₇Awer net al khëne tii woerheet. Es kept layt woo soo keweent sin mit te iitole, tas se pis yets fon tëne es mitle ese, am tënke tas se fer ti iitole keheere. Tëne sayne kewise is xwach, un tesweche fiile se sich net sauwer wën se fon tëm es mitel ese. ₈Is net tas ore tee es mitel woo mache tuut tas Hërkot uns aan nëme tuut. Meyer tuun niks ferleere wën meyer net ese un fertiine niks wën meyer fon tëm es mitel ese tuun.

₉Awer, past uf tas ayer frayheet net macht tas ti woo xwach im klaawe in sinte fale. ₁₀Wën en persoon woo en xwache kewise hot siit tas tuu, woo te “khëntnis” host, am ese pist im thëmpel fon en iitol, meecht tee persoon net aach wole tas es mitle ese woo keopfert kep waar fer ti iitole? ₁₁Soo, tee xwache krist, tee tayne pruuter fer weem Kristus kextorep is, khan sich ferleere weche tëm “khëntnis” woos tuu host. ₁₂Soo, wayl tuu sinte am mache pist keeche tayne pruuter un tëm sayne kewise, pist tuu sinte am mache keeche Kristus. ₁₃Also, wën te es mitel macht tas mayne pruuter sinte mache tuut, nii mee ese ich flayx tas ich net te uersach sin fon tëm sayn sinte.