1Pheeter 3

₁Soo aach tuu, fraa, must tayne man aan heere tas, wën eyer net an Hërkot sayn mensaaj klaawe tuut, tas tayne hantle iim tsum klaawe pringe tuut. Prauchst niks se saan ₂wayl eyer wërt siin wii tuu rexpekt host un ërnst pist. ₃Fersuuch net xeen kewe mit ornamënte, an te hoer mache was tsu fiil is, kolt un tayre klayter am aan tuun. ₄Kraat es keeche teel, tayn xeenheet sol im hërts sin, wayl tii xeenheet ferliert sich net; tas is ti xeenheet fon en kalme un tsaatliche kayst, woo fiil weyert hon fer Hërkot. ₅Wayl es waar soo tas ti fraae fon friirixe tsayte sich kexmikt hon, ti fraae woo fer Hërkot tetikeyert waare un sayn hofnung an iim ketuun hon. Tii hon sayne man aan keheyert. ₆Sara waar soo kewees. Tii hot Aapraham aan keheyert un hot em “mayne hër” kenënt. Tuu wërst Sara sayn khint yets sin wën tuu tas kuutes praktisierst un khee pang host fon niks.

₇Aach tuu, man, im leewe mit tayn fraa, erkhën tas tayn fraa ti xwechst is un, tesweche, mus se mit rexpekt pehantelt kewe. Wayl ti fraa wërt aach kriin, mit tich, te kaape fom leewe, woo Hërkopt kept. Tuu soo hantle tas niks tswixe ayre kepeete khome tuut.

₈Tsum xlus, tas teyer ti selwich aart fer se tënke un fer se xpiire het. Liipt eene te anere un sayt tsaat un temiitich eene mit em anere. ₉Petsaalt net tas xlechtes mit xlechtes, net mool pelaytichung mit pelaytichung. Es keeche teel, petsaalt ti pelaytichung mit en seechnung wayl, wën Hërkot aych keruuf hot, hot eyer ferxproch aych en seechnung kewe. ₁₀Wii ti Hayliche Xrifte saan:

₁₃Wën teyer, wërklich, tas kuutes mache wolt, weyer tuut aych xaate mache? ₁₄Wii kliklich wërt teyer sin wën teyer layte mit mache mist wayl teyer am mache sayt was richtich is! Praycht khee pang hon fon nimant, un macht aych khee ketanke. ₁₅Mist rexpekt fer Kristus in ayer hërts hon un pehantelt iim als Hër. Playpt imer fërtich fer se antworte fer yeete person woo ferlangt tas teyer aysleye tuut ti hofnung woo teyer het. ₁₆Awer, macht tas mit tsaatlichkheet un rexpekt. Mist te kewise imer sauwer hon. Soo, wën teyer pelayticht kept, tii woo xlecht xpreche fon ayer kuut hantlung als nookënger fon Kristus wëre sich xeeme. ₁₇Wayl, is peser layte mit mache weche tas kuutes tuun, wën es Hërkot sayne wile is, als weche tas xlechtes tuun. ₁₈Also, te aychne Kristus hot am krayts een mool fer ale kelit weche te sinte, en kuute man fer ti xlechte, fer aych tsu Hërkot nëme. Tee is im khërwer kextorep, awer is im kayst peleept kep, ₁₉un im kayst is Er kang un hot kepreeticht fer ti kayste woo inkexpërt waare. ₂₀Tii waare ti kayste fon tëne woo Hërkot net aan keheyert hate, wan eyer mit ketult am waarte keplip waar in te taache woo Noah ti ark am paue waar. Tii phaar layt woo too trin waare, acht im kansem, waare keret kep torich em waser. ₂₁Tas waser hot te taaf representeyert, woo aych yets rete tuut. Tee taaf is net te trek fom khërwer ap wexe, awer is te kompromise mit Hërkot kemach, woo fon en sauwere kewise khomt. Tii retung khomt torich Yeesus Kristus sayn peleepung, ₂₂woo noo em himel kang is un uf Hërkot sayn rechts sayt, ti ëngle, ti autoriteete un ti machte fom himel am kowerneere is.