2Korintios 12

₁Wën tas ach niks nutse tuut, ich mus mich inpilte iwer mich selepst. Yets xpreche ich iwich ti erxaynunge un rewelatsioone woo te Hër mich kep hat. ₂Ich khëne en krist woo kenom kep waar, fërtsen yoer tsurik, uf mool, pis an te heechste himel. Ich wees net op tas, wërklich, paseyert is ore op tee en erxaynung kehat hat; ploos Hërkot wees tas. _3-4Ich saan tas noch mool: ich wees tas tee man kenom kep waar, uf mool, noo em paratiis. Ich wees net op tas, wërklich, paseyert is ore op tas en erxaynung waar; ploos Hërkot wees tas. Un too hot eyer tings keheyert woo mënxliche wërter net aus xpreche khëne. ₅Ich tuun mich inpilte iwer tee man. Awer tuun mich net praale iwer mich selepst, sonst fom tings woo mayn xwachheete tsayche. ₆Awer, wën ich mich praale wolt fon mich selepst, weyer tas net en feriktichkheet, wayl ich ti woerheet am saan weyer. Awer, ich tuun mich net praale, wayl ich wil hon tas was ti layt iwer mich tënke sayn basis hat uf was tii mich kesiin hon mache un keheyert hon saan.

₇Awer, tas ich net tsu xtols kewe teet weche te wunerliche tinger woo ich kesiin hon, hon ich en phaynlich krankheet kriit, woo is wii en torn in mayne khërwer. Tii is khom wii en mensajeyer fon Satanaas fer mich ferhaue un net lose tas ich xtols keept. ₈Tray mool hon ich Hërkot aan kepeet, am ferlange tas eyer tii phayn mich wech hoole solt. ₉Awer, tee hot mich keantwort: “Mayne knaate is ales was tuu prauchst, wayl mayn macht is xtërker wën tuu xwach pist.” Also, ich fiile mich aarich kliklich in mich praale fon mayn xwachheete, tas soo ti xitsung fon Kristus sayn macht pay mich playpt. ₁₀Ich kewe aach froo mit te xwachheete, ti ferxënunge, ti layte, ti yacht un ti xwiirichkheete woo ich mit mache weche Kristus. Wayl, wën ich mayn kraft ferleere, tan hon ich Kristus sayn kraft in mich.

₁₁Ich sin am mache wii en ferikte, awer teyer het mich too truf ketswung. Wayl teyer het mise kuut fon mich xpreche. Also, wën ich ach niks weyert weyer, ich sin net weenicher weyert, uf khee aart, als ayre “super aphostle”. ₁₂Ti fiile wunere woo pewayse tas, in te woerheet, ich aphostel sin, waare kemach kep unich aych mit fiil ketult. Es waare sinaale un fiile ferxiitne wunere. ₁₃Wii soo sayt teyer xlechter pehantelt kep als ti anere khëriche? Te eensichste unerxiit is tas ich net ferlangt hon tas teyer mich helfe solt. Ich pite, ferftsayert mich ti unkerechtichkheet!

₁₄Ich sin xon fërtich fer es trite mool aych pesuuche khome un noch mool ferlange ich net tas teyer mich helfe solt. Ich wil aych selepst hon un net ayer kelt. Xlislich, is net ti khiner woo fer sayn eltre soriche mise, awer ti eltre fer sayn khiner. ₁₅Ich kewe froo in ales mit aych aus kewe was ich hon, sokaar mich selepst, fer aych se helfe. Meecht teyer mich weenicher liipe ploos wayl ich aych soo fiil liipe?

₁₆Also, teyer wërt tsuu kewe tas ich niks ferlangt hon fon aych. Awer, yemant khan saan tas ich aych hinerkang hon ore petroo mit liye. ₁₇Hon ich, filaycht, aych eksploreyert torich en mensajeyer woo ich aych kexikt hon? ₁₈Ich hon ferlangt tas Titus aych pesuuche kheemt un noch en anere pruuter im klaawe. Hot, filaycht, Titus aych eksploreyert? Meechte meyer tswaay net in te selwich aart un im selwiche kayst mit aych um kang sin?

₁₉Filaycht tënkt teyer tas meyer uns tefenteere wole foer aych, awer tas is es net. Meyer xpreche wii Kristus uns teet xike xpreche, foer Hërkot. Un ales was meyer mache, liipe froynte, is fer aych se helfe. ₂₀Ich hon pang tas, wën ich pay aych aan khome, ich aych anerxter aan trefe wii ich wolt un tas teyer mich anerxter fint als teyer wolt ich weyer. Ich hon aach pang xtrayt un riwaliteet aan trefe, wuut un ekoysmus, intriike, kexpreech, hoochmuut un unortnung. ₂₁Ich mache mich ketanke tas, am neekste mool woo ich pay aych aan khome, mayne Kot mich erniitricht foer aych un tas ich prile mus weche fiile fon aych woo wayter ti selwiche sinte mache woo se kemach hate in te ferkangne tsayt un sich net keroyert hon fon sayn unraynichkheet, sayn seksual imoraliteet un net mool fon tëm anere imoral tings woo se sonst kemach hon.