2Korintios 11

₁Ich het kërn tas teyer mich aus hale teet aach wën ich en pisye tujm aan xtele. Ich pite, halt mich aus! ₂Ti selwiche soriche woo Hërkot uf aych hot hon ich aach. Wayl teyer sayt wii en yungfraa woo ich in hochtsayt ferxproch hon ploos fer eene man, woo Kristus is. ₃Soo wii Eewa hinerkang kep waar torich te xlang sayn liye, hon ich pang tas ayre ketanke aach soo korompeyert kewe un teyer ayre phuure klaawe an Kristus hinerlose tuut. ₄Wayl teyer tuut mit frayt aan nëme yeete ëne woo khomt un en anerxtere Yeesus aan saat als tee woo meyer aan kesaat hon. Un tuut en kayst un ewankeelium aan nëme kans anerxter fom Hërkots Kayst un fom ewankeelium woo teyer kriit het fon uns.

₅Ich mëne tas ich net weenicher weyert sin wii ti “super aphostle”! ₆Filaycht sin ich wii en khint fer aus xpreche, awer wii en auskewakste man in khëntnis. Imer un in aler situatsioone hon ich pewayse fon tëm fer aych kep.

₇Wii ich ti kuut naychkheet fon Hërkot aan kesaat hon fer aych, hon ich tas kans umsonst kemach. Ich hon mich erniitricht fer aych important mache. Meecht too etwas xlechtes traan kewees sin? ₈Soo lang wii ich am xafe waar unich aych, hon anere khëriche mich keholef. Neekst wii wën ich fon tëne am xteele weyer fer aych se helfe. ₉Un, iwer ti tsayt woo ich pay aych waar, wën ich etwas must hon, hon ich nimant kexteyert; wayl ti priiter woo fon Masetoonia khom sin hon keprung ales was ich praucht. Was in te ferkangne tsayt un im futur paseere wil is tas: ich tuun nii etwas ferlange fon aych fer mich se helfe. ₁₀In Kristus sayn woerheet, woo pay mich is, fersichere ich tas nimant, uf khee plats fon Akaya, mich te xtols wech hoolt fom ewankeelium aan saan oone niks ap hoole. ₁₁Warom sin ich tas am saan? Meecht tas sin wayl ich aych net liipe? Hërkot wees tas ich aych liipe!

₁₂Was ich yets am mache sin tuun ich wayter mache tas tii “aphostle” khee uersach fine fer sich inpilte un saan tas se sayn aarwat kraat soo mache wii meyer. ₁₃Tii mëner sin falxe aphostle un khee echte aphostle. Tii liye iwer sayn aarwate un tuun sich ferxtele, ploos sich am aan kewe als echte aphostle fon Kristus. ₁₄Praycht aych net se ferwunere, wayl sokaar Satanaas khan sich ferxtele un aus siin wii en ëngel fon licht. ₁₅Also, is khee kroos tings tas tëm sayn aarwater sich ferxtele, sich am presenteere wii wën se layt weere woo kuutes tuun. Awer, tsum xlus, kriin se te loon woo se mit sayn aktsioone fertiint hon.

₁₆Ich saan noch mool: nimant sol tënke tas ich tum sin. Awer, weyer tas mënt, sol mich soo uf nëme, tas ich was kleenes hon fer mich se praale. ₁₇In te woerheet, was ich yets am saan sin is net was te Hër mich kexikt hot se saan. Tan sin ich wërklich am xpreche wii en tume man. ₁₈Awer, wayl soo fiil sich am praale sin weche mënxliche uersache, tuun ich mich aach fon mich selepst praale. ₁₉Teyer sayt soo wisent un halt ti tujme aus mit kuute wile. ₂₀Tolereyert tii woo an aych xike un tuun aych aus nutse; tolereyert tii woo aych hinerkeen, tii woo aych pehantle oone acht un tii woo aych ferxlaan. ₂₁Tuun mich sokaar xeeme fer se saan tas meyer tsu xay waare un khonte net soo tings fertich pringe.

Awer, wën ti anere koraaj hon fer sich inpilte iwer etwas, tuun ich aach te koraaj hoole, wën tas ach en tumheet is. ₂₂Sin tii hepreye? Ich sin aach. Sin tii Israelite? Ich sin aach. Sin tii nookhomer fon Aapraham? Ich sin aach. ₂₃Sin tii tiiner fon Kristus? Awer ich sin en pesere tiiner wii tii, wën ich ach, tas am saan, am xpreche sin wii wën ich tum weyer. Wayl ich hon mee kexaft wii tii un waar eftas in te katee. Sin ferxlaa kep fiil mee wii tii un oft mool waar ich in kefoer fer se xtërwe. ₂₄In finef keleechenheete hon ti yute mich noyn un traysich mool kehau mit te paytx. ₂₅Tray mool hon ti reemixe mich ferhau mit kniple, un een mool sin ich ferxmis kep mit xteen. Tray mool is te poot woo ich am reese waar uner kang, un in een mool fon tëne sin ich fier un tswansich xtune uf em meer keplip, am xwime. ₂₆Uf te fiile reese woo ich kemach hon, waar ich in kefoer fon iwerfluse un xpits puuwe; in kefoer weche mayn folek, ti yute, un aach tii woo khee yute sin. Ich waar in kefoer in te xtet, in te tesërte un im hooche meer; un aach in kefoer weche falxe priiter. ₂₇Ich hat aarwat un miitichkheet. Oft mool waar ich keplip oone xloofe. Hon oft hunger un torxt kelit; hat mich haus kefeelt, ese un klaytung. ₂₈Pay tëm tings ales un noch anere, macht noch kewicht uf mich, yeete taach, was ich mich khimere mit ale khëriche. ₂₉Wën yemant xwach is, fiile ich mich aach xwach; un, wën yemant in sinte fale tuut, mache ich mich fiil ketanke.

₃₀Wën es en motiif kept fer mich inpilte, tan tuun ich mich inpilte fom tings woo mayn xwachheet tsaycht. ₃₁Te Hërkot un Fater fom Hër Yeesus, te Hërkot woo keseechent is fer imer, wees tas ich net am liye sin. ₃₂Wii ich in te xtat Tamasko waar, hot te kowerneyer woo kenënt waar fom kheenich Aretas, wacher an ti toore kextelt fer mich fange. ₃₃Awer, mayn froynte hon mich in en kroose khorep runer kelos torich en loch fon te mauer un, soo, sin ich langst khom fom kowerneyer.