Hërkot sayn tiiner
1In te woerheet, mayn priiter, ich khont net mit aych xpreche wii ich keweent sin se mache mit te layt woo em Hërkot sayne Kayst hon. Ich must mit aych xpreche wii wën teyer mënxe fon te welt weyert, wii wën teyer khiner weyert im kristliche klaawe. 2Ich must aych mit milich fitre un net mit xtarek ese, wayl teyer waart noch net fërtich fer tas. Un sayt imer noch net fërtich, 3wayl teyer leept wii wën teyer layt fon tee welt weyert.
Wën ayfersichtichkheet un tsënkeray unich aych eksisteyert, meecht tas net pewayse tas teyer layt fon tee welt sayt un macht was ale layt mache? 4Wën yemant saat: “Ich sin fon Phaulus”, un anere: “Ich sin fon Apolus”, meecht teyer net am mache sin wii layt fon tee welt?
5Noo ales, weyer is Apolus? Un weyer is Phaulus? Meyer sin ploos Hërkot sayn tiiner, un waar torich uns woo teyer am Hër keklaapt hat. Yeete ëne fon uns macht ti aarwat woo te Hër tëm kep hot fer se mache: 6Ich hon keplanst, un Apolus hot waser kep fer ti planse, awer es waar Hërkot woo se wakse kemach hot. 7Soo, es is net important weyer planst ore weyer waser kept, awer toch Hërkot, woo es wakse macht. 8Wayl es kept khee unerxiit tswixe weyer planst ore weyer waser kept. Hërkot kept te loon tëm noo mit te aarwat woo yeete ëne kemach hot. 9Wayl meyer sin khameraate in te aarwat ore im Hërkots tiinst, un teyer sayt tas lant woo Hërkot sayn aarwat macht.
Teyer sayt aach em Hërkot sayn kepau. 10Am penutse ti kaape woo Hërkot mich kep hot, mache ich ti aarwat fon en kompetënte maurer. Ich mache te funtamënt, un anere tuut truf paue; awer yeete ëne mus uf pase wii eyer paue tuut. 11Wayl Hërkot hot xon Yeesus Kristus hiin ketuun als eensichste funtamënt, un khee anere funtamënt teref keleet kewe. 12Phaar penutse kolt ore silwer ore eetel xteen fer uf te funtamënt se paue. Un noch anere penutse hols ore kraas ore xtroo. 13Kristus sayne Taach wërt kans klaar tsayche ti kwaliteet fon yeete ëne sayn aarwat. Wayl tas fayer fon tëm Taach wërt ti aarwat fon yeete persoon tsayche. 14Wën tas woo yemant uf te funtamënt kepaut hot tas fayer iwerleewe tuut, tan kriit te pauer sayne loon. 15Awer, wën yemant sayn aarwat prëne tuut mit em fayer, tan tuut tee pauer sayne loon ferleere. Awer eyer selepst kept keret, wii wën eyer torich es fayer kang weyer fer sich se rete. 16Teyer wist yoo, sicher, tas teyer Hërkot sayne thëmpel sayt un tas em Hërot sayne Kayst in aych trin leept. 17Soo, wën yemant Hërkot sayne thëmpel fernichte tuut, tuut Hërkot tee persoon fernichte. Wayl Hërkot sayne thëmpel is haylich, un teyer sayt tëm sayne thëmpel.
18Tas nimant sich selepst hinerkeen tuut! Wën yemant fon aych tënkt weyer kluuch tëm noo te mënxlich wisheet, tan mus eyer ferikt kewe fer wërklich en wisente kewe. 19Wayl tas was tii welt mënt weyer wisheet, tuut Hërkot mëne es weyer feriktichkheet. Wii ti Hayliche Xrifte saan: “Herkot fangt ti wisente in tëne sayn xlauheete.” 20Un noch: “Te Hër wees tas te wisente sayn ketanke niks weyert sin.” 21Nimant sol sich xtolseere fon was ti layt mache khëne. Wayl ales keheyert aych, 22was mënt, Phaulus, Apolus, Pheeter, tii welt, tas leewe un te toot, te presënt un te futur. Tas ales keheyert aych, 23un teyer keheyert Yeesus, un Yeesus keheyert Hërkot.
