Transformeyerte leewe
1Tesweche, soo wii Kristus am khërwer kelit hot, mist teyer aach fërtich sin, wii eyer waar, fer layte mit mache. Wayl tee woo layte mit macht am khërwer lost noo tomineyert se kewe fon te sinte. 2Tan, fon yets aan wayter, leept te rest fon ayer leewe hier uf te welt tëm noo Hërkot sayne wile un lost aych net tomineere fon te mënxliche pasioone. 3In te ferkangne tsayt het teyer xon fiil tsayt aus kep am mache was ti pakaane kërn mache. In tee tsayt het teyer in te imoraliteet keleept, in te flayxliche winxe, im trinke, orjie, im sauferay un ti eeklich atoreerung fon iitole. 4Un yets ferwunere sich ti pakaane wën teyer aych net mit tëne fersamelt in tëm ferikt un imoral leewe un tesweche tuun se aych ferxëne. 5Awer, tii mise sayn rechnung ap mache mit Hërkot, woo fërtich is fer ti leewente un ti toote se julkeere. 6Wayl te Ewankeelium is aach aan kesaat kep fer ti toote, woo kextorep sin weche Hërkot sayne julkamënt wii ale mënxe xtërwe. Te Ewankeelium is tëne aan kesaat kep tas se tas kaystliche leewe leewe khënte wii Hërkot wil tas se leewe sole.
Kuute atministratoore fon Hërkot sayn kaape
7Te ën fon ale tings is ticht. Past uf un playt am wache fer se peete khëne. 8Iwer ales, liipt wërklich ëne te anere, wayl te liipe fertsayert fiil sinte. 9Tuut ëne em anere uf nëme, oone reklameere. 10Sayt kuute atministratoore fon te ferxiitne kaape woo teyer kriit hot fon Hërkot. Tas yeete ëne sayn aychne kaape penutse tuut fer kuut fer ti anere! 11Weyer unterichte tuut, sol em Hërkot sayn wort unterichte; weyer tiine tuut, sol tiine mit te kraft woo Hërkot kept. Macht tas soo tas in ales Hërkot keloopt kept torich Yeesus Kristus, fer weem ti kloor un ti macht keheere fer imer! Aamen!
Teel mit am hale an Kristus sayn layte
12Mayn liipe froynte, kept net ferwunert mit te hart proop fon petrikung woo teyer am mit mache sayt, wii wën etwas ekstraortineyer am paseere weyer mit aych. 13Kraat es keeche teel, frayt aych wayl teyer teel mit am hale sayt fon Kristus sayn layt, tas teyer fol frayt kept wën tëm sayn kloor reweleyert kept. 14Teyer wërt kliklich wën teyer pelayticht kept wayl teyer Kristus sayn aanhënger sayt. 15Wën eene fon aych layte mit mache mus, tas es net sin sol wayl teyer yemant umkeprung hot, kextool hot, pantit sayt ore wayl teyer aych in te anere sayn leewe rin mixe. 16Awer, wën yemant layte mit macht wayl eyer en krist is, tuu tich net xeeme, awer tank fer Hërkot tas tuu mit tëm naame kenënt kepst.
17Wayl ti tsayt fer te julkamënt aan fange is xon too, un tii woo tsum Hërkot sayn folek keheere wëre ti eyerxte woo julkeyert kewe. Wën tee julkamënt mit uns aanfankt, was meecht te ën sin fon tëne woo net an Hërkot sayne ewankeelium klaawe? 18Wii ti Hayliche Xrifte saan: “Wën tas net laycht is tas ti kuute keret kewe, was meecht paseere mit tëne sinter woo niks wise wole fon Hërkot?”
19Tesweche, tii woo layte mit mache, wayl tas em Hërkot sayne wile fer tii is, sole torich sayn kuute aktsioone sich komplët ap kewe fer Hërkot, woo imer sayn ferxprechunge in halt.
