Konseele fer ti ferhayrate layt
1Yets tuun ich xpreche iwich ti phunkte woo teyer mich kexrip het.
Teyer saat tas te man es kuut macht net am hayrate. 2Awer ich saan: wayl es soo fiil seksual imoraliteet kept, sol yeete man sayn aychne fraa hon un yeete fraa sayne aychne man. 3Te man mus sayn flichte als eeman in hale un ti fraa sol aach sayn flichte in hale als eefraa. 4Ti eefraa xikt net an sayne aychne khërwer; weyer xikt is sayne eeman. Soo aach tuut te eeman net an sayne khërwer xike; weyer xikt is sayn eefraa. 5Tas ti tswaay sich net ap saan ëne fer te anere, sonst wën se pextime phaar taache ausnaner playwe fer sayn tsayt aus kewe fer se peete. Awer, tëm noo, sole se noch mool sich naner ferkniiche, fer net in Satanaas sayn fersuuchunge fale wayl se sich selepst net kontroleere khëne.
6Ich saan tas net als en ortnung, awer als en sujestsioon. 7In te woerheet, wolt ich hon tas teyer al weyert wii ich. Awer, yeete ëne hot te kaape woo Hërkot iim kep hot: ëne hot tee kaape, un anere hot en anere kaape.
8Fer ti letiche un fer ti witfraae saan ich tas es peser weyer tas se playwe teere oone hayrate, wii ich. 9Awer, wën teyer net te seksual wile tomineere khënt, tan hayrat, wayl is peser hayrate anxtat am prëne playwe fon pasioon.
10Fer tii woo xon ferhayrat sin hon ich en kepoote, woo net mayn is, awer fom Hër: tas ti fraa sich net ausnaner macht fon sayne man. 11Awer, wën se sich ausnaner macht, tas se net noch mool hayrate sol, ore sol friite mache mit sayne man. Un tas te man aach khee eepruch mache sol fon sayn fraa.
12Fer ti anere saan ich selepst, un net te Hër: wën en kriste man ferhayrat is mit en fraa woo net en krist is, un tii tsuu saat fer wayter leewe mit tëm, tas tee khee eepruch mache sol fon tee. 13Un, wën en kriste fraa ferhayrat is mit en man woo khee krist is, un tee tsuu saat fer wayter mit tee fraa se leewe, tas tii khee eepruch mache sol mit tëm. 14Also, Hërkot tuut te man aan nëme woo khee krist is wayl tee fereenicht is mit sayn kriste fraa; un nëmt aan ti fraa woo khee krist is wayl tii fereenicht is mit sayne man woo en krist is. Wën tas net soo weyer, teere tëne sayn khiner net tsu Hërkot keheere. Awer, wayl es soo is, tuun se keheere. 15Awer, wën te man woo khee krist is ore ti fraa woo khee krist is ti eepruch mache wole, tan sole se sich ausnaner mache. In tëm fal, is te kriste man ore ti kriste fraa fray fer se mache wii se wole, wayl Hërkot hot aych keruuf fer in friite se leewe. 16Kriste fraa, wii khans tuu sicher sin tas tuu net tayne eeman rete tuust? Un tuu, kriste man, wii khanst tuu sicher sin tas tuu net tayn eefraa rete tuust?
En leewe fer Hërkot aan heere
17Yeete ëne mus wayter leewe tëm noo te kaape woo Hërkot iim kep hot un in te kontitsioon woo eyer waar wan Hërkot iim keruuf hot fer krist se sin. Tas is ti reechel woo ich lërne in ale khëriche. 18Wën en yute man, woo pexnit is, Hërkot sayne ruuf aan nëmt, tëref eyer net ti marke fon te pexnaytung wech mache. Un, wën en man woo khee yut is, woo net pexnit is, Hërkot sayne ruuf aan nëmt, tëref eyer sich net pexnayte lose. 19Macht khee unerxiit pexnit sin ore net; was important is, is Hërkot sayn kepoote noo keen. 20Yeete ëne mus wayter mache wii eyer waar wii eyer Hërkot sayne ruuf aan kenom hot. 21Waarst tuu en sklaawe wan Hërkot tich keruuf hot? Mach tich khee ketanke too triwer. Awer, wën tuu tich pefraye khanst, tan penuts ti keleechenheet. 22Wayl te sklaawe woo te Hër keruuf hot is yets en fraye man woo tsum Hër keheyert. Soo aach te fraye man woo Kristus keruuf hot is Kristus sayne sklaawe. 23Hërkot hot aych fer en prays khaaf; soo, macht aych khee sklaawe fon mënxe. 24Priiter, yeete ëne sol wayter in Hërkot sayn presëns playwe soo wii eyer waar wii Hërkot iim keruuf hot.
