Kristus sayn Aphostle
1Teyer mist uns pehantle als Kristus sayn tiiner, woo aan kextelt kep sin fer Hërkot sayn ferxtekelte pleen realiseere. 2Was mer ferlangt fon weem tii flicht hot is tas eyer leaal fer sayne Hër sin mus. 3Awer, fer mich xpiilt tas khee rol fon aych julkeyert kewe ore fon en mënxliche kericht. Ich julkeere net mool mich selepst. 4Mayne kewise is sauwer, awer tas pehaupt net tas ich, wërklich, unxultich sin. Weyer julkeyert is te Hër. 5Soo, julkeyert nimant foer te uertsayt; waart te letste julkamënt, wën te Hër khome tuut. Tee pringt ans licht ti kehëmnise woo im tunkle ferxtekelt sin un wërt tsayche ti intensioone woo in te mënxe sayn hërts sin. Tan kriit yeete ëne fon Hërkot ti loope woo eyer fertiint hot.
6Mayn priiter, is fer aych in se lërne woo ich fon mich un Apolus xpreche. Ich hon uns tswaay penutst als payxpiil, tas teyer lërne tuut was te xpruch saat: “Heyer aan was kexrip is.” Nimant sol sich xtolseere uf een persoon un te anere ap xtoose. 7Weyer hot tich peser kemach wii ti anere? Waar tas net filaych Hërkot woo tich kep hot ales was tuu host? Tan warom kepst tuu soo xtols wii wën tas net fon Hërkot khome teet?
8Wii es aus siit, het teyer xon ales was teyer praycht! Sayt xon raych! Teyer sayt xon kheeniche kep, un meyer net! Wii kuut wën teyer wërklich kheeniche weyert, tas meyer mit aych rechiire khënte! 9Wayl es khomt mich foer tas Hërkot uns, ti aphostle, uf es letste plats ketuun hot. Meyer sin wii ti layt woo konteneyert kep sin fer se xtërwe foer te layt, als en xpetakel fer ti kans welt, soo fiil fer ti ëngle soo wii fer ti mënxe. 10Weche Kristus sin meyer ferikt, awer teyer sayt wisent wayl teyer fereenicht sayt mit tëm. Meyer sin xwach, un teyer sayt xtarek; teyer kept rexpekteyert, un meyer kewe neewe kelos. 11Pis yets hon meyer hunger un torxt kelit. Hon uns mit lumpe aan ketsoo, sin ferhau kep un hon khee richtich plats fer se woone. 12Meyer tuun xweyer xafe fer uns unerhale. Wën meyer ferfluucht kewe, tuun meyer seechne. Wën meyer keyacht kewe, tuun meyer mit ketult aus hale. 13Wën meyer ferxënt kewe, antworte meyer mit tsaatliche wërter. Meyer sin lixo kerechent, un pis yets sin meyer pehantelt als trek fon te qe welt.
14Ich sin tas tings net am xraywe fer aych se ferximpe, awer fer aych se lërne wii wën teyer mayn aychne peliipte khiner weyert. 15Wën teyer ach tausente mayster im kristliche klaawe het, khënt teyer net mee wii eene fater hon. Also, wii ich aych te ewankeelium keprung hon, sin ich ayre fater kep in Kristus Yeesus. 16Soo, ferlange ich tas teyer mayne payxpiil noo keet. 17Tesweche xike ich Timooteo fer aych, woo mayne liipe un leaale soon im Hër is. Tee tuut aych helfe traan tënke an te weeche woo ich keen im naye leewe woo ich hon in eenichkheet mit Yeesus Kristus, weeche woo ich fer ale khëriche lërne tuun.
18Phaar fon aych sin xtols kep, sicher tas ich aych net pesuuche kheemt. 19Awer, wën Kot wil, khome ich klaych fer aych se pesuuche. Tan kriin ich se wise was ti xtolse mache khëne un net ploos was se xpreche khëne. 20Wayl, te Kotes Raych is khee tings fon wërter, awer fon macht. 21Was het teyer liiwer: tas ich mit en paytx khome ore mit en hërts fol liipe un kuutheet?
