2Korintios 13

₁Tas is xon es trite mool woo ich aych pesuuche khome. Wii ti Hayliche Xrifte saan: “Yeete akusatsioon mus fersichert kewe torich ti wërter fon weenichstens tswaay tsayer.” ₂Ich wil etwas saan fer aych woo frier sinte kemach hon un fer ti anere al. Iwich mayne tswete pesuuch, hat ich tas xon kesaat kehat, un yets woo ich wayt fort sin, saan ich tas noch mool: es neekste mool woo ich khome, kept nimant kexoont. ₃Tan kriit teyer ale pewaysunge tas Kristus torich mich xpreche tuut. Wën tee mit aych se tuun hot, is eyer net xwach; im keeche teel, tsaycht sayn macht unich aych. ₄Wayl, wën Kristus ach xwach waar wii eyer am krayts kextorep is, yets tuut eyer leewe torich Hërkot sayn macht. Soo aach meyer, fereenicht mit Kristus, sin xwach; awer, in unser leewe pay aych, kewe meyer ferpint mit em leewente Kristus un wëre Hërkots macht hon fer ales se mache.

₅Tuut aych unersuuche fer enteke op teyer xtram im klaawe sayt. Kans sicher wist teyer tas Yeesus Kristus fereenicht is mit aych, ploos net wën teyer kans feel kang sayt. ₆Un ich hofe tas teyer wist tas meyer khee feeler ketuun hon. ₇Meyer peete fer Hërkot am ferlange tas teyer niks xlechtes tuut, net fer se tsayche tas meyer en susës sin, awer tas teyer macht was richtich is. Un macht niks tas es aus siit tas meyer feeler kemach hon. ₈Wayl meyer khëne niks mache keeche ti woerheet, awer ploos te woerheet tsuu xteen. ₉Tesweche kewe meyer froo wën meyer xwach sin, awer teyer xtarek sayt. Un tuun aach peete tas teyer noch xtërker kept im klaawe. ₁₀Ich xraywe tee priif eep ich aych pesuuche khome tas, wën ich khome, net prauch soo xtram sin in te penutsung fon te autoriteet woo te Hër mich kep hot. Tii autoriteet is fer se mache tas teyer kaystlich wakse tuut un net fer aych se fernichte.

₁₁Un yets, priiter, pis palt. Fersuucht in ales uf em richtiche weech playwe. Heyert kuut aan was ich saan. Playpt al in te selwich meenung un leept in friite mitsamer. Tan wërt te Hërkot fom liipe un friite pay aych sin.

₁₂Pekriist eene te anere mit tëm friite khus.

Ti kans kemaynte xikt aych xeene kruus.

₁₃Tas em Hër Yeesus Kristus sayne knaate, em Hërkot sayne liipe un em Hayliche Kayst sayne paysin mit aych al sich ferhalt!