Ti mensaaj iwer te pekraytste Kristus
1Mayn priiter, wan ich Hërkot sayn ferxtekelt woerheet aan saan khom sin fer aych, hon ich net fiil wërter penutst net kroos wisheet. 2Wayl, wan ich aych pesuucht hon, wolt ich ales ferkese, ploos net Yeesus Kristus un ekstra sayne toot am krayts. 3Wan ich aych pesuucht hon, waar ich xwach un hon ketsitert fon pang. 4Mayn untericht un mayn mensaaj waare net aan kesaat kep mit wërter fon te mënxlich wisheet, awer mit xtrame pewaysunge fon te macht fom Hërkot sayne Kayst. 5Soo, ayre klaawe hot net sayn basis uf te mënxlich wisheet, awer an Hërkot sayn macht.
Hërkot sayn wisheet
6Awer, fer tii woo kaystlich rayf sin, saan meyer en mensaaj fon wisheet aan. Is awer net en wisheet fon tee welt net tii fon te machte woo ti welt rechiire un woo sayn macht am ferleere sin. 7Ti wisheet woo meyer aan saan is Hërkot sayn ferxtekelt wisheet, ferxtekelt fon te mënxe, ti wisheet woo te aychne Hërkot, noch tefoer ti welt ertsiyng, xon aus kesuucht hat fer unser kloor. 8Khee een fon te machte woo yets ti welt kowerneere hon tii macht kekhënt. Wayl, wën teyer se kekhënt het, het teyer net te kloorixe Hër pekraytst. 9Awer, wii ti Hayliche Xrifte saan:
Was nimant nii kesiin ore keheyert hot,
un was nii yemant ketënkt hat tas paseere khënt,
waar tas was Hërkot prepareyert hat fer tii woo iim liipe.
10Awer es waar fer uns woo Hërkot, torich em Kayst, sayn kehëmnis reweleyert hot. Te Hayliche Kayst unersuucht ales, sokaar ti tiifste pleen fon Hërkot. 11Noore te kayst woo im mënx is khënt ales iwer tee mënx. Un, was Hërkot aan keet, noore sayne aychne Kayst khënt ales iwer Kot. 12Es waar net te kayst fon tee welt woo meyer uf kenom hon, awer te Hayliche Kayst woo Hërkot kexikt hot, tas meyer ales ferxteen khëne was Hërkot uns kep hot.
13Also, wën meyer xpreche, penutse meyer wërter woo Hërkot sayne Kayst uns kelërnt hot un net wërter woo ti mënxlich wisheet uns kelërnt hot. Soo tuun meyer ti kaystliche woerheete ausleye fer tii woo kaystlich sin. 14Awer, weyer net Hërkot sayne Kayst hot khan net ti kaape woo fom Kayst khome kriin. In te woerheet, eyer khan se net mool ferxteen. Tii woerheete sin feriktichkheet fer tee mënx, wayl tëne iire sin khan ploos kaystlich ferxtan kewe. 15Te mënx woo te Hayliche Kayst hot khan te weyert fon ale tings julkeere, awer tee selepst khan fon nimant julkeyert kewe. 16Wii ti Hayliche Xrifte saan: “Weyer khan em Hër sayne sin khëne? Weyer khan tëm etwas foerxlaan?” Awer meyer tënke wii Kristus tënkt.
