Cântico 8

₁Ndee xekyvy va'e rire, xexy omokambu va'ekue ae!

Ha'e rami va'e rire tape rupi rovaexĩ vy

xee roayvu 'rãgue avave rei xejou vai e'ỹ re.

₂Xee rogueraa vy rogueroike 'rãgue xexy ropy.

Ha'e gui ndee xembo'e 'rãgue.

Ha'e rã ndevy ame'ẽ 'rãgue rey'u aguã vinho iporãve va'e regua,

ha'e xe yvyra'a rykue.

₃Ndeaxua regua oĩ 'rãgue xeakã guýry,

ha'e rã reiporu kuaa regua ma xekuavã 'rãgue.

₄Jerusalém memby kuery, ajerure pẽvy:

pemomyĩ eme rojoayvua, tove toke ranhe,

ha'e ae ovyxe e'ỹa ja.

₅Mava'e tu peva'e, tekoa e'ỹa katy gui oẽ ouvy vy

guembiayvu reve joe ojeko jogueruvy va'e?

Maçã'y rembypy guy py xee romomyĩ.

Ha'e py ae ndexy nderereko'i raka'e.

Ha'e py ae ju nekuavãare oendu raka'e haxy va'e.

₆Emoĩ xerery nekuraxõ re imbojaarã rami, ndejyva re guive.

Mba'eta jajoayvua ma manoa rami ipo'aka.

Ha'e rã takãte'ỹ ma yvyra rupa rami nda'evei ete va'e.

Ha'e va'e regua tapyĩ ma hendy revegua,

tata rami okai oiny va'e.

₇Yy tuvixa va'e teĩ nomboguei 'rã jajoayvua,

yakã ikuai va'e ndojao'i 'rã.

Joayvua repyrã amongue oguereko va'e ha'e javi ome'ẽ teĩ mba'everã ndovarei.

₈Ore kuery orereindy roguereko ikã e'ỹ teri va'e.

Mba'e tu rojapo 'rã ixupe gua'yxyrã re ojerurea ramo?

₉Tetã kora ha'e oiko va'e rire

ixupe rojapo 'rãgue peteĩ torre prata guigua.

Ha'e rã okẽ va'e rire

ronhovã 'rãgue yvyrape yary guigua py.

₁₀Xee ma tetã kora, ha'e rã xekã ma torre rami oĩ.

Ha'e rami rã xerembiayvu xerexa vy xererovy'a 'rã.

₁₁Baal-Hamom py Salomão oguereko peteĩ uvaty.

Ha'e va'e omboaxa raka'e opena va'erã kuery pe.

Ha'e ramo hi'a rekovia peteĩ-teĩ ogueru ixupe mil hatã'i va'e prata guigua.

₁₂Ha'e rã xe uvaty ma xereve ae oĩ xee aipotaa rami areko aguã.

Ha'e gui ndee Salomão, eju ejopy mil hatã'i va'e,

ha'e hi'a re opena va'e kuery ju duzentos 'rã ojopy.

₁₃Ndee yvotyty rupi reiko va'e,

nhaneirũ kuery oenduxe okuapy ndeayvua.

Xee voi taendu.

₁₄Xerembiayvu, eju pojava!

Enha ejuvy guaxu e'ỹ vy guaxu ra'y

yvyty heakuã va'e áry rupi opo-opo ouvy va'e rami.