1Pheeter 5

₁Ich, woo aach tsu te eltre fon te khërich keheere, kewe yets ti kemaane fer ti anere eltre woo unich aych sin. Ich sin en tsayer fon Kristus sayn layte un wëre teel nëme in te kloor woo reweleyert wërt. ₂Ich feroote aych tas teyer kuut uf pase tuut uf ti khërich woo Hërkot aych kep hot un macht tas mit kuute wile, wii Hërkot wil, un net mit xlechte wile. Macht net ayer aarwat fer kelt se fertiine, awer mit em echte wunx fer se tine. ₃Tuut net tomineere tii woo fer aych ap kep sin, awer sayt en payxpiil fer ti khërich. ₄Un, wan te Kroose Xeefer tsu foerxayn khome tuut, kriit teyer ti kloorix kroon, woo nii sayne klans ferleere tuut.

₅Un teyer, yunge, solt ti eltre aan heere. Tas yeete ëne em anere tiine tuut mit temiitichkheet, wayl ti Hayliche Xrifte saan: “Hërkot is keeche ti hoochmuutiche, awer is kuut mit te kuute un tii woo temiitich sin!” ₆Also, sayt petrikt unich Hërkot sayn mechtich hant tas eyer aych eere tuut an te richtich tsayt. ₇Kept ayre kanse soriche fer Hërkot ap, wayl eyer tuut aych uf pase.

₈Sayt wachsaam un playpt am wache wayl ayre faynt, te Taywel, keet too rom wii en leep woo krumt, yemant am suuche fer se frese. ₉Playpt xtram im klaawe un khëmft keeche te Taywel. Wayl teyer weest tas uf te kans welt ayre priiter im klaawe ti selwiche layte am mit mache sin. ₁₀Awer, noo ti kleen tsayt in layte, te Hërkot woo en liipe oone limite fer uns hot un woo aych keruuf hot fer teel hale in tëm sayn eewich kloor, wayl teyer fereenciht sayt mit Kristus, tee selwer tuut aych ferpesere, tuut aych xtramheet, kraft un echt sicherhee kewet. ₁₁Fer tee sol ti macht sin fer imer! Aamen!

₁₂Ich xraywe tee kleene priif fer aych mit Silas sayne hilef, weyer ich en leaale pruuter im klaawe rechne. Ich wil aych animeere un mayne tsayer kewe tas ti seechnunge woo teyer xon kriit het sin en echte tsayer fon Hërkot sayne knaate. Soo, playpt wayter fest in tëm knaate.

₁₃Ti khërich woo in Papiloonia playpt, aach aus kesuucht fon Hërkot, xikt pekriisunge. Mayne soon Markus xikt aach pekriisunge. ₁₄Pekriist ëne em anere mit en priiterliche khus.

Tas te friite sich ferhalt mit aych al woo tsu Kristus keheere tuut.