2Korintios 10
Phaulus sayn autoriteet als aphostel
1Kept kesaat tas ich pexeyert sin wan ich pay aych sin, awer xtram wan ich wayt sin. Soo, mache ich, Phaulus, tii pitung fer aych im naame Kristus, woo tsaat un kuut waar. 2Wan ich pay aych aan khome, tswingt mich net xtram se sin. Wayl ich sin sicher tas ich xtram pehantle khan keeche tii woo fersichere tas meyer tas tings mache weche mënxliche motiife. 3Is sicher tas meyer mënxlich sin, awer meyer khëmfe net weche mënxliche motiife. 4Ti keweere woo meyer penutse sin net fon te welt; sin Hërkots kreftiche keweere, mit kapasiteet fer festunge fernichte. Un soo tuun meyer falxe itee fernichte 5un aach te mënxliche hoochmuut woo net lost tas ti mënxe Hërkot khëne lërne. Meyer tomineere ale mënxliche ketanke un mache tas tee Kristus aan heere tuut. 6Un, wan teyer pewayse tuut tas teyer heere tuut, wëre meyer fërtich sin fer aler unkeheersaamkheet xtroofe.
7Teyer julkeyert tas tings torich te xayn. Wën en mënx sicher is tas eyer tsu Kristus keheyert, sol eyer noch mool too triwer sich iwerleye, wayl meyer keheere aach tsu Kristus, soo wii tee mënx. 8Te Hër Yeesus hot mich autoriteet kep iwer aych, net fer aych se fernichte, awer fer aych kaystlich wakse mache. Un, wën ich mich ach en pisye hoochmuutich kefiilt hon weche mayn autoriteet, hon awer niks fer mich se xeeme. 9Ich wil net hon tas es aus siit tas ich am fersuuche sin aych ferxichtere mit mayn priife. 10Yemant wërt saan: “Phaulus sayn priife sin xweyer un xtram; awer, wan eyer pay uns is, is eyer xichter un, wan eyer xprecht, is eyer xwach.” 11Awer tee persoon mus wise tas khee unerxiit is tswixe was meyer xraywe in te priife, wan meyer wayt fort sin, un was meyer mache, wan meyer too pay aych sin.
12Is sicher tas meyer khee koraaj hon fer uns ekaal mache ore uns ferklayche mit tëne woo tënke tas se important sin. Wii tum sin tii! 13Meyer tuun uns net praale iwer etliche limite. Hërkot is weyer ti limite xtelt in unser aarwat khamp, un tee hot uns kelos pis an aych khome in Korintus. 14Als teyer in tëm limit sayt, sin meyer net iwer kang wan meyer too aankhom sin fer Yeesus sayne ewankeelium pringe. 15Soo tuun meyer uns net xtolseere uf ti aarwat woo anere kemach hon uf plets woo wayter playwe wii in te limite woo Hërkot uns kep hot. In keeche teel, meyer waarte tas ayre klaawe wakse khan un tas meyer en noch kreeser aarwat mache khëne unich aych, imer in te limite woo Hërkot fer uns aan kep hot. 16Tan khëne meyer te eweankeelium aan saan in anere rechioone wayter foran fon woo teyer woont. Tas oone in anere sayn limikte rin keen, tas mer uns net xtolseere iwer ti aarwat woo anere kemach hon.
17Wii ti Hayliche Xrifte saan: “Weyer sich xtolseere wil, sol sich xtolseere iwer tas woo te Hër macht.” 18Wayl te mënx kept aproweyert wën Hërkot em aproweyert un net wan eyer aproweyert is fon sich selepst.
2022 Sociedade Bíblica do Brasil