1Korintios 5
Imoraliteet in te kemaynte fon Korinto
1Yets kept kesaat tas unich aych soo en kroos seksual imoraliteet am paseere is, tas net mool ti pakaane praktiseere khëne. Ich hon se wise kriit tas en man seks am mache is mit sayn aychne xtiif moter. 2Wii khënt teyer soo xtols sin? Im keeche teel, teyer het sole aarich traurich sin un fon unich aych ap xike weyer soo was mache tuut. 3-4Wën ich ach net perseenlich too pay aych sin, sin ich awer pay aych in kayst. Un, am mache wii wën ich too tepay weyer, hon ich xon julkeyert, torich ti autoriteet fon unser Hër Yeesus, te man woo soo en xreklich tings am mache is. Wën teyer aych fersamle tuut, wërt ich tepay sin in kayst. Tan, torich ti macht fon unser Hër Yeesus, woo mit uns sin wërt, 5kept te man ap fer Satanaas, tas sayne khërwer fernicht kept, awer sayne kayst keret wërt am Hër sayne Taach.
6Is net richtich tas teyer soo xtols sayt! Teyer khënt te xpruch: “En pisye heep macht ti kans mase wakse.” 7Xmayst te alte heep fon te sinte wech tas teyer kans sauwer kept. Tan kept teyer wii nay mase un oone heep, wii teyer, in te woerheet, xon sayt. Wayl unser Oostre Fest is fërtich, yets woo Kristus, unser Oostre Xoof, xon keopfert kep waar. 8Tan wole meyer unser Oostre fayre, net mit proot woo heep prauch, te alte heep fon sinte un fon te imoraliteet, awer mit em proot oone heep, tas proot fon te raynichkheet un fon te woerheet.
9Im anere priif woo ich fer aych kexrip hon, hon ich rekomenteyert tas teyer niks se tuun het mit imoraalixe mënxe. 10Ich wolt net saan tas teyer ap kexpërt playwe solt fon te pakaane woo imoral sin, kelt keerich, xpitspuuwe ore iitole atoreere. Wayl, fer tii mënxe neewe lose, mist teyer aus tee welt keen. 11Was ich mëne is tas teyer niks se tuun het mit nimant woo saat weyer pruuter im klaawe, awer is imoraal, ore kelt keerich, ore tuut iitole atoreere, ore is pesof, ore xprecht xlecht fon te layt, ore xpits puup. Mit soo layt tëreft teyer net mool een imst mit ese.
12-13Xliislich, ich hon net ti recht fer se julkeere tii woo khee kriste sin. Hërkot tuut se julkeere. Awer meecht teyer net julkeere mise ayre priiter im klaawe? Wii ti Hayliche Xrifte saan: “Tuut te xlechte man unich aych remoweere.”
2022 Sociedade Bíblica do Brasil