Protsese keeche priiter im klaawe
1Wën yemant fon aych en klaache hot keeche en pruuter im klaawe, wii het teyer koraaj fer justis se ferlange fer richter woo khee kriste sin, anxtat fer em Hërkot sayn folek ferlange fer tisput resolweere? 2Wist teyer net tas em Hërkot sayn folek ti welt julkeere tuut? Tan, wën teyer ti welt julkeere tuut, meecht teyer net ti kleene tinger julkeere khëne? 3Wist teyer filaycht net tas meyer sokaar ti ëngle julkeere tuun? Fiil mee, tan, mise meyer es tings fon tëm leewe julkeere! 4Also, wën soo en tisput foer khomt, meecht teyer layt uf suuche keen woo in te khërich khee weyert kriin fer tas se julkeere? 5Xeemt aych mol! Meecht nimant unich aych kenuuch wisheet hon fer soo tispute unich priiter resolweere? 6Is sicher tas es kept! Awer was paseyert is tas en pruuter in Kristus en anere pruuter uf es kericht ruuft un lost tas pakaane richter ti tisput julkeere.
7Ploos te fakt tas es unich aych lekaale tispute kept, tsaycht xon tas teyer komplete feeler am mache sayt. Weyer es net peser ti unkerechtichkheet aus hale? Weyer es net peser te ferluste aus hale? 8Im keeche teel, teyer macht en unkerechtichkheet, un xteelt, un macht tas ales keeche ayre aychne priiter! 9Teyer wist tas ti xlechte khee teel am Himels Raych kriin. Macht aych net ër, wayl ti imoraale, tii woo iitole atoreere, ti woo net leaal sin in sayn hochtsayt, ti homoseksuaale, 10ti xpits puuwe, ti kelt keeriche, ti pesofne, ti woo liye uf xtele un ti woo iwerfale fer se xteele wëre khee teel am Kotes Raych hon. 11Phaar fon aych waart soo kewees. Awer sayt kewex kep fon te sinte, ap kexpërt kep fer tsu Hërkot keheere un fon iim aan kenom kep torich em Hër Yeesus Kristus un torich Kot sayne Kayst.
Te khërwer penutse fer Hërkots kloor
12Yemant wërt saan: “Ich khan ales mache was ich wil.” Khan, yoo, awer net ales is kuut fer tich. Ich khënt saan: “Ich khan aler tings mache.” Awer lose niks mich als sklaawe mache. 13Anere saat: “Tas ese eksisteyert fer te maache, un te maache eksisteyert fer tas ese.” Yoo, awer Hërkot macht xlus mit te tswaay. Unser khërwer eksisteyert net fer imoraliteet fërtich se pringe, awer fer te Hër tiine; un te Hër past unser khërwer uf. 14Torich sayn macht hot Hërkot te Hër Yeesus peleept un tuut uns aach peleepe.
15Wist teyer net tas ayre khërwer teel halt mit Kristus sayne khërwer? Meecht ich en xtik fon Kristus sayne khërwer hoole un mache tas es en xtik fon en huer sayne khëwer sin sol? Sicher net! 16Ore wist teyer net tas en man woo sich fereenicht mit en huer eene eensichste mënx mit tëm kept? Ti Hayliche Xrifte fersichere: “Ti tswaay kewe wii eene.” 17Awer, weyer sich fereeniche tuut mit em Hër wërt, kaystlich, een eensichst persoon mit tëm.
18Rayst aus fon te seksual imoraliteet! Yeete anere sint woo yemant macht hot niks se tuun mit sayne khërwer, awer te mënx woo seksual imoraliteet mache tuut macht sinte keeche sayne aychne khërwer. 19Wist teyer net tas ayre khërwer te thëmpel fom Hayliche Kayst is, woo in aych trin leept un is aych kep waar fon Hërkot? Teyer keheyert net fer aych selepst, awer fer Hërkot, 20wayl eyer hot aych khaaf un hot te prays petsaalt. Tan, penutst ayre khërwer fer tëm sayn kloor.