Konseele fer ti letiche layt un fer ti witfraae
25Fer ti letiche layt, hon ich khee kepoote fom Hër; awer ich kewe mayn meenung als en persoon woo, torich em Hër sayn knaate, fertrauung fertiint hot. 26Weche te xwiiriche tsayte woo meyer leewe, tënke ich tas es peser is fer te man soo playwe wii eyer is. 27Hast tuu en fraa? Tan fersuuch tich net fon tëm ausnaner mache. Pist tuu letich? Tan suuch khee eefraa. 28Awer, wën tuu hayrate tuust, pist tuu khee sinte am mache. Un, wën en letich meere hayrate tuut, is aach khee sinte am mache. Awer ich teet aych kërn xpaare fon te taachliche propleeme woo teyer mit mache mist im leewe fon ferhayrate layt.
29Priiter, was ich saan wil is tas: is uns khee fiil tsayt iwerich, un fon hayt aan foran sole ti ferhayrate leewe wii wën se net ferhayrat weere; 30tii woo prile, wii wën se net am prile weere; tii woo am lache sin, wii wën se net am lache weere; tii woo khaafe, wii wën tas woo se khaafe net tëne weyer; 31tii woo tas tings fon tee welt pehantle, wii wën se net mit tëne am xafe weere. Wayl tii welt, wii se yets is, tuut net lang hale.
32Ich wil aych fon te soriche pefraye. Te letiche intereseyert sich am Hër sayn sache wayl eyer em kefale wil. 33Awer te ferhayrate man intereseyert sich am tings fon tee welt wayl eyer sayn fraa kefale wil 34un tesweche kept eyer fer tswaay ferxiitne richtunge ketsoo.
Was te fraae aan keet, soo ti witfraae wii ti letiche, tii sin intereseyert am Hër sayn sache wayl se wole mit khërwer un seel fer iim sich hiin kewe. Awer ti ferhayrat fraa intereseyert sich an te sache fon tee welt wayl se sayne man kefale wil.
35Ich sin tas am saan wayl ich aych helfe wil. Ich wil nimant tswinge uf niks. Kraat es keeche teel: ich wil tas teyer macht was richtich is un aych ap kewe tuut am Hër sayn aarwat oone resërwe.
36Fer tii woo ferloopt sin, awer hon resolweyert net mee hayrate, saan ich soo: wën te puup mënt tas eyer soo net richtich am mache is mit sayn praut un mënt tas sayn pasioon fer tas meere noch xtarek is un tas se hayrate sole, tan sole se hayrate. Too is khee sinte traan. 37Awer wën, im keeche teel, te puup sich net in flichte fiilt fer se hayrate, un wërklich letich playwe wil un wën eyer sayne wile unich kontrol hot un hot xon resolweyert was eyer mache sol, tan macht eyer richtich in net mit tëm meere hayrate. 38Soo, weyer hayrat macht es richtich, awer weyer net hayrate tuut macht es noch peser.
39Ti fraa is net fray soo lang wii sayne man leewe tuut. Wën sayne man xtërwe tuut, kep se fray fer se hayrate mit weem sii wil, awer tas mus en krist sin. 40Awer, sii wil kliklicher sin wën se playpt soo wii se is. Tas is mayn meenung, un ich tënke tas ich aach em Hërkot sayne Kayst hon.
